Lī-bī-kì 第 19 章 - 巴克禮全羅

1

Iâ-hô-hoa hoan-hù Mô͘-se kóng,

2

Lí tio̍h hoan-hù Í-sek-lia̍t chôan-hōe tùi in kóng, Lín tio̍h chòe-sèng, in-ūi Góa Iâ-hô-hoa lín ê Siōng-tè sī sèng.

3

Lín ta̍k-lâng lóng tio̍h hàu-kèng i ê lāu-bú, i ê lāu-pē; iā tio̍h siú Góa hiah ê an-hioh; Góa sī Iâ-hô-hoa lín ê Siōng-tè.

4

Lín m̄-thang phian-ǹg ngó͘-siōng, iā m̄-thang ūi ka-kī chù-chō siōng-tè; Góa sī Iâ-hô-hoa lín ê Siōng-tè.

5

Lín hiàn siā-un-chè hō͘ Iâ-hô-hoa ê sî tio̍h hiàn thang tit-tio̍h chiap-la̍p ê.

6

Tī hiàn ê jı̍t á-sī kè-jı̍t chia̍h i; nā ū chhun kàu tē-saⁿ jı̍t-ê tio̍h ēng hé sio i.

7

Tē-saⁿ jı̍t nā koh chia̍h-tio̍h, che sī thang iàm-ò͘ⁿ-ê; bōe tit-tio̍h chiap-la̍p.

8

Hōan-nā chia̍h i ê lâng, tek-khak tio̍h tam-tng i ê chōe-kòa; in-ūi i siat-to̍k Iâ-hô-hoa ê sèng-mı̍h; hit-lâng tek-khak tùi i ê peh-sìⁿ-tiong siū chián-tû.

9

Lín siu-koah chhân ê ngó͘-kok, chhân ê kak-thâu m̄-thang koah kàu chīn, ka-la̍uh-ê iā m̄-thang khioh.

10

Phû-tô-hn̂g ké-chí m̄-thang bán liáu-liáu, iā m̄-thang khioh phû-tô só͘ lak ê ké-chí; tio̍h lâu hō͘ sòng-hiong lâng kap chhut-gōa ê; Góa sī Iâ-hô-hoa lín ê Siōng-tè.

11

Lín m̄-thang thau-the̍h; m̄-thang khi-phiàn; tāi-ke m̄-thang kóng pe̍h-chha̍t.

12

Lín m̄-thang kí Góa ê miâ lâm-sám chiù-chōa, lâi siat-to̍k lí ê Siōng-tè ê miâ; Góa chiū-sī Iâ-hô-hoa.

13

M̄-thang khi-hū lí ê chhù-piⁿ, iā m̄-thang chhiúⁿ-the̍h i ê mı̍h; chòe-kang lâng ê kang-chîⁿ m̄-thang lâu tī lí hia kui-mî kàu thiⁿ-kng.

14

M̄-thang mē chhàu-hī-lâng-ê, iā m̄-thang hē that-gāi ê mı̍h tī chhiⁿ-mî lâng ê bīn-chêng; tio̍h kèng-ùi lí ê Siōng-tè; Góa chiū-sī Iâ-hô-hoa.

15

Lín sím-phòaⁿ m̄-thang bô kong-tō; m̄-thang phian-thán sòng-hiong lâng, iā m̄-thang khòaⁿ-tāng ū sè-le̍k ê lâng; tio̍h chiàu kong-tō sím-phòaⁿ lí ê chhù-piⁿ.

16

M̄-thang tī lí ê peh-sìⁿ ê tiong-kan sì-kòe kiâⁿ húi-pòng lâng; iā m̄-thang chòe kan-chèng ài hāi-sí lí ê chhù-piⁿ; Góa chiū-sī Iâ-hô-hoa.

17

Lí m̄-thang sim-lāi òan-hūn lí ê hiaⁿ-tī; tek-khak tio̍h chek-pī lí ê chhù-piⁿ, bián-tit ūi-tio̍h i tam-tng chōe.

18

M̄-thang pò-siû, iā m̄-thang bâi-òan lí pún-kok ê peh-sìⁿ; tio̍h thiàⁿ chhù-piⁿ chhin-chhiūⁿ ka-kī; Góa chiū-sī Iâ-hô-hoa.

19

Lín tio̍h siú Góa ê lu̍t-lē. M̄-thang hō͘ lín ê cheng-siⁿ kap bô tâng-lūi-ê kau-ha̍p; m̄-thang ēng nn̄g-iūⁿ ê chéng-chí chham-chhap iā tī lí ê hn̂g-tōe; m̄-thang ēng nn̄g-iūⁿ ê liāu chham-chhap chòe-saⁿ, chhēng tī lí ê seng-khu.

20

Lú-pī chòe-lâng tiāⁿ-tio̍h, iáu-bē siū-sio̍k, bē tit-tio̍h tháu-pàng, lâng nā kap i kiâⁿ-îm, nn̄g-lâng tio̍h siū hêng-ho̍at; chóng-sī m̄-thang hō͘ i sí, in-ūi lú-pī iáu-bē tit-tio̍h chū-iû.

21

Hit ê ta-po͘-lâng tio̍h ēng pó͘-kè-sit ê chè, chiū-sī chı̍t chiah mî-iûⁿ-káng, khan kàu hōe-bō͘ mn̂g-kháu, Iâ-hô-hoa ê bīn-chêng, chòe pó͘-kè-sit-chè ê chè.

22

Chè-si tio̍h ēng pó͘-kè-sit-chè ê iûⁿ-káng, tī Iâ-hô-hoa ê bīn-chêng sio̍k i só͘ hōan ê chōe; i só͘ hōan ê chōe chiū tit-tio̍h sià-bián.

23

Lín kàu Ka-lâm tōe ê sî, chai-chèng ta̍k-iūⁿ ōe-chia̍h-tit ê ké-chí-chhiū, lín tio̍h khòaⁿ hit ê ké-chí chòe chhin-chhiūⁿ bē siū kat-lé-ê chı̍t-iūⁿ; saⁿ-nî ê kú, lín tio̍h khòaⁿ hiah-ê chhin-chhiūⁿ bē siū kat-lé-ê, m̄-thang chia̍h in.

24

Kàu tē-sì nî só͘ kiat ê ké-chí lóng tio̍h chòe sèng, ēng i lâi o-ló Iâ-hô-hoa.

25

Kàu tē-gō͘ nî lín tio̍h chia̍h i ê ké-chí, thang hō͘ i kā lín kiat khah chōe ké-chí; Góa sī Iâ-hô-hoa lín ê Siōng-tè.

26

Lín m̄-thang chia̍h kâⁿ huih ê mı̍h; m̄-thang ēng hoat-su̍t, iā m̄-thang chiam-pok.

27

Thâu-khak ê chiu-ûi m̄-thang thì, chhùi-chhiu ê chiu-ûi iā m̄-thang khun.

28

Lín m̄-thang ūi sí-lâng koah ka-kī ê bah, iā m̄-thang chhiah kì-hō tī seng-khu; Góa sī Iâ-hô-hoa.

29

M̄-thang lêng-jio̍k lí ê cha-bó͘-kiáⁿ, hō͘ i chòe chhiong-ki, kiaⁿ-liáu tōe-chiūⁿ choan-choan ǹg îm-lōan, tōe-chiūⁿ móa-móa tōa-pháiⁿ.

30

Lín tio̍h siú Góa hiah ê an-hioh, kèng Góa ê sèng-só͘; Góa sī Iâ-hô-hoa.

31

M̄-thang phian-ǹg hiah ê kúi chiūⁿ-sin ê, kap kiâⁿ siâ-su̍t-ê, iā m̄-thang khì mn̄g in, tì-kàu hō͘ in phah lâ-sâm; Góa sī Iâ-hô-hoa lín ê Siōng-tè.

32

Tī pe̍h-thâu-mn̂g ê lâng ê bīn-chêng, lí tio̍h khí-lâi khiā; iā tio̍h chun-kèng lāu-lâng ê bīn; koh tio̍h kèng-ùi lí ê Siōng-tè; Góa sī Iâ-hô-hoa.

33

Nā ū chhut-gōa lâng kià-kha tī lín ê tōe-hng, kap lín khiā-khí, chiū m̄-thang khi-hū in.

34

Kap lín khiā-khí ê chhut-gōa lâng, lín tio̍h khòaⁿ in chhin-chhiūⁿ pún-tōe lâng chı̍t-iūⁿ; iā tio̍h thiàⁿ in chhin-chhiūⁿ pún-sin; in-ūi lín iā bat tī Ai-kı̍p tōe chòe chhut-gōa lâng; Góa sī Iâ-hô-hoa lín ê Siōng-tè.

35

Lín sím-phòaⁿ m̄-thang bô kong-tō; tī chhioh, tī chhìn, tī táu, lóng tio̍h kong-tō.

36

Tio̍h ēng kong-tō ê phêng, kong-tō ê tô-chí, kong-tō ê i-hoat, kong-tō ê him; Góa sī Iâ-hô-hoa lín ê Siōng-tè, bat chhōa lín chhut Ai-kı̍p tōe ê.

37

Lín tio̍h siú Góa it-chhè ê lu̍t-lē, kap Góa it-chhè ê hoat-tō͘, lâi kiâⁿ i; Góa sī Iâ-hô-hoa.