Má-thài 第 11 章 - 巴克禮全羅

1

Iâ-so͘ hoan-hù I cha̍p-jī ê ha̍k-seng bêng-pe̍k, chiū lī-khui hia, beh tī in hiah ê siâⁿ kà-sī lâng kap thôan-tō.

2

Iok-hān tī kaⁿ-nı̍h thiaⁿ-kìⁿ Ki-tok só͘ kiâⁿ ê sū; chiū chhe ha̍k-seng mn̄g I kóng,

3

Só͘ beh lâi ê, sī lí mah? á-sī góan tio̍h ǹg-bāng pa̍t lâng ah?

4

Iâ-so͘ ìn kóng, Lín tio̍h khì, chiong lín só͘ thiaⁿ-kìⁿ só͘ khòaⁿ-kìⁿ ê, kā Iok-hān kóng;

5

chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-o̍ah, sòng-hiong lâng tit-tio̍h thiaⁿ hok-im.

6

Kìⁿ-nā bô tī góa lâi tio̍h-tak ê, ū hok-khì.

7

In khì ê sî, Iâ-so͘ chiah thê-khí Iok-hān, kā chèng lâng kóng, Lín chêng chhut-khì khòng-iá, beh khòaⁿ sím-mı̍h? Sī lô͘-tek hō͘ hong chhe tín-tāng mah?

8

Lín chhut-khì ài khòaⁿ sím-mı̍h? Sī lâng chhēng iù-nńg ê i-chiûⁿ mah? Lí khòaⁿ, chhēng iù-nńg ê sī tī ông-kiong.

9

Nā-sī án-ni lín chhut-khì beh siáⁿ-sū? Sī beh khòaⁿ sian-ti mah? Sī lah. Góa kā lín kóng, i sī iáu khah iâⁿ-kè sian-ti.

10

Chit lâng chiū-sī keng-nı̍h só͘ chí ê, kóng, Góa chhe góa ê sù-chiá tī lí ê bīn-chêng; I beh tī lí ê thâu-chêng pī-pān lí ê lō͘.

11

Góa sı̍t-chāi kā lín kóng, Hū-jîn-lâng só͘ siⁿ ê, chiông-tiong bē ū heng-khí khah tōa tī kiâⁿ sóe-lé ê Iok-hān; chóng-sī tī thian-kok ê bî-sòe ê, iáu khah tōa i.

12

Tùi kiâⁿ sóe-lé Iok-hān ê sî-jı̍t kàu taⁿ, thian-kok hō͘ lâng kiông-kiông chhú, kiông ê lâng ēng la̍t chhú i.

13

In-ūi chèng sian-ti kap lu̍t-hoat ū chhàm-gú kàu Iok-hān ê sî.

14

Lín nā kam-gōan sêng-siū, chit lâng chiū-sī teh-beh lâi ê Í-lī-a.

15

Ū hī-khang thang thiaⁿ ê, tio̍h thiaⁿ.

16

Chit sè-tāi góa beh ēng sím-mı̍h lâi pí-phēng i? Sī chhin-chhiūⁿ gín-ná chē tī koe-chhī-nı̍h, lâi kiò in ê tâng-phōaⁿ kóng,

17

Góan tùi lín pûn ta̍t-á, lín bô thiàu-bú; góan bat pi-ai, lín bô tûi heng.

18

In-ūi Iok-hān lâi, bô chia̍h bô lim; lâng chiū kóng, I hōan-tio̍h kúi.

19

Jîn-chú lâi ia̍h chia̍h ia̍h lim; lâng chiū kóng, I sī tham-chia̍h hò͘ⁿ-chiú ê lâng, thiu-hiòng kap pháiⁿ lâng ê pêng-iú. Nā-sī Tì-hūi tùi i ê só͘ kiâⁿ hián-bêng i sī tio̍h.

20

Iâ-so͘ bat tī hiah ê siâⁿ kiâⁿ chōe-chōe kôan-lêng, in-ūi in lóng bô hóan-hóe, hit sî chiah chek-pī in kóng,

21

Ko-lia̍p-sìn ah, lí ū chai-ē! Pek-sài-tāi ah, lí ū chai-ē! in-ūi tī lín tiong-kan só͘ kiâⁿ chiah ê kôan-lêng, nā ū kiâⁿ tī Chhui-lô kap Se-tùn, in chiū chá-chá chhēng môa saⁿ sám hé-hu lâi hóan-hóe.

22

Nā-sī góa kā lín kóng, tng sím-phòaⁿ ê jı̍t, Chhui-lô kap Se-tùn pí lín iáu khah khòai tam-tng.

23

Ka-pek-lông ah, lí kiám ōe tit-tio̍h kú-khí kàu thiⁿ mah? lí beh tūi-lo̍h im-hú; in-ūi tī lí ê tiong-kan só͘ kiâⁿ chiah ê kôan-lêng, nā ū kiâⁿ tī Só͘-to-má, chiū kàu kin-á-jı̍t i iáu tī-teh.

24

Nā-sī góa kā lín kóng, tng sím-phòaⁿ ê jı̍t, Só͘-to-má ê tōe-hng pí lí khah khòai tam-tng.

25

Tng hit sî Iâ-so͘ ìn kóng, Pē ah, thiⁿ tōe ê Chú, góa o-ló lí, in-ūi lí chiong chiah ê sū, tùi tì-hūi chhang-miâ ê ū ún-ba̍t i, tùi sòe-kiáⁿ ū hián-bêng i;

26

Pē ah, sī lah; in-ūi lí khòaⁿ án-ni chòe hoaⁿ-hí.

27

Bān-hāng-ū tùi góa ê Pē kau-hù góa, Pē í-gōa bô chı̍t-ê bat Kiáⁿ; Kiáⁿ kap Kiáⁿ só͘ ài beh chí-sī ê í-gōa, bô chı̍t-ê bat Pē.

28

Lín kìⁿ-nā tio̍h-bôa taⁿ tāng-tàⁿ ê, tio̍h chiū-kūn góa; góa beh hō͘ lín an-hioh.

29

Góa sim-lāi un-jiû khiam-sùn; lín pē góa ê taⁿ, lâi tùi góa o̍h, chiū lín ê sim-sîn ōe tit-tio̍h an-hioh.

30

In-ūi góa ê taⁿ sī khòai, góa ê tàⁿ sī khin.