Má-thài 第 22 章 - 巴克禮全羅

1

Iâ-so͘ ìn i, koh ēng phì-jū kā in kóng,

2

Thian-kok pí-phēng jîn-kun, kā i ê kiáⁿ pī-pān hun-in ê iân-sia̍h.

3

Chhe i ê lô͘-po̍k tiàu só͘ chhiáⁿ ê lâi hù iân-sia̍h; nā-sī in m̄ lâi.

4

Koh chhe pa̍t ê lô͘-po̍k kóng, Khì kā só͘ chhiáⁿ ê kóng, Góa ê toh í-keng pī-pān piān, góa ê gû kap pûi ê cheng-siⁿ í-keng thâi, pah-hāng mı̍h lóng piān, tio̍h lâi hù iân-sia̍h.

5

In bô iàu-kín, chòe in khì; chı̍t ê khì i ê chhân-hn̂g, chı̍t ê khì i ê seng-lí tiûⁿ;

6

kî-û ê lia̍h i ê lô͘-po̍k, lêng-jio̍k in, thâi in.

7

Jîn-kun siū-khì, chhe i ê kun-peng châu-bia̍t hiah ê hiong-hōan, sòa sio in ê siâⁿ.

8

Chiū kā i ê lô͘-po̍k kóng, Hun-in ê iân-sia̍h í-keng piān, nā-sī só͘ chhiáⁿ ê bōe kham-tit.

9

Só͘-í lín khì tōa lō͘-thâu, kìⁿ-nā só͘ tú-tio̍h ê lóng chhiáⁿ i lâi hù iân-sia̍h.

10

Hiah ê lô͘-po̍k chhut-khì lō͘-nı̍h, chū-chı̍p hōan só͘ tú-tio̍h ê, bô lūn hó pháiⁿ; hun-in ê kheh-thiaⁿ lâng-kheh chiū móa.

11

Jîn-kun jı̍p-khì khòaⁿ lâng-kheh, khòaⁿ-kìⁿ tī hia chı̍t lâng bô chhēng lé-ho̍k;

12

kā i kóng, Pêng-iú ah, lí bô chhēng hun-in ê lé-ho̍k, cháiⁿ-iūⁿ jı̍p-lâi chia? I chiū chēng-chēng.

13

Hit sî jîn-kun kā chiah ê chhe-ēng kóng, Pa̍k i ê kha-chhiú, chiong i hiat tī gōa-bīn o͘-àm ê só͘-chāi; tī hia beh ū thî-khàu kā-gê chhiat-chhí.

14

In-ūi siū tiàu ê chōe, siū kéng ê chió.

15

Hit sî Hoat-lī-sài lâng khì chham-siông, khòaⁿ thang cháiⁿ-iūⁿ chiū I ê ōe lâi tauh I.

16

Chiū chhe in ê ha̍k-seng kap Hi-lu̍t tóng chiū-kūn I kóng, Sian-siⁿ ah, góan chai lí sī chin-sı̍t, koh ēng chin-sı̍t chiong Siōng-tè ê lō͘ kà-sī lâng; lí iā bô lia̍h sím-mı̍h lâng chòe iàu-kín, in-ūi lí bô khòaⁿ lâng ê gōa-māu.

17

La̍p sè hō͘ Kai-sat ha̍p-gî á bô? Lí phah-sǹg cháiⁿ-iūⁿ? chhiáⁿ kā góan kóng.

18

Iâ-so͘ chai in ê pháiⁿ, chiū kóng, Ké-hó ê lâng ah, siáⁿ-sū chhì góa.

19

Ēng la̍p sè ê gûn-á hō͘ góa khòaⁿ. In chiū the̍h chı̍t ê gûn-á hō͘ I.

20

Iâ-so͘ kā in kóng, Chit ê siōng kap hō sī chī-chūi?

21

Kā I kóng, Kai-sat. I chiū kā in kóng, Án-ni, lín tio̍h chiong Kai-sat ê mı̍h la̍p hō͘ Kai-sat, chiong Siōng-tè ê mı̍h la̍p hō͘ Siōng-tè.

22

In thiaⁿ-kìⁿ chiū kî-kòai, lī-khui I khì.

23

Hit jı̍t ū Sat-thó͘-kai lâng, chiū-sī kóng lâng bô koh-o̍ah ê, chiū-kūn I, mn̄g kóng,

24

Sian-siⁿ ah, Mô͘-se kóng, Lâng sí iā bô kiáⁿ, i ê sió-tī tio̍h chhōa i ê bó͘; siⁿ kiáⁿ lâi sòa-chiap i ê hiaⁿ.

25

Taⁿ góan tiong-kan ū hiaⁿ-tī chhit lâng; tōa-ê chhōa, chiū sí-khì, bô kiáⁿ; lâu i ê bó͘ hō͘ sió-tī.

26

Tē jī ê, tē saⁿ ê, kàu tē chhit ê iā lóng sī án-ni.

27

Kàu bé, hit ê hū-jîn-lâng iā sí.

28

Án-ni tī koh-o̍ah ê sî, chhit lâng tiong hū-jîn-lâng beh chòe chī-chūi ê bó͘? in-ūi lóng ū chhōa i.

29

Iâ-so͘ ìn i kóng, Lín chhò lah, in-ūi lín m̄ bat sèng-keng kap Siōng-tè ê kôan-lêng.

30

In-ūi koh-o̍ah ê sî, bô kè bô chhōa; sī chhin-chhiūⁿ thiⁿ-sài tī thiⁿ-nı̍h.

31

Lūn-kàu sí-lâng koh-o̍ah, kiám bē tha̍k-tio̍h Siōng-tè só͘ kā lín kóng ê kóng,

32

Góa chiū-sī A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè? I m̄ sī sí-lâng ê Siōng-tè, sī o̍ah-lâng ê Siōng-tè.

33

Chèng lâng thiaⁿ-kìⁿ, kî-kòai I ê kà-sī.

34

Hoat-lī-sài lâng thiaⁿ-kìⁿ I í-keng that-ba̍t Sat-thó͘-kai lâng ê chhùi, chiū saⁿ-kap chū-chı̍p.

35

Kî-tiong chı̍t lâng chòe kàu-hoat-su ê chhì I, mn̄g kóng,

36

Sian-siⁿ ah, lu̍t-hoat tiong, sím-mı̍h kài chòe tōa?

37

I kā i kóng, Lí tio̍h chīn sim, chīn sèng, chīn ì thiàⁿ Chú lí ê Siōng-tè.

38

Chit ê kài sī tōa ê, iā sī thâu chı̍t ê.

39

Tē jī ê iā saⁿ chhin-chhiūⁿ, sī kóng, Lí tio̍h thiàⁿ chhù-piⁿ chhin-chhiūⁿ ka-kī.

40

Chit nn̄g tiâu kài sī chôan lu̍t-hoat kap sian-ti ê chóng-kun-thâu.

41

Hoat-lī-sài lâng chū-chı̍p ê sî Iâ-so͘ mn̄g in kóng,

42

Lūn Ki-tok lín phah-sǹg cháiⁿ-iūⁿ? I sī chī-chūi ê hō͘-è? In kā I kóng, Sī Tāi-pı̍t ê.

43

I kā in kóng, Án-ni, chiū Tāi-pı̍t hō͘ Sèng Sîn kám-tōng, cháiⁿ-iūⁿ chheng I chòe Chú ah, kóng,

44

Chú kā góa ê Chú kóng, Chē góa ê tōa pêng, Thèng-hāu góa chiong lí chiah ê tùi-te̍k hē tī lí ê kha-ē?

45

Tāi-pı̍t kì-jiân chheng I chòe Chú, chiū Ki-tok cháiⁿ-iūⁿ chòe I ê hō͘-è ah?

46

Bô lâng ōe ìn I chı̍t kù; tùi hit jı̍t iā bô lâng káⁿ koh mn̄g I.