Má-la̍h-ki 第 4 章 - 巴克禮全羅

1

Bān-kun ê Iâ-hô-hoa kóng, Khòaⁿ ah, hit-jı̍t beh kàu, chhin-chhiūⁿ hé-lô͘ teh to̍h; kìⁿ-nā kiau-ngō͘--ê kap kiâⁿ-pháiⁿ--ê, beh chhin-chhiūⁿ chháu-iù; hit-ê beh lâi ê jı̍t beh it-chīn sio i, kun kap ki lóng bô lâu-teh.

2

To̍k-to̍k lín kèng-ùi Góa ê miâ ê lâng, beh ū kong-gī ê jı̍t khí-lâi chiò lín; i ê sı̍t ū i-tī ê kong-hāu; lín beh chhut-lâi tiô-thiàu, chhin-chhiūⁿ tiâu-lāi pûi ê gû-á.

3

Tī Góa só͘ tiāⁿ-tio̍h ê jı̍t, lín beh thún-ta̍h pháiⁿ-lâng, in-ūi in beh chòe hé-hu tī lín ê kha-ē. Che sī bān-kun ê Iâ-hô-hoa kóng--ê.

4

Lín tio̍h kì-tit Góa ê lô͘-po̍k Mô͘-se ê lu̍t-hoat, chiū-sī Góa tī Hô-lia̍t ūi-tio̍h Í-sek-lia̍t chèng-lâng só͘ hoan-hù i--ê, chiū-sī lu̍t-lē kap hoat-tō͘.

5

Khòaⁿ ah, Iâ-hô-hoa tōa koh thang kiaⁿ ê jı̍t bē kàu ê tāi-seng, Góa beh chhe sian-ti Í-lī-a kàu lín hia;

6

i beh hō͘ chòe lāu-pē-ê ê sim o̍at-tńg ǹg i ê kiáⁿ, chòe kiáⁿ--ê ê sim, o̍at-tńg ǹg i ê lāu-pē, bián-tit Góa lâi chiù-chó͘ chit ê tōe.