Sū-su-kì 第 11 章 - 巴克禮全羅

1

Ki-lia̍t lâng Iâ-hut-tha sī chı̍t ê tōa kôan-lêng ê ióng-sū, sī kī-lú ê kiáⁿ; Iâ-hut-tha sī Ki-lia̍t só͘ siⁿ ê.

2

Ki-lia̍t ê bó͘ iā kā i siⁿ kúi-nā ê kiáⁿ; i ê bó͘ só͘ siⁿ ê kiáⁿ í-keng tōa-hàn, chiū kek-tio̍k Iâ-hut-tha, kā i kóng, Lí m̄-thang tī góan lāu-pē ê ke sêng-chiap gia̍p, in-ūi lí sī pa̍t ê hū-jîn-lâng ê kiáⁿ.

3

Iâ-hut-tha chiū cháu, siám-pī i ê hiaⁿ-tī, khì tiàm tī Tô-pek ê tōe; ū húi-lūi chū-chı̍p tī Iâ-hut-tha hia, tè i chhut-jı̍p.

4

Kè ū hiah-kú, A-bûn lâng kap Í-sek-lia̍t kau-chiàn.

5

A-bûn lâng kap Í-sek-lia̍t kau-chiàn ê sî, Ki-lia̍t ê tiúⁿ-ló khì beh chio Iâ-hut-tha tùi Tô-pek ê tōe lâi;

6

tùi Iâ-hut-tha kóng, Chhiáⁿ lí lâi chòe góan ê gôan-sòe, góan chiū thang kap A-bûn lâng kau-chiàn.

7

Iâ-hut-tha ìn Ki-lia̍t ê tiúⁿ-ló kóng, Chêng lín kiám m̄-sī òan-hūn góa, kóaⁿ góa chhut lāu-pē ê ke mah? taⁿ lín tú-tio̍h hōan-lān, siáⁿ-sū lâi góa chia ah?

8

Ki-lia̍t ê tiúⁿ-ló ìn Iâ-hut-tha kóng, Góan taⁿ só͘-í kui-ǹg lí, sī ài lí kap góan khì, kap A-bûn lâng kau-chiàn; lí thang chòe góan ê thâu, lâi kóan-hat Ki-lia̍t it-chhè khiā-khí ê peh-sìⁿ.

9

Iâ-hut-tha tùi Ki-lia̍t ê tiúⁿ-ló kóng, Lín chhōa góa tò--khì, kap A-bûn lâng kau-chiàn, Iâ-hô-hoa chiong in kau tī góa ê bīn-chêng, góa chin-chiàⁿ beh chòe lín ê thâu mah?

10

Ki-lia̍t ê tiúⁿ-ló ìn Iâ-hut-tha kóng, Iâ-hô-hoa tī lán tiong-kan chòe kan-chèng, góan tek-khak chiàu lí ê ōe kiâⁿ.

11

Iâ-hut-tha chiū kap Ki-lia̍t ê tiúⁿ-ló tò--khì; peh-sìⁿ chiū lı̍p i chòe-thâu, chòe gôan-sòe. Iâ-hut-tha tī Bí-su-pa chiong ka-kī it-chhè ê ōe pâi-lia̍t tī Iâ-hô-hoa ê bīn-chêng.

12

Iâ-hut-tha chhe hiah ê sù-chiá khì kìⁿ A-bûn lâng ê ông kóng, Lí kap góa sím-mı̍h kan-sia̍p, kéng-jiân lâi góa chia kong-kek góa ê tōe ah?

13

A-bûn lâng ê ông ìn Iâ-hut-tha ê sù-chiá kóng, In-ūi Í-sek-lia̍t lâng tùi Ai-kı̍p chiūⁿ-lâi ê sî, chiàm góa ê tōe, tùi A-lùn kàu Ngá-phok, tı̍t-kàu Iok-tàn; taⁿ lín tio̍h gōan-gōan chiong chiah ê tōe hêng góa.

14

Iâ-hut-tha koh chhe sù-chiá khì kìⁿ A-bûn lâng ê ông, kā i kóng,

15

Iâ-hut-tha án-ni kóng, Í-sek-lia̍t lâng pēng bô chiàm Mô͘-ap tōe, kap A-bûn lâng ê tōe.

16

Í-sek-lia̍t lâng tùi Ai-kı̍p chiūⁿ-lâi, keng-kè khòng-iá kàu Âng-hái, lâi kàu Ka-te-su;

17

hit-sî Í-sek-lia̍t chiū chhe sù-chiá khì kìⁿ Í-tong ông kóng, Kiû lí chún góan keng-kè lí ê tōe; chóng-sī Í-tong ông m̄ thiaⁿ i. Koh chhe sù-chiá khì kìⁿ Mô͘-ap ông, i iā m̄-chún; Í-sek-lia̍t lâng chiū tiàm tī Ka-te-su.

18

In koh keng-kè khòng-iá, se̍h Í-tong tōe kap Mô͘-ap tōe, tùi Mô͘-ap tōe ê tang--sì kè-lâi, tī A-lùn hit-pêng chat-iâⁿ; iā bô jı̍p Mô͘-ap ê kéng-lāi; in-ūi A-lùn hô sī Mô͘-ap ê kau-kài.

19

Í-sek-lia̍t chhe lâng khì kìⁿ A-mô͘-lī ông Se-hông, chiū-sī Hi-sı̍t-pún ê ông, Í-sek-lia̍t tùi i kóng, Kiû lí chún góan kè lí ê tōe, khì góan ka-kī ê só͘-chāi.

20

Chóng-sī Se-hông m̄-sìn Í-sek-lia̍t, m̄-hō͘ in keng-kè i ê kéng-kài; Se-hông chiū chū-chı̍p i ê chèng peh-sìⁿ, tī Ngá-cha̍p chat-iâⁿ, kap Í-sek-lia̍t lâng kau-chiàn.

21

Iâ-hô-hoa Í-sek-lia̍t ê Siōng-tè, ēng Se-hông kap i ê chèng peh-sìⁿ kau tī Í-sek-lia̍t lâng ê chhiú, in chiū phah in; tùi án-ni Í-sek-lia̍t chiū tit-tio̍h hit só͘-chāi khiā-khí ê A-mô͘-lī lâng chôan-tōe.

22

In tit-tio̍h A-mô͘-lī lâng ê chôan kéng-kài, tùi A-lùn kàu Ngá-phok, tùi khòng-iá kàu Iok-tàn.

23

Iâ-hô-hoa Í-sek-lia̍t ê Siōng-tè tī I peh-sìⁿ Í-sek-lia̍t ê bīn-chêng, kóaⁿ-chhut A-mô͘-lī lâng; lí iā beh tit-tio̍h in ê tōe mah?

24

Lí ê siōng-tè Ki-bo̍at só͘ siúⁿ-sù lí tit-tio̍h-ê, lí bô tit-tio̍h i lâi chòe-gia̍p mah? Iâ-hô-hoa góan ê Siōng-tè kìⁿ-nā tùi góan ê bīn-chêng só͘ kóaⁿ-chhut-ê, góan beh tit-tio̍h i.

25

Lí kiám iâⁿ-kè Mô͘-ap ông Se-phoat ê kiáⁿ Pa-le̍k mah? i kiám bat kap Í-sek-lia̍t lâng kè-kàu mah? kiám bat kap in kau-chiàn mah?

26

Í-sek-lia̍t lâng tiàm tī Hi-sı̍t-pún kap i ê hiuⁿ-siā, A-lô-jíⁿ kap i ê hiuⁿ-siā, kap A-lùn hô-piⁿ hiah ê siâⁿ, í-keng ū saⁿ-pah nî, lín tī hit-sî siáⁿ-sū bô chhú in tò-tńg ah?

27

Góa bô tek-chōe lí, lí hóan-tńg kap góa kau-chiàn, sı̍t-chāi bû-lí; gōan sím-phòaⁿ ê Iâ-hô-hoa kin-á-jı̍t tī Í-sek-lia̍t kap A-bûn ê tiong-kan lâi phòaⁿ-tòan.

28

Chóng-sī A-bûn lâng ê ông m̄-khéng thiaⁿ Iâ-hut-tha chhe lâng tùi i kóng ê ōe.

29

Iâ-hô-hoa ê Sîn lîm-kàu Iâ-hut-tha; i chiū keng-kè Ki-lia̍t kap Má-ná-se, koh keng-kè kàu Ki-lia̍t ê Bí-su-pa, koh tùi Ki-lia̍t ê Bí-su-pa keng-kè kàu A-bûn lâng hia.

30

Iâ-hut-tha chiū tùi Iâ-hô-hoa hē-gōan, kóng, Lí nā chiong A-bûn lâng kau tī góa ê chhiú,

31

góa tùi A-bûn lâng hia pêng-an tò-lâi ê sî, kìⁿ-nā tùi góa ê chhù ê mn̂g chhut-lâi ngiâ-chih góa-ê, beh kui tī Iâ-hô-hoa, góa beh hiàn i chòe sio-chè.

32

Tùi án-ni Iâ-hut-tha khì A-bûn lâng hia, kap in kau-chiàn; Iâ-hô-hoa chiong in kau tī i ê chhiú;

33

i chiū phah in, tōa-tōa thâi-sí in, tùi A-lô-jíⁿ kàu Bí-le̍k, tı̍t-kàu A-pī-le̍k-ki-la̍h-bêng, kiōng jī-cha̍p ê siâⁿ; án-ni A-bûn lâng chiū khut-ho̍k tī Í-sek-lia̍t lâng.

34

Iâ-hut-tha tò-lâi Bí-su-pa kàu ka-kī ê chhù, hit-sî i ê cha-bó͘-kiáⁿ kia̍h lin-long-kó͘ thiàu-bú chhut-lâi ngiâ-chih i; chit-ê sī i to̍k-siⁿ ê, í-gōa bô kiáⁿ, bô cha-bó͘-kiáⁿ.

35

Iâ-hut-tha khòaⁿ-kìⁿ i, chiū thiah-lı̍h saⁿ kóng, Ai--ah, góa ê cha-bó͘-kiáⁿ, lí hō͘ góa chin-chhám, lí iā sī hō͘ góa chin tōa kan-lân; in-ūi góa í-keng tùi Iâ-hô-hoa khui-chhùi, bōe-ōe siu tò-tńg.

36

I ìn kóng, Góa ê pē ah, lí í-keng tùi Iâ-hô-hoa khui-chhùi, chiū tio̍h chiàu lí ê chhùi só͘ kóng-chhut-ê kiâⁿ tī góa; in-ūi Iâ-hô-hoa í-keng ūi-tio̍h lí pò-siû lí ê tùi-te̍k A-bûn lâng.

37

Koh tùi i ê lāu-pē kóng, Ū chit kiāⁿ sū kiû lí ún-chún, iông-ún góa nn̄g-ge̍h-jı̍t, hō͘ góa kap góa ê tâng-phòaⁿ khì soaⁿ--nih, thang thî-khàu góa chòe chāi-sek-lú.

38

I kóng, Lí khì ah. Chiū chhe i khì nn̄g-ge̍h-jı̍t; i kap tâng-phōaⁿ khì, tī soaⁿ--nih ūi-tio̍h i chòe chāi-sek-lú thî-khàu;

39

nn̄g-ge̍h-jı̍t í-keng móa, i tò-lâi kàu lāu-pē hia, lāu-pē chiū chiàu i só͘ hē ê gōan khóan-thāi i; i lóng bô chhin-kūn ta-po͘-lâng.

40

Āu-lâi Í-sek-lia̍t tiong ū chit ê lē, ta̍k-nî Í-sek-lia̍t chiah ê cha-bó͘-gín-ná khì tui-tō Ki-lia̍t lâng Iâ-hut-tha ê cha-bó͘-kiáⁿ, múi-nî sì jı̍t.