Sū-su-kì 第 2 章 - 巴克禮全羅

1

Iâ-hô-hoa ê sù-chiá tùi Kiat-kah chiūⁿ kàu Pho-kim, kóng, Góa hō͘ lín tùi Ai-kı̍p chiūⁿ-lâi, chhōa lín kàu Góa tùi lín lia̍t-chó͘ chiù-chōa ê tōe; Góa iā bat kóng, só͘ kap lín lı̍p ê iok, Góa éng-óan bô ûi-pōe;

2

lín iā m̄-thang kap chit só͘-chāi khiā-khí ê peh-sìⁿ lı̍p-iok; tio̍h thiah-húi in ê tôaⁿ. Lín kéng-jiân m̄ thiaⁿ Góa ê ōe, sī cháiⁿ-iūⁿ án-ni kiâⁿ ah?

3

In-ūi án-ni Góa koh kóng, Góa bô beh tùi lín ê bīn-chêng kóaⁿ-chhut in, in beh chòe lín hia̍p-ē ê chhì, in ê siōng-tè beh chòe hāi lín ê lô-bāng.

4

Iâ-hô-hoa ê sù-chiá tùi Í-sek-lia̍t chèng-lâng kóng chiah ê ōe ê sî, peh-sìⁿ chiū khui-siaⁿ thî-khàu;

5

chiū hō hit só͘-chāi ê miâ kiò Pho-kim; in tī-hia hiàn-chè hō͘ Iâ-hô-hoa.

6

Iok-su-a í-keng chhe Í-sek-lia̍t lâng khì ê sî, in ta̍k-lâng kui in ê gia̍p, lâi tit-tio̍h in ê tōe.

7

Iok-su-a tī-teh ê jı̍t, kap Iok-su-a sí liáu-āu hiah ê khòaⁿ-kìⁿ Iâ-hô-hoa ūi Í-sek-lia̍t lâng só͘ kiâⁿ tōa-sū ê tióng-ló iáu tī-teh ê sî, peh-sìⁿ ho̍k-sāi Iâ-hô-hoa.

8

Iâ-hô-hoa ê lô͘-po̍k, Lùn ê kiáⁿ Iok-su-a, chı̍t-pah it-cha̍p hè, chiū sí.

9

In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-hi-lia̍t, tī Ka-sı̍t soaⁿ ê pak--sì.

10

Hit-tāi ê lâng lóng tò-chó͘; í-āu koh chı̍t-tāi ê lâng heng-khí, m̄-chai Iâ-hô-hoa, iā m̄-chai ūi Í-sek-lia̍t lâng só͘ kiâⁿ ê sū.

11

Í-sek-lia̍t lâng kiâⁿ Iâ-hô-hoa khòaⁿ-chòe pháiⁿ ê sū, khì ho̍k-sāi Pa-le̍k;

12

khì-sak in lia̍t-chó͘ ê Siōng-tè Iâ-hô-hoa, chiū-sī chhōa in chhut Ai-kı̍p tōe ê; khì tè pa̍t ê siōng-tè, chiū-sī sì-ûi hiah ê peh-sìⁿ ê siōng-tè kūi-pài in, lâi jiá Iâ-hô-hoa ê tōa siū-khì.

13

In iā khì-sak Iâ-hô-hoa, khì ho̍k-sāi Pa-le̍k kap A-su-tha-lio̍k.

14

Iâ-hô-hoa siū-khì Í-sek-lia̍t ê lâng, chiong in kau tī chhiúⁿ-lia̍h in ê lâng ê chhiú, in chiū chhiúⁿ in; I koh bōe in hō͘ sì-ûi tùi-te̍k ê chhiú; tì-kàu in tī in ê tùi-te̍k ê thâu-chêng bô koh khiā-ōe-tiâu;

15

in bô-lūn khì toh-lo̍h, Iâ-hô-hoa chhun-chhiú kàng chai-ē hō͘ in, chiàu Iâ-hô-hoa só͘ kóng ê ōe, koh chiàu Iâ-hô-hoa tùi in só͘ chiù-chōa ê; in chiū ke̍k khùn-khó͘.

16

Iâ-hô-hoa chiū heng-khí sū-su; in chiū kiù peh-sìⁿ thoat-lī chhiúⁿ-lia̍h in ê lâng ê chhiú.

17

Chóng-sī in bô thiaⁿ-thàn in ê sū-su, kéng-jiân kiâⁿ siâ-îm, tè pa̍t ê siōng-tè lâi kūi-pài in; in ê lia̍t-chó͘ thàn Iâ-hô-hoa ê bēng-lēng só͘ kiâⁿ ê lō͘, in kín-kín oai-chho̍ah i, bô chiàu án-ni kiâⁿ.

18

Iâ-hô-hoa kā in heng-khí sū-su ê sî, Iâ-hô-hoa chiū kap sū-su tī-teh; iā tī sū-su o̍ah tī--teh it-chhè ê jı̍t, kiù in thoat-lī tùi-te̍k ê chhiú; in in-ūi siū ap-chè khó͘-chhó͘, chiū thó͘-khùi, só͘-í Iâ-hô-hoa chiū thè-hóe.

19

Kàu sū-su sí-liáu, in chiū o̍at-tńg khì kiâⁿ, pí in ê pē-kong koh khah-pháiⁿ, tè pa̍t ê siōng-tè lâi ho̍k-sāi in, kūi-pài in, lóng bô kóe in ê só͘-kiâⁿ kap in kò͘-chip ê lō͘.

20

Iâ-hô-hoa chiū siū-khì Í-sek-lia̍t lâng, kóng, In-ūi chit ê peh-sìⁿ ûi-pōe Góa ê iok, chiū-sī Góa só͘ bēng-lēng in ê lia̍t-chó͘ ê, iā bô thiaⁿ-thàn Góa ê ōe;

21

só͘-í Iok-su-a sí ê sî só͘ chhun ê ta̍k-cho̍k, í-āu Góa bô beh koh tī in ê bīn-chêng kóaⁿ-chhut chı̍t-cho̍k;

22

thang ēng chiah-ê lâi chhì-giām Í-sek-lia̍t lâng, khòaⁿ in khéng chip-siú Iâ-hô-hoa ê tō-lō͘ lâi kiâⁿ i, chhin-chhiūⁿ in ê lia̍t-chó͘ bat siú i, á-bô.

23

Só͘-í Iâ-hô-hoa lâu chiah ê cho̍k, bô kín-kín kóaⁿ in chhut, iā bô chiong in kau tī Iok-su-a ê chhiú.