Lī-bī-kì 第 11 章 - 巴克禮全羅

1

Iâ-hô-hoa hoan-hù Mô͘-se A-lûn, tùi in kóng,

2

Lín tio̍h hoan-hù Í-sek-lia̍t lâng kóng, Tī tōe-chiūⁿ it-chhè cháu-siù-tiong thang chia̍h ê o̍ah-mı̍h, chiū-sī chiah-ê.

3

Kìⁿ-nā pun-tôe thiah-chhe, hoan-chháu ê cheng-siⁿ, lín lóng thang chia̍h i.

4

To̍k-to̍k hoan-chháu, á-sī pun-tôe ê tiong-kan m̄-thang chia̍h-ê, chiū-sī chiah-ê; lo̍k-tô, in-ūi hoan-chháu, bô pun-tôe, tùi tī lín sī bô chheng-khì.

5

Sa-hoan, in-ūi ū hoan-chháu bô pun-tôe, tùi tī lín sī bô chheng-khì.

6

Thò͘-á, in-ūi ū hoan-chháu, bô pun-tôe, tùi tī lín sī bô chheng-khì.

7

Ti, in-ūi ū pun-tôe thiah-chhe, chóng-sī bô hoan-chháu, tùi tī lín sī bô chheng-khì.

8

Hiah ê bah lín lóng m̄-thang chia̍h; sí-ê lín lóng m̄-thang bong; tùi tī lín sī bô chheng-khì.

9

Chúi-tiong lín só͘ thang chia̍h-ê chiū-sī chiah-ê; kìⁿ-nā tī chúi-nı̍h, hái-nı̍h, hô-nı̍h, ū-sı̍t ū-lân ê, lóng thang chia̍h i.

10

Kìⁿ-nā tī hái-nı̍h, hô-nı̍h, chúi-lāi it-chhè ê tōng-bu̍t, chiū-sī chúi-lāi it-chhè ê o̍ah-mı̍h, kìⁿ-nā bô-sı̍t bô-lân ê, lín lóng tio̍h lia̍h chòe khó-ò͘ⁿ.

11

Hiah-ê tùi tī lín sī khó-ò͘ⁿ-ê; lín m̄-thang chia̍h i ê bah; sí-ê iā tio̍h lia̍h-chòe khó-ò͘ⁿ.

12

Kìⁿ-nā chúi-lāi bô-sı̍t bô-lân ê, lín lóng tio̍h lia̍h-chòe khó-ò͘ⁿ.

13

Chiáu-chiah ê tiong-kan lín tio̍h lia̍h-chòe khó-ò͘ⁿ-ê, chiū-sī chiah-ê; lín m̄-thang chia̍h i, in-ūi sī khó-ò͘ⁿ, chiū-sī eng, hiau, tiau, ian,

14

sió-eng kap i ê lūi,

15

o͘-a kap i ê lūi,

16

tô-chiáu, kang ê tô-chiáu, hî-eng, chhiok-eng kap i ê lūi,

17

àm-kong-chiáu, lô͘-chî, ko͘-n̂g, niau-thâu-eng, thê-ô͘, chhàu-thâu-eng,

18

19

ho̍h, pe̍h-lēng-si kap i ê lūi, tì-kè-chiáu, kap pián-hok.

20

Kìⁿ-nā ū-sı̍t ê thâng, ēng sì-kha kiâⁿ ê, lín lóng tio̍h lia̍h chòe khó-ò͘ⁿ.

21

To̍k-to̍k ū-sı̍t ê thâng, ēng sì-kha kiâⁿ ê, kî-tiong ū kha ū thúi, ēng lâi thiàu tī tōe-nı̍h ê, lín iā thang chia̍h i.

22

Kî-tiong ū hông-thiông, má-chà, sek-sut, kap i ê lūi, chà-bēng kap i ê lūi, chiah-ê lín lóng thang chia̍h i.

23

To̍k-to̍k kìⁿ-ū sı̍t ū sì-kha teh pê ê mı̍h, lín lóng tio̍h lia̍h-chòe khó-ò͘ⁿ.

24

Tùi ē-bīn chiah-ê lóng ōe hō͘ lín bô chheng-khì, kìⁿ-nā bong-tio̍h hit ê sí ê, tek-khak bô chheng-khì kàu ê-hng sî.

25

Kìⁿ-nā the̍h-tio̍h sí-si ê chı̍t-tè-á, tio̍h sóe i ê i-ho̍k, tek-khak bô chheng-khì kàu ê-hng sî.

26

Kìⁿ-nā cheng-siⁿ ū pun-tôe bô thiah-chhe, iā bô hoan-chháu-ê, tùi tī lín sī bô chheng-khì; kìⁿ-nā bong-ê iā bô chheng-khì.

27

Kìⁿ-nā sì-kha ê siù, kî-tiong ēng kha-chiúⁿ kiâⁿ-ê, tùi tī lín sī bô chheng-khì; bong i ê sí-si-ê tek-khak bô chheng-khì kàu tī ê-hng sî.

28

The̍h i ê sí-si-ê tio̍h sóe i ê i-ho̍k; tek-khak bô chheng-khì kàu ê-hng sî; chiah-ê tùi tī lín sī bô chheng-khì.

29

Tōe-chiūⁿ teh pê ê mı̍h, tùi tī lín bô chheng-khì-ê, chiū-sī chiah-ê; iû-chhú, se̍k-chhú, sek-e̍k, kap i ê lūi,

30

piah-hó͘, liông-chú, siú-kiong, siâ-i, ián-têng.

31

Teh pê ê mı̍h ê tiong-kan, chiah-ê tùi tī lín sī bô chheng-khì-ê; tī in í-keng sí, kìⁿ-nā bong i ê, tek-khak bô chheng-khì kàu ê-hng-sî.

32

Kî-tiong ū sí-ê ka-la̍uh tī sím-mı̍h mı̍h, hit ê mîh chiū bô chheng-khì; bô-lūn sī chhâ ê khì-kū, á-sī i-ho̍k, á-sī phê, á-sī pò͘-tē, bô-lūn sī chòe sím-mı̍h lō͘-ēng ê khì-kū, tio̍h hē tī chúi-nı̍h, tek-khak bô chheng-khì kàu ê-hng, hit-sî chiah chheng-khì.

33

Nā in ū chı̍t-chiah po̍ah tī hûi-khì-lāi, hit lāi-bīn bô-lūn ū sím-mı̍h, chiū bak bô chheng-khì; lín tio̍h chiong chit ê hûi-khì phah-phòa.

34

Hit lāi-bīn it-chhè ōe chia̍h-tit ê chia̍h-mı̍h, bak-tio̍h chúi ê, chiū bô chheng-khì; koh hit-hō khì-kū-lāi ōe lim-tit-ê, iā sī bô chheng-khì.

35

Hiah ê sí-si, nā ū chı̍t-tè ka-la̍uh tī sím-mı̍h mı̍h-kiāⁿ, hit ê mı̍h-kiāⁿ chiū bô chheng-khì; bô-lūn sī hong-lô͘, á-sī chàu, chiū tio̍h phah-phòa, lóng bô chheng-khì, iā tùi tī lín sī bô chheng-khì.

36

Chóng-sī chúi-chôaⁿ á-sī chū-chı̍p chúi ê tî iû-gôan sī chheng-khì; nā kha̍p-tio̍h hit ê sí-si-ê, chiū bô chheng-khì.

37

Nā tī sí-si ū chı̍t-tè ka-la̍uh tī beh chèng ê chéng-chí, chéng-chí iû-gôan chheng-khì.

38

Nā chúi í-keng kā i phah-tâm, hit ê sí-si ū chı̍t-tè ka-la̍uh tī i ê téng-bīn, hit ê chéng-chí tùi tī lín sī bô chheng-khì.

39

Lín só͘ thang chia̍h ê cheng-siⁿ, i nā ka-kī sí; ū lâng bong-tio̍h i ê sí-si, i tek-khak bô chheng-khì kàu ê-hng-sî.

40

Ū lâng chia̍h hit ê sí ê cheng-siⁿ, tio̍h sóe i ê i-ho̍k, tek-khak bô chheng-khì kàu ê-hng-sî; the̍h sí ê cheng-siⁿ-ê iā tio̍h sóe i ê i-ho̍k; tek-khak bô chheng-khì kàu ê-hng-sî.

41

Kìⁿ-nā tī tōe-chiūⁿ teh pê ê mı̍h sī khó-ò͘ⁿ-ê, lóng m̄-thang chia̍h.

42

Kìⁿ-nā ēng pak-tó͘ kiâⁿ ê, kap ēng sì-kha kiâⁿ ê, á-sī ū chōe-chōe kha ê, chiū-sī it-chhè pê tī tōe-chiūⁿ ê, lín lóng m̄-thang chia̍h; in-ūi sī khó-ò͘ⁿ ê mı̍h.

43

Lín m̄-thang in-ūi sím-mı̍h teh pê ê mı̍h, hō͘ ka-kī chiâⁿ chòe khó-ò͘ⁿ, iā m̄-thang in-ūi chiah-ê hō͘ ka-kī bô chheng-khì, tì-kàu lín bak lâ-sâm.

44

In-ūi Góa sī Iâ-hô-hoa lín ê Siōng-tè, lín tio̍h ka-kī sèng lâi chiâⁿ-sèng; in-ūi Góa sī sèng, lín iā m̄-thang ēng tī tōe-chiūⁿ teh pê ê mı̍h lâi phah lâ-sâm ka-kī.

45

In-ūi Góa sī chhōa lín chhut Ai-kı̍p tōe ê Iâ-hô-hoa, beh chòe lín ê Siōng-tè; só͘-í lín tio̍h sèng, in-ūi Góa sī sèng.

46

Che sī cháu-siù, pe-chiáu, kap chúi-tiong ōe tín-tāng ê o̍ah-mı̍h, í-kı̍p ōe pê tī tōe-chiūⁿ ê mı̍h ê kui-lē.

47

Tio̍h hun-piat bô chheng-khì-ê kap chheng-khì-ê, ōe-chia̍h-tit ê o̍ah-mı̍h kap bōe-chia̍h-tit ê o̍ah-mı̍h.