Lī-bī-kì 第 13 章 - 巴克禮全羅

1

Iâ-hô-hoa hoan-hù Mô͘-se A-lûn kóng,

2

Lâng ê phê-hu nā chéng, kiám-chhái siⁿ-sián, á-sī siⁿ hé-pan, tī i ê phê-hu pìⁿ-chiâⁿ thái-ko ê chèng-thâu, tio̍h chhōa i kàu chè-si A-lûn, á-sī kàu i ê kiáⁿ-sun chı̍t ê chè-si ê bīn-chêng;

3

chè-si tio̍h giām phê-hu ê chèng-thâu; nā sī tio̍h chèng-thâu ê só͘-chāi hit ê mn̂g í-keng piàn-pe̍h, chèng-thâu ê khóan-sit chhim-jı̍p-khì tī phê-hu-lāi, che chiū-sī thái-ko ê chèng-thâu; chè-si tio̍h giām i, tòan i chòe bô chheng-khì.

4

Nā hé-pan tī i ê phê-hu sī pe̍h-ê, khóan-sit bô chhim-jı̍p tī phê-hu-lāi, i ê mn̂g iā bô piàn-pe̍h, chè-si chiū tio̍h chiong ū chèng-thâu ê lâng koaiⁿ-kìm chhit-jı̍t.

5

Kàu tē-chhit jı̍t chè-si tio̍h giām i; khòaⁿ ah, nā khòaⁿ-kìⁿ chèng-thâu í-keng thêng-chí, i ê chèng-thâu bô thòaⁿ jı̍p phê-hu, chè-si tio̍h koh kā i koaiⁿ-kìm chhit-jı̍t kú.

6

Kàu tē-chhit jı̍t chè-si tio̍h koh giām i; khòaⁿ ah, nā chèng-thâu khah hoa, koh chèng-thâu bô thòaⁿ-jı̍p phê-hu, chè-si tio̍h tòan i chòe chheng-khì; sī sián nā-tiāⁿ; hit-lâng chiū tio̍h sóe saⁿ-khò͘, tit-tio̍h chòe chheng-khì.

7

chóng-sī i ūi-tio̍h chheng-khì, chiong seng-khu hō͘ chè-si giām-liáu, sián nā thòaⁿ tī phê-hu, i tio̍h koh khì hō͘ chè-si giām.

8

Chè-si tio̍h giām i; khòaⁿ ah, sián nā thòaⁿ tī phê-hu; chè-si tio̍h tòan i chòe bô chheng-khì; sī thái-ko.

9

Lâng í-keng ū thái-ko ê chèng-thâu, chiū tio̍h chhōa i kìⁿ chè-si.

10

Chè-si tio̍h giām i; khòaⁿ ah, phê-hu nā ū só͘-chāi chéng pe̍h-pe̍h, tì-kàu i ê mn̂g piàn-pe̍h, tī chéng ê só͘-chāi kìⁿ chhiah-bah,

11

che sī phê-bah kū ê thái-ko; chè-si tio̍h tòan i chòe bô chheng-khì, m̄-bián koh koaiⁿ-kìm i, in-ūi i sī bô chheng-khì.

12

Thái-ko nā siⁿ-thòaⁿ tī phê-hu ê sì-ûi, tī hōan chèng-thâu ê lâng ê phê-hu khí kàu móa-móa, chiàu chè-si giām i, tùi thâu kàu kha bô chı̍t só͘-chāi bô;

13

chè-si chiū tio̍h giām i; khòaⁿ ah, thái-ko nā í-keng khí tī chôan-sin, chiū tio̍h tòan hit ê hōan-tio̍h chèng-thâu-ê chòe chheng-khì; thong seng-khu lóng piàn-pe̍h, i sī chheng-khì.

14

Chóng-sī i ê seng-khu sím-mı̍h sî kìⁿ chhiah-bah, hit-sî chiū bô chheng-khì.

15

Chè-si tio̍h giām hit ê chhiah-bah, chiū tòan i sī bô chheng-khì; chhiah-bah pún sī bô chheng-khì, sī thái-ko.

16

Chhiah-bah nā ho̍k-gôan, koh piàn-pe̍h, i tio̍h lâi kìⁿ chè-si; chè-si tio̍h giām i;

17

khòaⁿ ah, chèng-thâu nā piàn-pe̍h, chè-si chiū tio̍h tòan hit ê hōan chèng-thâu-ê chòe chheng-khì; i chiū chheng-khì.

18

Lâng nā tī phê-hu siⁿ lia̍p-á, iā ū i-hó,

19

tī siⁿ lia̍p-á ê só͘-chāi koh chéng pe̍h-pe̍h, á-sī hún-âng-sek ê hé-pan, chiū tio̍h hō͘ chè-si giām.

20

Chè-si tio̍h giām i; khòaⁿ ah, nā khóan-sit thàu-jı̍p phê-hu-lāi, i ê mn̂g iā piàn-pe̍h, chè-si tio̍h tòan i chòe bô chheng-khì, sī thái-ko ê chèng-thâu, hoat tī lia̍p-á lāi.

21

Chè-si nā giām i; khòaⁿ ah, hit téng-bīn bô ū pe̍h ê mn̂g, iā bô thàu-jı̍p tī phê-hu-lāi, koh ū khah-hoa, chè-si chiū tio̍h kā i koaiⁿ-kìm chhit-jı̍t.

22

Nā siⁿ-thòaⁿ tī phê-hu, chè-si chiū tio̍h tòan i chòe bô chheng-khì; sī hōan-tio̍h chèng-thâu.

23

Hé-pan nā tī gôan só͘-chāi thêng-chí, bô siⁿ-thòaⁿ, chiū-sī lia̍p-á ê hûn-jiah; chè-si chiū tio̍h tòan i chòe chheng-khì.

24

Lâng ê phê-bah nā hō͘ hé sio-tio̍h, sio-tio̍h ê só͘-chāi kìⁿ chhiah-bah, chiâⁿ-chòe hé-pan, á-sī hún-âng, á-sī lóng-chóng pe̍h;

25

chè-si chiū tio̍h giām i; khòaⁿ ah, hé-pan-tiong ê mn̂g nā piàn-pe̍h, khóan-sit koh chhim-jı̍p tī phê-hu-lāi, sī thái-ko tī hé-sio ê tiong-kan hoat-khí-lâi; chè-si chiū tio̍h tòan i chòe bô chheng-khì, sī thái-ko ê chèng-thâu.

26

Chóng-sī chè-si giām-liáu, khòaⁿ ah, tī hé-jiah bô ū pe̍h-mn̂g, iā bô thàu-jı̍p phê-hu-lāi, koh ū khah-hoa, chè-si chiū tio̍h kā i koaiⁿ-kìm chhit-jı̍t.

27

Kàu tē-chhit jı̍t chè-si tio̍h giām i; nā thòaⁿ tī phê-hu, chè-si chiū tio̍h tòan i chòe bô chheng-khì; sī thái-ko ê chèng-thâu.

28

Hé-pan nā tī gôan só͘-chāi thêng-chí, bô siⁿ-thòaⁿ tī phê-hu, koh ū khah-hoa, sī tùi hé sio-tio̍h lâi chéng; chè-si tio̍h tòan i chòe chheng-khì; put-kò sī hé sio-tio̍h ê hûn-jiah.

29

Bô-lūn lâm-lú, nā tī thâu-khak á-sī chhùi-chhiu ū tì chèng-thâu,

30

chè-si tio̍h giām hit ê chèng-thâu; khòaⁿ ah, khóan-sit nā chhim-jı̍p tī phê-hu-lāi, hit tiong-kan ū iù-iù n̂g ê mn̂g, chè-si chiū tio̍h tòan i chòe bô chheng-khì; che sī chhng, chiū-sī thâu-khak á-sī chhùi-chhiu-nı̍h ê thái-ko.

31

Chè-si giām hit ê chhng ê chèng-thâu, khòaⁿ ah, khóan-sit nā bô chhim-jı̍p phê-hu-lāi, hit tiong-kan iā bô o͘ ê mn̂g, chè-si chiū tio̍h chiong hōan-tio̍h chhng ê chèng-thâu ê, koaiⁿ-kìm chhit-jı̍t kú.

32

Kàu tē-chhit jı̍t chè-si tio̍h giām hit ê chèng-thâu, khòaⁿ ah, chhng nā bô thòaⁿ, hit tiong-kan iā bô n̂g ê mn̂g, chhng ê khóan-sit iā bô chhim-jı̍p phê-hu-lāi;

33

hit-lâng tio̍h thì i ê mn̂g, chóng-sī chhng m̄-thang thì; chè-si tio̍h koh koaiⁿ-kìm hit ê siⁿ-chhng-ê chhit-jı̍t kú.

34

Kàu tē-chhit jı̍t chè-si tio̍h giām hit ê chhng; khòaⁿ ah, chhng nā bô thòaⁿ tī phê-hu, khóan-sit iā bô chhim-jı̍p tī phê-hu-lāi, chè-si chiū tio̍h tòan i chòe chheng-khì; i tio̍h sóe saⁿ-khò͘, chiū chiâⁿ-chòe chheng-khì.

35

Chóng-sī i chheng-khì í-āu chhng nā thòaⁿ tī phê-hu, chè-si tio̍h giām i;

36

khòaⁿ ah, i ê chhng nā thòaⁿ tī phê-hu, chè-si m̄-bián koh chhē n̂g ê mn̂g; i sī bô chheng-khì.

37

Nā chiàu i khòaⁿ, chhng í-keng thêng-chí, hit tiong-kan nā hoat o͘ ê mn̂g, chhng kì-jiân hó, hit-lâng sī chheng-khì; chè-si chiū tio̍h tòan i chòe chheng-khì.

38

Bô-lūn lâm-lú, phê-bah nā khí hé-pan, chiū-sī pe̍h-sek ê hé-pan; chè-si tio̍h giām i;

39

khòaⁿ ah, in ê phê-bah ê hé-pan, nā sī hé-hu sek, che sī phê-hu só͘ hoat ê pe̍h-phā, hit lâng sī chheng-khì.

40

Lâng nā lut thâu-mn̂g, i ê thâu-khak sī kng-khō-khō, iáu sī chheng-khì.

41

I ê thâu-khak-chêng ê thâu-mn̂g nā lut, i sī liù-hia̍h-ê; iáu-kú sī chheng-khì.

42

Thâu-khak kng-khō-khō ê só͘-chāi, á-sī liù-hia̍h ê só͘-chāi, nā ū hún-âng-sek ê chèng-thâu, che sī thái-ko hoat tī thâu kng-khō-khō ê só͘-chāi, á-sī liù-hia̍h ê só͘-chāi.

43

Chè-si tio̍h giām i; khòaⁿ ah, i ê chèng-thâu nā tī thâu-khak kng-khō-khō ê só͘-chāi, á-sī liù-hia̍h ê só͘-chāi, ū hún-âng-sek chéng-khí-lâi, chhin-chhiūⁿ phê-bah thái-ko ê khóan-sit,

44

hit-lâng chiū-sī khí thái-ko, bô chheng-khì-ê; chè-si tek-khak tio̍h tòan i chòe bô chheng-khì; i ê chèng-thâu sī tī thâu-khak.

45

Ū thái-ko ê chèng-thâu-ê, i ê saⁿ-khò͘ tio̍h thiah-lı̍h, i ê thâu-mn̂g tio̍h phah-sòaⁿ, ng i ê chhùi ê téng-tûn, kiò kóng, Bô chheng-khì, bô chheng-khì.

46

Chèng-thâu tī i ê seng-khu ê jı̍t, i chiū bô chheng-khì; i kì-jiân sī bô chheng-khì; i tio̍h ka-kī tiàm; i ê só͘-chāi tī iâⁿ-gōa.

47

Jiám-tio̍h thái-ko chèng ê saⁿ-khò͘, bô-lūn sī iûⁿ-mn̂g ê, á-sī tōe-pò͘;

48

bô-lūn sī kiⁿ, sī hūi, sī tōe-pò͘ ê; sī iûⁿ-mn̂g ê, sī phê ê, á-sī phê chòe ê mı̍h;

49

hit ê chèng-thâu nā sī chhiⁿ á-sī âng ê sek, tī saⁿ-khò͘, tī phê, tī kiⁿ, tī hūi, á-sī tī phê chòe ê mı̍h, sī thái-ko ê chèng-thâu, tio̍h hō͘ chè-si giām.

50

Chè-si tio̍h giām hit ê chèng-thâu, chiong jiám-tio̍h chèng-thâu ê mı̍h, koaiⁿ-kìm chhit-jı̍t.

51

Kàu tē-chhit jı̍t, i tio̍h giām hit ê chèng-thâu; chèng-thâu nā thòaⁿ tī saⁿ-khò͘, tī kiⁿ, tī hūi, tī phê, chit ê phê bô-lūn chòe sím-mı̍h lō͘-ēng, hit ê chèng-thâu sī ok ê thái-ko; lóng sī bô chheng-khì.

52

Hit ê jiám-tio̍h chèng-thâu ê saⁿ-khò͘, he̍k-sī kiⁿ, sī hūi, sī iûⁿ-mn̂g, sī tōe-pò͘, á-sī phê chòe ê mı̍h, i lóng tio̍h sio-khì, in-ūi che sī ok ê thái-ko, tek-khak tī hé-tiong sio-khì.

53

Chè-si giām i; khòaⁿ ah, chèng-thâu nā bô thòaⁿ tī saⁿ-nı̍h, tī kiⁿ, tī hūi, á-sī phê-chòe ê mı̍h;

54

chè-si tio̍h hoan-hù in sóe hit ê jiám-tio̍h chèng-thâu ê mı̍h, koh koaiⁿ-kìm chhit-jı̍t.

55

Chèng-thâu sóe liáu-āu chè-si tio̍h giām i; khòaⁿ ah, chèng-thâu nā bô piàn-sek, chèng-thâu nā bô koh thòaⁿ, hit-ê chiū bô chheng-khì; sī ok-to̍k ê chèng-thâu; bô-lūn bīn pháiⁿ, lí pháiⁿ, lóng tio̍h ēng hé sio.

56

Sóe liáu-āu, chè-si giām i; khòaⁿ ah, nā hit ê chèng-thâu khah hoa, i chiū tio̍h tùi saⁿ, á-sī phê, á-sī kiⁿ, á-sī hūi, kā i thiah-khí-lâi.

57

Nā sī iáu-kú hoat-hiān tī saⁿ-nı̍h, á-sī kiⁿ, á-sī hūi, á-sī phê-chòe ê mı̍h, che sī chèng-thâu teh hoat; tio̍h ēng hé sio hit ê jiám-tio̍h chèng-thâu ê mı̍h.

58

Lí só͘ sóe ê saⁿ, he̍k-sī kiⁿ, he̍k-sī hūi, he̍k-sī phê-chòe ê mı̍h, nā chèng-thâu í-keng lī-khui, tio̍h koh-chài sóe, chiū chheng-khì.

59

Che chiū-sī thái-ko chèng-thâu ê kui-lē, bô-lūn sī tī iûⁿ-mn̂g-saⁿ, tōe-pò͘-saⁿ, tī kiⁿ, tī hūi, kap phê-chòe ê mı̍h, thang tòan-chòe chheng-khì, á-sī tòan-chòe bô chheng-khì.