Lī-bī-kì 第 9 章 - 巴克禮全羅

1

Kàu tē-poeh jı̍t, Mô͘-se tiàu A-lûn kap i ê kiáⁿ, í-kı̍p Í-sek-lia̍t hiah ê tiúⁿ-ló lâi.

2

Tùi A-lûn kóng, Lí tio̍h chhú chı̍t-chiah sòe chiah gû-káng-á, chòe sio̍k-chōe-chè, chı̍t chiah mî-iûⁿ-káng chòe sio-chè, tio̍h bô hâ-chhû-ê, hiàn tī Iâ-hô-hoa ê bīn-chêng.

3

Lí iā tio̍h hoan-hù Í-sek-lia̍t lâng kóng, Lín tio̍h chhú chı̍t chiah soaⁿ-iûⁿ-káng chòe sio̍k-chōe-chè; koh chhú chı̍t chiah gû-á-kiáⁿ, kap chı̍t chiah mî-iûⁿ-á, lóng tio̍h bē-móa-nî, koh tio̍h bô hâ-chhû ê, chòe sio-chè.

4

Koh chhú chı̍t chiah gû-káng, chı̍t chiah mî-iûⁿ-káng, chòe siā-un-chè, hiàn tī Iâ-hô-hoa ê bīn-chêng, kap chhú tiau-hô iû ê sò͘-chè; in-ūi kin-á-jı̍t Iâ-hô-hoa beh hián-hiān hō͘ lín khòaⁿ.

5

In chiū chiàu Mô͘-se só͘ bēng-lēng-ê tòa kàu hōe-bō͘ chêng; hōe-chiòng lóng kūn-óa lâi khiā tī Iâ-hô-hoa ê bīn-chêng.

6

Mô͘-se kóng, Che sī Iâ-hô-hoa bēng-lēng lín só͘ tio̍h kiâⁿ ê; Iâ-hô-hoa ê êng-kng chiū beh hián-hiān hō͘ lín khòaⁿ.

7

Mô͘-se tùi A-lûn kóng, Lí tio̍h kàu tôaⁿ-chêng, hiàn lí ê sio̍k-chōe-chè, kap lí ê sio-chè, ūi pún-sin kap peh-sìⁿ sio̍k-chōe; koh hiàn peh-sìⁿ ê lé-mı̍h, thòe in sio̍k-chōe, lóng chiàu Iâ-hô-hoa só͘ bēng-lēng-ê.

8

A-lûn chiū kàu tôaⁿ-chêng, thâi hit chiah gû-á-kiáⁿ, ūi pún-sin chòe sio̍k-chōe-chè ê.

9

A-lûn chiah ê kiáⁿ phâng hit ê huih hō͘ i; i chiū ēng chńg-thâu-á ùn huih, boah tī tôaⁿ-téng hiah ê kak; koh ēng huih tò tī tôaⁿ-kha-nı̍h.

10

To̍k-to̍k sio̍k-chōe-chè ê iû kap io-chí, kap koaⁿ-nı̍h ê bāng-se, i lóng sio tī tôaⁿ-téng; chiàu Iâ-hô-hoa só͘ bēng-lēng Mô͘-se ê.

11

I koh ēng hé chiong bah kap phê sio tī iâⁿ-gōa.

12

Chiū thâi sio-chè ê cheng-siⁿ; A-lûn chiah ê kiáⁿ phâng huih hō͘ i, i chiū hiù tī tôaⁿ-téng ê chiu-ûi.

13

In koh ēng sio-chè ê bah, chı̍t-tè chı̍t-tè liân thâu the̍h hō͘ i; i lóng sio tī tôaⁿ-téng.

14

I koh sóe chōng-hú kap thúi, sio tī tôaⁿ-téng sio-chè ê téng-bīn.

15

I tòa peh-sìⁿ ê lé-mı̍h, chiong hit-chiah chòe peh-sìⁿ sio̍k-chōe-chè ê soaⁿ-iûⁿ-káng thâi i, ūi-tio̍h chōe lâi hiàn, kap khí-thâu-ê tâng chı̍t-iūⁿ.

16

Iā tòa sio-chè chiàu lē lâi hiàn.

17

I koh tòa sò͘-chè, tùi hit tiong-kan mi chı̍t-pé; che sī tī chá-khí-sî ê sio-chè í-gōa.

18

Koh thâi gû-káng kap mî-iûⁿ-káng chòe peh-sìⁿ ê siā-un-chè; A-lûn chiah ê kiáⁿ phâng huih hō͘ i, i chiū hiù tī tôaⁿ-téng ê chiu-ûi.

19

Koh the̍h gû-káng ê iû; kap mî-iûⁿ-káng pûi ê bé, í-kı̍p khàm chōng-hú ê iû, kap io-chí, kap koaⁿ-nı̍h ê bāng-se.

20

In chiong chiah ê iû hē tī hiah ê heng ê téng-bīn, i chiū chiong iû sio tī tôaⁿ-téng.

21

Chiah ê heng kap chiàⁿ-thúi, A-lûn ēng i chòe iô-chè, tī Iâ-hô-hoa ê bīn-chêng iô i; lóng sī chiàu Mô͘-se só͘ bēng-lēng-ê.

22

A-lûn ǹg peh-sìⁿ kia̍h-khí chhiú, kā in chiok-hok; i í-keng hiàn sio̍k-chōe-chè, sio-chè, siā-un-chè, chiū lo̍h-lâi.

23

Mô͘-se A-lûn chìn-jı̍p hōe-bō͘, koh chhut-lâi kā peh-sìⁿ chiok-hok; Iâ-hô-hoa ê êng-kng chiū hián-hiān hō͘ chèng peh-sìⁿ khòaⁿ-kìⁿ.

24

Ū hé tùi Iâ-hô-hoa ê bīn-chêng chhut-lâi, sio tôaⁿ-téng ê sio-chè, kap iû; chèng peh-sìⁿ khòaⁿ-kìⁿ, chiū chhut tōa hoaⁿ-hí ê siaⁿ, phak tī tōe-nı̍h.