Lō͘-ka 第 11 章 - 巴克禮全羅

1

Iâ-so͘ tī chı̍t só͘-chāi kî-tó, í-keng soah, I ê ha̍k-seng chı̍t lâng tùi I kóng, Chú ah, kà-sī góan kî-tó, chhin-chhiūⁿ Iok-hān iā bat kà-sī i ê ha̍k-seng.

2

I chiū kā in kóng, Lín kî-tó ê sî tio̍h kóng, Pē ah, gōan lí ê miâ sèng; lí ê kok lîm-kàu;

3

góan ê jı̍t-sı̍t jı̍t-jı̍t hō͘ góan;

4

sià-bián góan ê chōe, in-ūi góan iā sià-bián ko͘-hū góan ê lâng; bo̍h-tit chhōa góan jı̍p tī chhì.

5

Koh tùi in kóng, Lín sím-mı̍h lâng ū pêng-iú, lí pòaⁿ-mî khì chhē i, kā i kóng, Pêng-iú ah, the̍h saⁿ ê piáⁿ chioh góa:

6

in-ūi góa ū pêng-iú tùi lō͘-nı̍h lâi chhē góa, góa bô mı̍h thang chhiáⁿ i.

7

I tùi lāi-bīn ìn kóng, Bo̍h-tit chô-chak góa; mn̂g í-keng koaiⁿ, gín-ná kap góa tī chhn̂g-nı̍h; góa bōe tit thang khí-lâi the̍h hō͘ lí.

8

Góa kā lí kóng, sui-jiân bô ūi-tio̍h i chòe pêng-iú khí-lâi the̍h hō͘ i, iáu-kú ūi-tio̍h i ê pek-chhiat beh khí-lâi, chiàu i só͘ khiàm-ēng ê hō͘ i.

9

Góa koh kā lín kóng, Kiû chiū hō͘ lín; chhē chiū tú-tio̍h; phah mn̂g chiū kā lín khui.

10

In-ūi kìⁿ-nā kiû ê tit-tio̍h, chhē ê tú-tio̍h; phah mn̂g ê kā in khui.

11

Lín tá-lo̍h chı̍t-ê chòe pē ê, ū kiáⁿ lâi thó piáⁿ, kiám beh chiong chio̍h-thâu hō͘ i mah? Á-sī beh hî, kiám beh chiong chôa chún-chòe hî hō͘ i mah?

12

Á-sī thó nn̄g, kiám beh chiong giat-á-thâng hō͘ i mah?

13

Lín chiah-ê sui-jiân pháiⁿ, iáu-kú ōe hiáu-tit ēng hó mı̍h hō͘ lín ê kiáⁿ-jî, hô-hòng lín tī thiⁿ-nı̍h ê Pē kiám bô ēng Sèng Sîn lâi hō͘ kiû I ê lâng mah?

14

Iâ-so͘ kóaⁿ chı̍t ê é-káu kúi; í-keng chhut, é-káu ê chiū kóng ōe; chèng lâng kî-kòai.

15

Lāi-tiong ū kúi-nā lâng kóng, I kóaⁿ kúi sī khò kúi-ông Pia̍t-se-pok.

16

Koh ū lâng chhì I, tùi I kiû tùi thiⁿ lâi ê sîn-jiah.

17

Iâ-so͘ chai in ê ì-sù chiū kā in kóng, Hōan-nā kok ka-kī cheng-piàⁿ, ōe tì-kàu pha-hng, chhù chı̍t keng chı̍t keng tó-hōai;

18

nā Sat-tàn ka-kī cheng-piàⁿ, i ê kok thài-thó khiā ōe tiâu? in-ūi lín kóng góa khò Pia̍t-se-pok kóaⁿ kúi.

19

Siat-sú góa khò Pia̍t-se-pok kóaⁿ kúi, chiū lín ê chú-tē kóaⁿ kúi, óa-khò chī-chūi ah? Án-ni in beh gí-tòan lín.

20

To̍k-to̍k góa nā khò Siōng-tè ê chhiú kóaⁿ kúi, chiū Siōng-tè ê kok í-keng kàu tī lín.

21

Béng lâng chhēng khoe-kah kia̍h ke-si kò͘-siú i ê chhù, i só͘ ū ê chiū an-ún.

22

Chóng-sī pí i khah béng ê kàu lâi iâⁿ i, chiū chhiúⁿ i só͘ óa-khò chôan-hù ê chiàn-khì, lâi pun i ê mı̍h-kiāⁿ.

23

Bô tâng góa ê chiū-sī tùi-te̍k góa; bô kap góa siu-khioh ê chiū-sī teh phah-sòaⁿ.

24

Siâ-sîn í-keng lī-khui lâng, keng-kè bô chúi ê tōe, kiû an-hioh; bô tit-tio̍h, chiū kóng, Góa beh tò-khì só͘ chhut-lâi ê chhù.

25

Kàu tè, chiū khòaⁿ-kìⁿ piàⁿ-sàu chôe-chéng;

26

chiū khì koh tòa chhit ê sîn pí ka-kī khah pháiⁿ, jı̍p-khì khiā-khí. Hit lâng lō͘-bé ê kéng-hóng pí khí-thâu khah chhám.

27

I kóng chiah ê ōe ê sî, chèng lâng tiong ū chı̍t ê hū-jîn-lâng tōa siaⁿ kā I kóng, Siⁿ lí ê pak-tó͘, hō͘ lí suh ê lin-thâu ū hok-khì ah.

28

Nā-sī Iâ-so͘ kóng, M̄ ta̍t-tio̍h thiaⁿ Siōng-tè ê tō-lí lâi siú ê khah ū hok-khì.

29

Lâng chū-chı̍p ná chōe, Iâ-so͘ chiū kóng, Chit sè-tāi sī pháiⁿ ê sè-tāi, in kiû sîn-jiah, nā-sī tû Iok-ná ê sîn-jiah í-gōa, bô beh sîn-jiah hō͘ i.

30

In-ūi Iok-ná chiâⁿ-chòe sîn-jiah lâi hō͘ Nî-nî-bî lâng, chhin-chhiūⁿ án-ni Jîn-chú iā beh chiâⁿ-chòe sîn-jiah lâi hō͘ chit sè-tāi.

31

Lâm-hng ê lú-ông tng sím-phòaⁿ ê sî, beh kap chit sè-tāi ê lâng saⁿ-kap khí-lâi, sòa gí-tiāⁿ chit sè-tāi ê chōe; in-ūi i tùi tōe ê ke̍k-thâu lâi thiaⁿ Só͘-lô-bûn tì-sek ê ōe, hô-hòng tī chia ū pí Só͘-lô-bûn khah tōa ê.

32

Nî-nî-bî lâng tng sím-phòaⁿ ê sî beh kap chit sè-tāi ê lâng saⁿ-kap khiā-khí-lâi, sòa gí-tiāⁿ chit sè-tāi ê chōe; in-ūi in tùi Iok-ná só͘ thôan ê lâi hóan-hóe, hô-hòng tī chia ū pí Iok-ná khah tōa ê.

33

Bô lâng tiám teng hē tī ún-ba̍t ê só͘-chāi, á-sī tī táu ē; chiū-sī hē tī teng-tâi téng, hō͘ jı̍p-lâi ê lâng khòaⁿ-kìⁿ hit ê kng.

34

Seng-khu ê teng chiū-sī lí ê ba̍k-chiu; lí ê ba̍k-chiu nā kim, chiū thong seng-khu iā kng; lí ê ba̍k-chiu nā hoe, chiū seng-khu iā àm.

35

Só͘-í tio̍h kín-sīn kiaⁿ-liáu lí lāi-bīn ê kng sī àm.

36

Siat-sú lí thong seng-khu lóng kng, bô chı̍t jiah àm, chiū beh ôan-chôan kng, chhin-chhiūⁿ teng ê kng nà-nà teh chiò lí.

37

Kóng ōe ê sî ū Hoat-lī-sài lâng chhiáⁿ i saⁿ-kap chia̍h. Iâ-so͘ chiū jı̍p-khì chē.

38

Hit ê Hoat-lī-sài lâng khòaⁿ-kìⁿ I bē sóe lâi chia̍h, chiū kî-kòai.

39

Chú chiū tùi i kóng, Taⁿ lín Hoat-lī-sài lâng chheng-khì poe kap pôaⁿ ê gōa-bīn; nā-sī lín lāi-bīn chiū ū chhiúⁿ-kiap kap ok-to̍k móa-móa.

40

Lín gōng lâng ah, chhòng-chō gōa-bīn ê kiám bô iā chhòng-chō lāi-bīn mah?

41

Chóng-sī tio̍h chiong chiah ê lāi-bīn ê mı̍h chín-chè lâng, chiū ta̍k hāng mı̍h chāi lín lóng chheng-khì.

42

Lín Hoat-lī-sài lâng ū chai-ē ah! in-ūi lín chiong po̍k-hô, ûn-hiong, kap ta̍k iūⁿ ê chhài-soe cha̍p hūn thiu chı̍t hūn, nā-sī kong-gī kap thiàⁿ Siōng-tè ê sū chiū pàng bô iàu-kín; chóng-sī chiah-ê sī eng-kai tio̍h kiâⁿ ê, hiah-ê iā m̄-thang pàng-sak.

43

Lín Hoat-lī-sài lâng ū chai-ē ah! in-ūi lín ài hōe-tn̂g lāi chē kôaiⁿ ūi, koe-chhī-nı̍h hō͘ lâng chhéng-an.

44

Lín ū chai-ē ah! in-ūi lín chhin-chhiūⁿ ún-ba̍t ê bōng, lâng kiâⁿ tī hit téng-bīn m̄ chai.

45

Ū chı̍t ê kà lu̍t-hoat ê sian-siⁿ ìn I kóng, Sian-siⁿ, lí kóng chiah ê ōe iā pō͘-jio̍k-tio̍h góan.

46

Nā-sī I kóng, Lín kà lu̍t-hoat ê sian-siⁿ iā ū chai-ē ah! in-ūi lín chiong oh-tit taⁿ ê tàⁿ hō͘ lâng taⁿ; nā-sī lín pún-sin bô ēng chı̍t ki chńg-thâu-á lâi bong hiah ê tàⁿ.

47

Lín ū chai-ē ah! in-ūi lín chhòng sian-ti lâng ê bōng, iā lín ê chó͘ bat hāi-sí in.

48

Án-ni, lín ê chó͘ só͘ chòe ê, lín chòe kan-chèng, koh hoaⁿ-hí i; in-ūi in hāi-sí in, iā lín chhòng in ê bōng.

49

Só͘-í Siōng-tè ê Tì-hūi ū kóng, Góa beh chhe sian-ti kap sù-tô͘ chiū-kūn in, kî-tiong ū-ê in beh hāi-sí i, ū-ê in beh khún-tio̍k i;

50

tì-kàu tùi chhòng-chō sè-kan í-lâi só͘ lâu chèng sian-ti ê huih lóng beh kā chit sè-tāi thó;

51

chiū-sī tùi A-pek ê huih kàu Sat-ka-lī-a sí tī tiān kap tôaⁿ ê tiong-kan ê huih, sı̍t-chāi ah, góa kā lín kóng, lóng beh tùi chit sè-tāi thó.

52

Lín kà lu̍t-hoat ê sian-siⁿ ū chai-ē ah! in-ūi lín chiong chai-bat ê só-sî kia̍h-khì; lín ka-kī m̄ jı̍p, teh-beh jı̍p ê lâng lín chiū chó͘-tòng i.

53

Iâ-so͘ tùi hia chhut-lâi ê sî, keng-ha̍k-sū kap Hoat-lī-sài lâng chhut-la̍t pek I, kek I kóng khah chōe ōe;

54

tng-tán I, ài lia̍h I ê ōe-phāng.