Má-thài 第 13 章 - 巴克禮全羅

1

Tng hit jı̍t, Iâ-so͘ tùi chhù-lāi chhut-khì, chē tī hái-piⁿ.

2

Ū chōe-chōe tīn ê lâng chū-chı̍p chiū-kūn I, tì-kàu I chiūⁿ chûn lâi chē, kui tīn ê lâng lóng khiā tī hōaⁿ-nı̍h.

3

Chiū ēng chōe-chōe hāng siat phì-jū kā in kóng,

4

Lí khòaⁿ, ū iā chéng ê chhut-khì iā chéng; iā ê sî, ū-ê ka-la̍uh tī lō͘-piⁿ, pe-chiáu kàu, it-chīn chia̍h i;

5

ū-ê ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín;

6

nā-sī jı̍t chhut pha̍k i; in-ūi bô kun, chiū ko͘-tâ.

7

Ia̍h ū-ê ka-la̍uh tī chhì-á-lāi, chhì-á hoat-khí jia-pè i;

8

ū-ê ka-la̍uh tī hó ê thó͘-tōe, kiat-sı̍t, ū-ê pah pē, ū-ê la̍k-cha̍p pē, ū-ê saⁿ-cha̍p pē.

9

Ū hī-khang ê, tio̍h thiaⁿ.

10

Ha̍k-seng chiū-kūn I kóng, Lí ēng phì-jū kā in kóng sī cháiⁿ-iūⁿ?

11

I ìn kóng, Thian-kok ê ò-biāu hō͘ lín chai, ia̍h bô hō͘ in.

12

In-ūi kìⁿ-nā ū ê, beh hō͘ i, chiū i ū chhun; bô ê, liân i só͘ ū ê ia̍h beh chhiúⁿ i.

13

Só͘-í góa ēng phì-jū kā in kóng; in-ūi in khòaⁿ, ia̍h khòaⁿ bô kìⁿ; thiaⁿ, ia̍h thiaⁿ bô hiān, ia̍h bô hiáu-ngō͘.

14

Í-sài-a só͘ chhàm-gú ê, sī èng-giām tī in, kóng, Lín thiaⁿ sī beh thiaⁿ, nā-sī koat-tòan bô hiáu-ngō͘; Lín khòaⁿ sī beh khòaⁿ, nā-sī koat-tòan khòaⁿ bô kìⁿ;

15

In-ūi chit ê peh-sìⁿ sim tūn, Hī-khang tāng, In ê ba̍k-chiu pàng khoeh; Kiaⁿ-liáu in ēng ba̍k-chiu khòaⁿ-kìⁿ, Ēng hī-khang thiaⁿ-kìⁿ, Ēng sim hiáu-ngō͘, Lâi o̍at-lìn-tńg, Góa chiū i-hó in.

16

Nā-sī lín ê ba̍k-chiu ū hok-khì, in-ūi in khòaⁿ-kìⁿ; lín ê hī-khang ū hok-khì, in-ūi in thiaⁿ-kìⁿ.

17

In-ūi góa sı̍t-chāi kā lín kóng, Chêng ū chōe-chōe sian-ti kap gī lâng, ài khòaⁿ lín só͘ khòaⁿ-kìⁿ ê, ia̍h bô khòaⁿ-kìⁿ; ài thiaⁿ lín só͘ thiaⁿ-kìⁿ ê, ia̍h bô thiaⁿ-kìⁿ.

18

Taⁿ chit-ê iā chéng-chí ê ê phì-jū, lín tio̍h thiaⁿ.

19

Kìⁿ-nā thiaⁿ thian-kok ê tō-lí iā bô hiáu-ngō͘ ê, hit ê pháiⁿ-ê chiū kàu, chiong só͘ iā tī i ê sim ê chhiúⁿ-khì; che sī iā tī lō͘-piⁿ ê.

20

Iā tī chio̍h-keh ê tōe ê, che sī lâng thiaⁿ tō-lí, liâm-piⁿ hoaⁿ-hí sêng-siū i;

21

chóng-sī lāi-bīn bô kun, put-kò sī chiām-sî nā-tiāⁿ; kàu ūi-tio̍h tō-lí tú-tio̍h ū hōan-lān khún-tio̍k liâm-piⁿ tio̍h-tak.

22

Iā tī chhì-á-lāi ê, che sī lâng thiaⁿ tō-lí, ia̍h sè-kan ê khòa-lū, chîⁿ-châi ê bê-he̍k, jia-pè hit ê tō-lí, chiū bô kiat-sı̍t.

23

Iā tī hó thó͘-tōe ê, che sī lâng thiaⁿ tō-lí lâi hiáu-ngō͘, i sı̍t-chāi kiat-sı̍t; só͘ kiat ê, ū-ê pah pē, ū-ê la̍k-cha̍p pē, ū-ê saⁿ-cha̍p pē.

24

Koh siat phì-jū tùi in kóng, Thian-kok chhin-chhiūⁿ lâng iā hó chéng-chí tī i ê hn̂g;

25

lâng khùn ê sî, i ê kiû-siû lâi, iā phōe tī be̍h tiong, chiū khì.

26

Kàu be̍h hoat-khí-lâi, sòa kiat sūi ê sî, phōe ia̍h chhut-hiān.

27

Ke-chú ê lô͘-po̍k lâi kā i kóng, Thâu-ke ah, lí kiám m̄ sī iā hó chéng-chí tī lí ê hn̂g mah? tùi tá-lo̍h ū phōe?

28

I kā in kóng, Che chiū-sī kiû-siû chòe ê. Lô͘-po̍k kā i kóng, Lí ài góan khì khau i mah?

29

I chiū kóng, Bô, kiaⁿ-liáu lín khau phōe, liân be̍h sòa pu̍ih-khí-lâi.

30

Iông-ún nn̄g hāng pîⁿ-pîⁿ tōa châng, thèng-hāu siu-koah; kàu siu-koah ê sî, góa beh kā koah-ê kóng, Tāi-seng khioh hiah ê phōe, hâ kui pé thang sio i; to̍k-to̍k be̍h tio̍h siu-jı̍p góa ê chhek-chhng.

31

Koh siat phì-jū tùi in kóng, Thian-kok chhin-chhiūⁿ chı̍t lia̍p kòa-chhài chí, lâng the̍h khì iā tī i ê hn̂g;

32

chit-ê sī pah hāng chéng-chí ê tē it sòe; kàu i tōa châng, sī khah tōa lóng-chóng ê chhài-soe, sòa chiâⁿ chòe chhiū, tì-kàu khong-tiong ê chiáu lâi hioh tī i ê ki.

33

Koh ēng phì-jū kā in kóng, Thian-kok chhin-chhiūⁿ kàⁿ, hū-jîn-lâng the̍h khì khǹg tī saⁿ táu mī-hún ê lāi-bīn, kàu lóng hoat kàⁿ.

34

Chiah-ê lóng sī Iâ-so͘ ēng phì-jū kā chèng lâng kóng; nā m̄ sī ēng phì-jū, chiū bô só͘ kā in kóng;

35

lâi èng-giām chá thok sian-ti só͘ kóng ê, kóng, Góa beh khui chhùi siat phì-jū, Chhián-bêng chhòng-chō sè-kan í-lâi só͘ ún-ba̍t ê.

36

Hit sî Iâ-so͘ hō͘ chèng lâng sì-sòaⁿ, chiah jı̍p chhù; I ê ha̍k-seng chiū-kūn I kóng, Hn̂g ê phōe-á ê phì-jū, kā góan kóe-bêng.

37

I ìn kóng, Iā hó chéng-chí ê sī Jîn-chú; hn̂g chiū-sī sè-kan;

38

hó chéng-chí ê chiū-sī thian-kok ê kiáⁿ; phōe, chiū-sī pháiⁿ-ê ê kiáⁿ;

39

iā phōe ê kiû-siû, chiū-sī Mô͘-kúi; siu-koah ê sî, sī sè-kài ê lō͘-bé; koah ê, chiū-sī thiⁿ-sài.

40

Só͘-í chhin-chhiūⁿ khioh phōe-á lâi ēng hé sio; tī sè-kài ê lō͘-bé ia̍h beh án-ni.

41

Jîn-chú beh chhe I ê thiⁿ-sài tùi I ê kok-lāi siu-sı̍p kìⁿ-nā hō͘ lâng tio̍h-tak ê, kap chòe put-hoat ê;

42

hiat in tī hé-lô͘, tī hia beh ū thî-khàu kā-gê chhiat-chhí.

43

Hit sî gī lâng beh hoat-chhut kng chhin-chhiūⁿ jı̍t, tī in ê Pē ê kok. Ū hī-khang ê tio̍h thiaⁿ.

44

Thian-kok chhin-chhiūⁿ pó-pòe khǹg tī hn̂g-nı̍h; lâng tú-tio̍h chiū khǹg-ba̍t i; in-ūi hoaⁿ-hí chiah khì bōe it-chhè só͘ ū ê, lâi bóe hit khu hn̂g.

45

Koh thian-kok chhin-chhiūⁿ seng-lí lâng chhē hó ê chu;

46

tú-tio̍h chı̍t lia̍p put-chí ta̍t chîⁿ ê, chiū khì bōe it-chhè só͘ ū ê lâi bóe i.

47

Koh thian-kok chhin-chhiūⁿ bāng pha tī hái-nı̍h, chū-chı̍p ta̍k lūi ê chúi-cho̍k;

48

í-keng móa, chiū thoa chiūⁿ phiâⁿ; chē-teh, khioh hó ê jı̍p khì-kū, m̄ hó ê hiat-ka̍k tī gōa-bīn.

49

Sè-kài ê lō͘-bé, ia̍h beh án-ni; chiah ê thiⁿ-sài beh chhut-lâi, tùi gī lâng ê tiong-kan lâi hun-piat pháiⁿ lâng;

50

hiat in tī hé-lô͘, tī hia beh ū thî-khàu kā-gê chhiat-chhí.

51

Chiah-ê lín lóng ōe hiáu-tit bōe? In kóng, Ōe.

52

I kā in kóng, Só͘-í kìⁿ-nā keng-ha̍k-sū chòe thian-kok ê ha̍k-seng ê, sī chhin-chhiūⁿ ke-chú tùi i ê khò͘-pâng the̍h-chhut sin kū ê mı̍h ê.

53

Iâ-so͘ í-keng kóng chiah ê phì-jū bêng-pe̍k, chiū lī-khui hia.

54

Kàu I ê pún hiuⁿ, tī in ê hōe-tn̂g kà-sī in; tì-kàu in gông-ngia̍h kóng, Chit lâng tùi tá-lo̍h tit-tio̍h chit ê tì-hūi, kap chiah ê kôan-lêng ah?

55

Chit-ê kiám m̄ sī ba̍k-chhiūⁿ ê kiáⁿ mah? I ê lāu-bú kiám m̄ sī kiò chòe Má-lī-a, I ê hiaⁿ-tī Ngá-kok, Iok-sek, Se-bûn, Iû-tāi mah?

56

I ê chí-bē kiám bô lóng kap lán tī chia mah? Án-ni chit lâng tùi tá-lo̍h tit-tio̍h chiah-ê it-chhè ah?

57

In chiū iàm-chiān I. Nā-sī Iâ-so͘ kā in kóng, Sian-ti lâng tī pún hiuⁿ pún ke í-gōa, bô m̄ chun-kùi.

58

Iâ-so͘ tī hia bô kiâⁿ chōe-chōe kôan-lêng, in-ūi in bô sìn I.