Má-thài 第 20 章 - 巴克禮全羅

1

In-ūi thian-kok chhin-chhiūⁿ ke-chú thàu-chá chhut-khì chhiàⁿ kang jı̍p i ê phû-tô-hn̂g;

2

kap chòe-kang ê lâng iok chı̍t jı̍t chı̍t chîⁿ gûn; chiū chhe in jı̍p i ê hn̂g.

3

Káu tiám ê sî chhut-khì, koh khòaⁿ-kìⁿ ū êng-êng khiā tī koe-chhī-nı̍h ê, chiū kā in kóng,

4

Lín ia̍h khì phû-tô-hn̂g, góa beh chiàu kong-tō hō͘ lín; in chiū khì.

5

Cha̍p-jī tiám kap saⁿ tiám ê sî koh chhut-khì, iā án-ni chòe.

6

Gō͘ tiám ê sî chhut-khì, koh tú-tio̍h ū lâng khiā-teh, chiū kā in kóng, Lín siáⁿ-sū thong jı̍t êng-êng khiā tī chia ah?

7

In kā i kóng, In-ūi bô lâng chhiàⁿ góan. I kā in kóng, Lín iā khì phû-tô-hn̂g.

8

Kàu jı̍t àm, hn̂g-chú kā i ê kóan-ke kóng, Kiò chòe-kang ê, hō͘ in kang-chîⁿ, tùi lō͘-bé lâi ê khí, kàu tāi-seng lâi ê ûi-chí.

9

Hiah-ê gō͘ tiám cheng só͘ chhiàⁿ ê kàu, ta̍k-ê niá chı̍t chîⁿ gûn.

10

Tāi-seng chhiàⁿ ê kàu, in phah-sǹg beh niá khah chōe; m̄-kú in iā ta̍k-ê niá chı̍t chîⁿ gûn.

11

Niá liáu, chiū tùi ke-chú nga̍uh-nga̍uh-liām kóng,

12

Góan thong jı̍t thoa-bôa siū jo̍ah; hiah-ê lō͘-bé chhiàⁿ ê, chòe kang chı̍t tiám-cheng kú, kèng-jiân hō͘ in kap góan pîⁿ.

13

I chiū tùi in chı̍t lâng ìn kóng, Pêng-iú ah, góa m̄ sī bô kong-tō khóan-thāi lí; lí kiám m̄ sī kap góa iok chı̍t chîⁿ gûn mah?

14

Lí-ê lí the̍h, chòe lí khì. Góa beh hō͘ chit-ê lō͘-bé ê kap lí pîⁿ.

15

Ēng góa ê mı̍h, kiâⁿ góa só͘ ài, kiám bōe chòe-tit? Á-sī in-ūi góa chòe hó, lí teh ba̍k-chhiah mah?

16

Chhin-chhiūⁿ án-ni, lō͘-bé ê beh chòe tāi-seng, tāi-seng ê beh chòe lō͘-bé.

17

Iâ-so͘ chiūⁿ Iâ-lō͘-sat-léng ê sî tī lō͘-nı̍h chhōa cha̍p-jī ê ha̍k-seng kàu piⁿ-á, kā in kóng,

18

Taⁿ lán chiūⁿ Iâ-lō͘-sat-léng; Jîn-chú beh siū ké-sàng hō͘ chiah ê chè-si-thâu kap keng-ha̍k-sū, in beh gí I sí-chōe;

19

iā beh ké-sàng I hō͘ gōa-pang lâng, tì-kàu hì-lāng I, piⁿ phah I, tèng I tī sı̍p-jī-kè; tē saⁿ jı̍t I beh koh-o̍ah.

20

Hit sî Se-pí-thài ê kiáⁿ ê lāu-bú kap i ê kiáⁿ chiū-kūn lâi pài I, kiû chı̍t hāng sū.

21

I kā i kóng, Lí ài sím-mı̍h? Ìn kóng, Gōan lí chhut bēng-lēng, hō͘ góa chit nn̄g ê kiáⁿ tī lí ê kok, chı̍t-ê chē lí ê chiàⁿ-pêng, chı̍t-ê chē lí ê tò-pêng.

22

Iâ-so͘ ìn kóng, Lín só͘ kiû ê, lín m̄ chai. Góa só͘ beh lim ê poe, lín ōe lim mah? Ìn kóng, Ōe.

23

I kā in kóng, Góa ê poe lín kó-jiân beh lim; chóng-sī chē góa ê chiàⁿ-pêng tò-pêng, m̄ sī góa ōe thang hō͘ lâng, to̍k-to̍k sī góa ê Pē ūi-tio̍h sím-mı̍h lâng pī-pān ê, chiū hō͘ in.

24

Cha̍p ê ha̍k-seng thiaⁿ-kìⁿ, chiū siū-khì hit nn̄g ê hiaⁿ-tī.

25

Iâ-so͘ kiò in lâi kóng, Lín chai gōa-pang ê jîn-kun chòe chú lâi tī-lí in, in ê tāi-jîn kóan-hat in;

26

to̍k-to̍k lín tiong-kan m̄ sī án-ni; lín tiong-kan ài chòe tōa ê, beh chòe lín ê chhe-ēng;

27

ài chòe thâu ê, beh chòe lín ê lô͘-po̍k.

28

Chhin-chhiūⁿ Jîn-chú lâi, m̄ sī beh chhe-ēng lâng, sī beh hō͘ lâng chhe-ēng; koh hiàn I ê sìⁿ-miā, lâi sio̍k-hôe chōe-chōe lâng.

29

In chhut Iâ-lī-ko ê sî, kui tōa tīn ê lâng tè I.

30

Tú-tn̄g ū nn̄g ê chhiⁿ-mî ê chē tī lō͘-piⁿ, thiaⁿ-kìⁿ Iâ-so͘ tùi hia kè, chiū hoah kóng, Chú, Tāi-pı̍t ê hō͘-è ah, lîn-bín góan.

31

Chèng lâng hiâm in, kah in chēng-chēng; nā-sī in koh khah tōa siaⁿ kiò kóng, Chú, Tāi-pı̍t ê hō͘-è ah, lîn-bín góan.

32

Iâ-so͘ thêng-kha, kiò in lâi kóng, Ài góa kā lín chòe sím-mı̍h?

33

In kā I kóng, Chú ah, góan ài tit-tio̍h ba̍k-chiu khui.

34

Iâ-so͘ khó-lîn in, bong in ê ba̍k-chiu; in liâm-piⁿ khòaⁿ-kìⁿ, chiū tè I.