Sū-su-kì 第 20 章 - 巴克禮全羅

1

Tùi án-ni Í-sek-lia̍t chèng-lâng tùi Tàn kàu Pia̍t-sī-pa lóng chhut-lâi, kap tiàm tī Ki-lia̍t ê lâng, chôan-hōe chū-chı̍p chhin-chhiūⁿ chı̍t-lâng, tī Bí-su-pa, kàu Iâ-hô-hoa ê bīn-chêng.

2

Peh-sìⁿ ê siú-léng kap Í-sek-lia̍t chèng chi-phài lóng ka-kī lâi khiā tī Siōng-tè peh-sìⁿ ê hōe-tiong, kia̍h-to ê pō͘-peng kiōng sì-cha̍p-bān.

3

(Piān-ngá-bín lâng lóng thiaⁿ-kìⁿ Í-sek-lia̍t lâng chiūⁿ-kàu Bí-su-pa.) Í-sek-lia̍t lâng chiū kóng, Chit ê pháiⁿ-tāi ê chêng-iû tio̍h kā góan kóng-bêng.

4

Hit ê Lī-bī lâng, chiū-sī siū hái-sí ê hū-jîn-lâng ê tiōng-hu, ìn kóng, Góa kap góa ê sòe-î kàu Piān-ngá-bín ê Ki-pí-a hioh-mî.

5

Ki-pí-a lâng khí-lâi kong-ke̍k góa, mî-sî pau-ûi góa hioh ê chhù, siūⁿ beh hāi-sí góa, koh kiông-kan góa ê sòe-î, tì-kàu sí;

6

góa chiū chiong góa ê sòe-î koah kui-tè, chhe lâng the̍h kàu Í-sek-lia̍t tit-tio̍h chòe-gia̍p ê chôan-tōe; in-ūi in tī Í-sek-lia̍t tiong kiâⁿ îm-lōan kap kiàn-siàu sū.

7

Lín lóng-chóng Í-sek-lia̍t lâng tio̍h táⁿ-sǹg gī-lūn.

8

Chèng peh-sìⁿ lóng khí-lâi chhin-chhiūⁿ chı̍t-lâng, kóng, Góan bô chı̍t-lâng beh khì i ê pò͘-pîⁿ, iā bô chı̍t-lâng beh tò--khì i ê chhù;

9

góan tùi Ki-pí-a lâng beh án-ni kiâⁿ; chiàu só͘ thiu ê chhiam khì kong-kek i;

10

góan beh tī Í-sek-lia̍t chèng chi-phài tiong, chı̍t-pah lâng chhú cha̍p-lâng, chı̍t-chheng chhú chı̍t-pah, chı̍t-bān chhú chı̍t-chheng, kā peh-sìⁿ ūn-niû, hō͘ in kàu Piān-ngá-bín ê Ki-pí-a ê sî, thang chiàu in tī Í-sek-lia̍t tiong só͘ kiâⁿ kiàn-siàu ê sū lâi kiâⁿ tī in.

11

Tùi án-ni Í-sek-lia̍t chèng-lâng chū-chı̍p kong-kek hit ê siâⁿ, tāi-ke liân-ha̍p chhin-chhiūⁿ chı̍t-lâng.

12

Í-sek-lia̍t chiah ê chi-phài chhe lâng piàn-piàn kā Piān-ngá-bín ê chi-phài kóng, Lín tiong-kan só͘ kiâⁿ ê, sím-mı̍h pháiⁿ ah?

13

Taⁿ lín tio̍h chiong hiah ê lâng, chiū-sī Ki-pí-a ê húi-lūi, kau-chhut, góan thang hō͘ in sí, tùi Í-sek-lia̍t tiong tû-khì hit ê pháiⁿ. Chóng-sī Piān-ngá-bín lâng m̄-khéng thiaⁿ in hiaⁿ-tī Í-sek-lia̍t lâng ê ōe.

14

Piān-ngá-bín lâng tùi in hiah ê siâⁿ chhut-lâi, chū-chı̍p kàu Ki-pí-a, beh kap Í-sek-lia̍t lâng kau-chiàn.

15

Hit-sî Piān-ngá-bín lâng, tùi ta̍k ê siâⁿ tiám-chhut kia̍h-to-ê, kiōng nn̄g-bān la̍k-chheng, lēng-gōa iáu ū Ki-pí-a lâng tiám-chhut chhit-pah cheng-liān ê peng.

16

Tī chèng peh-sìⁿ ê tiong-kan ū chhit-pah cheng-liān ê peng, kòan-liān ēng tò-chhiú-ê, ta̍k-ê ōe ēng soh hìⁿ chio̍h, chún-chún hun-hô bô chha.

17

Piān-ngá-bín lâng í-gōa, tiám-chhut Í-sek-lia̍t lâng kia̍h-to-ê, kiōng sì-cha̍p bān, lóng sī chiàn-sū.

18

Í-sek-lia̍t lâng chiū khí-lâi, kàu Pek-te̍k-lī, mn̄g Siōng-tè kóng, Góan tiong-kan chī-chūi tio̍h tāi-seng chiūⁿ khì, kap Piān-ngá-bín lâng kau-chiàn ah? Iâ-hô-hoa kóng, Iû-tāi tio̍h tāi-seng khì.

19

Í-sek-lia̍t thàu-chá khí-lâi, chat-iâⁿ kong-kek Ki-pí-a.

20

Í-sek-lia̍t lâng chiū chhut-lâi, beh kap Piān-ngá-bín lâng kau-chiàn; Í-sek-lia̍t lâng pâi-tīn tī Ki-pí-a beh kong-kek in.

21

Piān-ngá-bín lâng chiū tùi Ki-pí-a chhut-lâi, hit-jı̍t thâi-sí Í-sek-lia̍t lâng nn̄g-bān nn̄g-chheng, tó tī tōe--nih.

22

Í-sek-lia̍t lâng chiū ka-kī hùn-ióng, iû-gôan tī thâu-chı̍t-jı̍t pâi-tīn ê só͘-chāi koh pâi-tīn.

23

(Í-sek-lia̍t lâng chiūⁿ-khì, tī Iâ-hô-hoa ê bīn-chêng thî-khàu kàu ê-hng; mn̄g Iâ-hô-hoa kóng, Góan tio̍h koh chiūⁿ-khì kap góan ê hiaⁿ-tī Piān-ngá-bín lâng kau-chiàn á m̄-bián? Iâ-hô-hoa kóng, Tio̍h chiūⁿ-khì kong-kek i.)

24

Tē-jī jı̍t Í-sek-lia̍t lâng chiū chìn-chêng khì kong-kek Piān-ngá-bín lâng.

25

Piān-ngá-bín lâng iā tī tē-jī jı̍t tùi Ki-pí-a chhut-lâi, kong-kek in; koh thâi-sí Í-sek-lia̍t lâng chı̍t-bān poeh-chheng lâng, tó tī tōe--nih, lóng sī kia̍h-to-ê.

26

Í-sek-lia̍t lâng kap chèng peh-sìⁿ lóng chiūⁿ-khì kàu Pek-te̍k-lī, tī-hia chē tī Iâ-hô-hoa ê bīn-chêng thî-khàu; hit-jı̍t kìm-chia̍h kàu jı̍t-àm, koh tī Iâ-hô-hoa ê bīn-chêng hiàn sio-chè kap pêng-an-chè.

27

Hit-sî Siōng-tè ê iok-kūi tī-hia. A-lûn ê sun, Í-lī-a-sat ê kiáⁿ, Hui-nî-hap hit-sî khiā tī i ê bīn-chêng.

28

Í-sek-lia̍t lâng mn̄g Iâ-hô-hoa kóng, góa tio̍h chhut-khì kap góa ê hiaⁿ-tī Piān-ngá-bín lâng kau-chiàn mah? á-sī tio̍h soah ah? Iâ-hô-hoa kóng, Lí tio̍h chiūⁿ-khì, in-ūi bîn-á-jı̍t Góa beh chiong in kau tī lí ê chhiú.

29

Í-sek-lia̍t lâng chiū bâi-ho̍k peng tī Ki-pí-a ê sì-ûi.

30

Tē-saⁿ jı̍t Í-sek-lia̍t lâng koh chiūⁿ-khì kong-kek Piān-ngá-bín lâng, pâi-lia̍t tūi-ngó͘ tī Ki-pí-a, kap chêng nn̄g-pái chı̍t-iūⁿ.

31

Piān-ngá-bín lâng chiū chhut-khì tí-te̍k peh-sìⁿ, chiū siū ín-iú lī-khui siâⁿ; in chhin-chhiūⁿ chêng nn̄g-pái tī chhân--nih khí-chhiú thâi-sí Í-sek-lia̍t lâng iok-lio̍k saⁿ-cha̍p-ê, tī tōa-lō͘-téng; hiah ê tiâu lō͘, chı̍t-tiâu thàng Pek-te̍k-lī , chı̍t-tiâu thàng Ki-pí-a.

32

Piān-ngá-bín lâng kóng, In iû-gôan thâi-su tī lán ê bīn-chêng. Í-sek-lia̍t lâng, kóng, Lán tio̍h tô-cháu, ín-iú in lī-khui siâⁿ kàu tōa-lō͘.

33

Í-sek-lia̍t chèng-lâng lóng tùi i ê só͘-chāi khí-lâi, pâi-lia̍t tūi-ngó͘ tī Pa-le̍k-tha-má; Í-sek-lia̍t bâi-ho̍k ê peng tùi in ê só͘-chāi, chiū-sī Má-lī-ka-pa, chhiong--chhut-lâi.

34

Thong Í-sek-lia̍t ū chı̍t-bān cheng-liān ê peng, chìn-chêng lâi kong-kek Ki-pí-a, kau-chiàn ê sè-bīn chin béng-lia̍t; chóng-sī Piān-ngá-bín lâng m̄-chai chai-ē kàu lah.

35

Iâ-hô-hoa phah Piān-ngá-bín tī Í-sek-lia̍t ê bīn-chêng; hit-jı̍t Í-sek-lia̍t lâng thâi-sí Piān-ngá-bín nn̄g-bān gō͘-chheng chı̍t-pah lâng, lóng sī kia̍h-to-ê.

36

Piān-ngá-bín lâng chiah chai in ê siū-phah; in-ūi Í-sek-lia̍t lâng thè-niū Piān-ngá-bín lâng, sī ūi-tio̍h in óa-khò só͘ siat tī Ki-pí-a ê ho̍k-peng.

37

Bâi-ho̍k ê peng kín-kín chhòan-jı̍p Ki-pí-a; bâi-ho̍k ê peng chìn-chêng ēng to thâi-sí thong-siâⁿ ê lâng.

38

Í-sek-lia̍t lâng kap ho̍k-peng ū tāi-seng iok chı̍t ê kì-hō, chiū-sī hō͘ hé-hun tùi siâⁿ-lāi chhèng--khí-lâi.

39

Í-sek-lia̍t lâng tng kau-chiàn ê sî o̍at-tńg-sin; Piān-ngá-bín lâng khí-chhiú thâi-sí Í-sek-lia̍t lâng, iok-lio̍k saⁿ-cha̍p-ê, chiū kóng, In iû-gôan chhin-chhiūⁿ chêng-pái thâi-su tī lán ê bīn-chêng.

40

Tng hé-iām chhin-chhiūⁿ ian-thiāu tùi siâⁿ-tiong chhèng--chiūⁿ-khì ê sî, Piān-ngá-bín lâng o̍at-thâu khòaⁿ, khòaⁿ-kìⁿ thong-siâⁿ ê hé-hun tú-thiⁿ.

41

Í-sek-lia̍t lâng koh o̍at-tńg-sin; Piān-ngá-bín lâng chiū chin gông-ngia̍h, in-ūi khòaⁿ-kìⁿ chai-ē kàu lah.

42

Só͘-í in tī Í-sek-lia̍t lâng ê bīn-chêng o̍at-tńg-sin ǹg khòng-iá ê lō͘ tô-cháu; chóng-sī tui-jip in chin óa, tùi hiah ê siâⁿ chhut-lâi-ê in lóng thâi in tī hit tiong-kan.

43

In ûi-khùn Piān-ngá-bín lâng, tui-jip in, tī in hioh-kha ê só͘-chāi thún-ta̍h in, kàu Ki-pí-a ê tùi-bīn, ǹg jı̍t-chhut ê só͘-chāi.

44

Piān-ngá-bín lâng sí-ê, ū chı̍t-bān poeh-chheng; chiah-ê lóng sī ióng-sū; kî-û ê lâng o̍at-tńg-sin cháu-khì khòng-iá, kàu Lîm-bûn ê chio̍h-pôaⁿ.

45

Í-sek-lia̍t lâng tī tōa-lō͘--nih siu-sı̍p in gō͘-chheng lâng, chhin-chhiūⁿ khioh be̍h-seh chı̍t-iūⁿ; koh tui-jip in kàu Ki-tùn, thâi-sí in nn̄g-chheng lâng.

46

Hit-jı̍t Piān-ngá-bín lâng sí-ê, kiōng nn̄g-bān gō͘-chheng lâng; hiah-ê lóng sī kia̍h-to ê ióng-sū.

47

To̍k-to̍k la̍k-pah lâng o̍at-tńg-sin cháu--khì khòng-iá, kàu Lîm-bûn ê chio̍h-pôaⁿ, chiū tiàm tī Lîm-bûn ê chio̍h-pôaⁿ sì-ge̍h-jı̍t.

48

Í-sek-lia̍t lâng koh o̍at-tńg kong-kek Piān-ngá-bín lâng, ēng to phah-sí chiah ê siâⁿ-tiong ê lâng kap cheng-siⁿ, í-kı̍p it-chhè só͘ tú-tio̍h-ê; koh it-chhè só͘ kàu ê siâⁿ lóng ēng hé sio.