Sū-su-kì 第 17 章 - 巴克禮全羅

1

Í-hoat-liân soaⁿ-tōe ū chı̍t ê lâng, miâ-kiò Bí-ka;

2

i kā lāu-bú kóng, Lí hit chı̍t-chheng chı̍t-pah gûn hō͘ lâng the̍h-khì, lí in-ūi án-ni chiù-chó͘, koh kóng hō͘ góa thiaⁿ, khòaⁿ ah, chit ê gûn tī góa chia; sī góa the̍h--khì. I ê lāu-bú kóng, Gōan Iâ-hô-hoa sù-hok góa ê kiáⁿ.

3

I chiū chiong chheng-it gûn hêng i ê lāu-bú; i ê lāu-bú kóng, Góa í-keng tùi góa ê chhiú ēng chit ê gûn, ūi góa ê kiáⁿ, hiàn hō͘ Iâ-hô-hoa, thang tiau-khek chı̍t sian siōng, chù chı̍t sian siōng; taⁿ góa iû-gôan koh kau lí.

4

Bí-ka chiong gûn hêng i ê lāu-bú; i ê lāu-bú ēng nn̄g-pah gûn hō͘ chù-chō ê lâng, i chiū ēng hit-ê chòe tiau-khek ê ngó͘-siōng, chù ê ngó͘-siōng; hē i tī Bí-ka ê chhù.

5

Chit ê Bí-ka ū siōng-tè ê chhù, koh chè-chō í-hut-tek, kap ke-lāi hiah ê ngó͘-siōng, kiâⁿ siat-lı̍p ê lé, hun-piat i chı̍t ê kiáⁿ chòe i ê chè-si.

6

Hit-sî Í-sek-lia̍t tiong bô ông; ta̍k-lâng chiàu i só͘ khòaⁿ-chòe tio̍h--ê lâi kiâⁿ.

7

Iû-tāi Pek-lī-hêng ū chı̍t ê siàu-liân lâng, sio̍k Iû-tāi cho̍k ê Lī-bī lâng, i kià-kha tī-hia.

8

Chit-lâng lī-khui Iû-tāi Pek-lī-hêng siâⁿ, beh chhē chı̍t-ê thang khiā-khí ê só͘-chāi; kiâⁿ-lō͘ ê sî, kàu Í-hoat-liân ê soaⁿ-tōe, Bí-ka ê chhù.

9

Bí-ka mn̄g i kóng, Lí tùi toh-lo̍h lâi? I ìn kóng, Góa sī Iû-tāi Pek-lī-hêng ê Lī-bī lâng, beh chhē chı̍t-ê thang khiā-khí ê só͘-chāi.

10

Bí-ka kā i kóng, Lí lâi kap góa tòa, chòe góa ê lāu-pē, chòe góa ê chè-si; góa ta̍k-nî hō͘ lí cha̍p ê gûn-á, chı̍t-hù i-chiûⁿ, kap lí ê jı̍t-sı̍t. Lī-bī lâng chiū jı̍t-khì.

11

Lī-bī lâng kam-gōan kap hit-lâng saⁿ-kap tòa. Bí-ka khòaⁿ chit ê siàu-liân lâng chhin-chhiūⁿ ka-kī ê kiáⁿ.

12

Bí-ka kā Lī-bī lâng kiâⁿ siat-lı̍p ê lé; siàu-liân lâng chiū chòe i ê chè-si, lâi tòa tī i ê chhù.

13

Bí-ka kóng, Taⁿ góa chai Iâ-hô-hoa beh hó khóan-thāi góa, in-ūi góa ū chı̍t ê Lī-bī lâng chòe chè-si.