Má-thài 第 5 章 - 巴克禮全羅

1

Iâ-so͘ khòaⁿ-kìⁿ hiah ê kui-tīn ê lâng, chiū peh-chiūⁿ soaⁿ; í-keng chē, I ê ha̍k-seng chiū-kūn I.

2

I khui chhùi kà-sī in kóng,

3

Sim-lāi sòng-hiong ê lâng ū hok-khì, in-ūi thian-kok sī in ê.

4

Iu-būn ê lâng ū hok-khì, in-ūi in beh siū an-ùi.

5

Un-jiû ê lâng ū hok-khì, in-ūi in beh sêng-chiap thó͘-tōe.

6

Iau chhùi-ta him-bō͘ gī ê lâng ū hok-khì, in-ūi in beh tit-tio̍h pá.

7

Lîn-bín lâng ê lâng ū hok-khì, in-ūi in beh tit-tio̍h lîn-bín.

8

Chheng-khì sim-koaⁿ ê lâng ū hok-khì, in-ūi in beh khòaⁿ-kìⁿ Siōng-tè.

9

Hō͘ lâng hô-pêng ê lâng ū hok-khì, in-ūi in beh chheng chòe Siōng-tè ê kiáⁿ.

10

Ūi-tio̍h gī bat siū khún-tio̍k ê lâng ū hok-khì, in-ūi thian-kok sī in ê.

11

Ūi-tio̍h góa, lâng chiah lóe-mē lín, khún-tio̍k lín, húi-pòng lín bān hāng ê pháiⁿ, lín chiū ū hok-khì.

12

Tio̍h hoaⁿ-hí khòai-lo̍k, in-ūi lín tī thiⁿ-nı̍h ê pò-siúⁿ sī tōa; in-ūi lín í-chêng ê sian-ti lâng, lâng ia̍h án-ni khún-tio̍k in.

13

Lín sī tōe-chiūⁿ ê iâm; iâm nā sit bī, beh ēng sím-mı̍h hō͘ i kiâm? Āu-lâi bô lō͘-ēng, put-kò hiat tī gōa-bīn, hō͘ lâng thún-ta̍h nā-tiāⁿ.

14

Lín sī sè-kan ê kng; siâⁿ khí tī soaⁿ-téng bōe-ōe ún-ba̍t.

15

Bô lâng tiám teng hē tī táu ē, chiū-sī hē tī teng-tâi téng, chiū piàn chiò chhù-lāi ê lâng.

16

Án-ni lín ê kng tio̍h chiò tī lâng ê bīn-chêng, hō͘ in khòaⁿ-kìⁿ lín ê hó só͘ kiâⁿ, lâi kui êng-kng hō͘ lín tī thiⁿ-nı̍h ê Pē.

17

Bo̍h-tit phah-sǹg góa lâi sī beh hòe-bô lu̍t-hoat á-sī sian-ti; góa lâi m̄ sī beh hòe-bô, sī beh èng-giām.

18

In-ūi góa sı̍t-chāi kā lín kóng, Chiū kàu thiⁿ tōe hòe-bô, lu̍t-hoat ê chı̍t tiám chı̍t u̍ih ia̍h koat-tòan bōe hòe-bô, kàu lóng-chóng chiâⁿ.

19

Só͘-í kìⁿ-nā húi-hōai chiah ê kài-bēng chì-bî-sòe ê chı̍t tiâu, sòa án-ni kà-sī lâng ê, tī thian-kok beh chheng i chòe chì-bî-sòe; to̍k-to̍k kìⁿ-nā kiâⁿ sòa kà-sī lâng ê, tī thian-kok beh chheng i chòe tōa.

20

In-ūi góa kā lín kóng, siat-sú lín ê gī bô iâⁿ-kè keng-ha̍k-sū kap Hoat-lī-sài lâng ê gī, koat-tòan bōe-tit jı̍p thian-kok.

21

Lín bat thiaⁿ-kìⁿ ū tùi kó͘-chá lâng kóng, M̄-thang hāi-sí lâng; hāi-sí lâng ê tio̍h siū sím-phòaⁿ.

22

Chóng-sī góa kā lín kóng, kìⁿ-nā siū-khì i ê hiaⁿ-tī ê, tio̍h siū sím-phòaⁿ; kìⁿ-nā tùi i ê hiaⁿ-tī kóng Lia̍p-ka ê, tio̍h siū kong-hōe pān; kìⁿ-nā kóng Mô͘-lī ê, tio̍h siū tē-ge̍k ê hé.

23

Só͘-í lí nā teh hiàn lí ê lé-mı̍h tī chè-tôaⁿ, iā tī hia kì-tit lí ê hiaⁿ-tī ū sím-mı̍h hia̍p-hiâm lí;

24

tio̍h tī hia pàng-hē lí ê lé-mı̍h tī tôaⁿ-chêng, tāi-seng khì kap lí ê hiaⁿ-tī hô-hó, jiân-āu lâi hiàn lí ê lé-mı̍h.

25

Lí iáu kap lí ê tùi-te̍k tī lō͘-nı̍h, tio̍h kín-kín kap i hô, kiaⁿ-liáu tùi-te̍k kau lí hō͘ sím-phòaⁿ koaⁿ, sím-phòaⁿ koaⁿ kau lí hō͘ gê-ia̍h, lí chiū siū koaiⁿ lo̍h kaⁿ.

26

Góa sı̍t-chāi kā lí kóng, Chı̍t si chı̍t hô bē hêng, lí koat-tòan bōe-ōe chhut hia.

27

Lín bat thiaⁿ-kìⁿ ū ōe kóng, M̄-thang kiâⁿ kan-îm;

28

nā-sī góa kā lín kóng, kìⁿ-nā khòaⁿ-kìⁿ hū-lú, lâi tōng-khí io̍k-liām ê, sim-lāi í-keng îm i.

29

Siat-sú lí ê chiàⁿ ba̍k tì-kàu lí hōan-chōe, chiū tio̍h iah hiat-ka̍k; lêng-khó͘ pah-thé sòng-sit chı̍t thé, bián-tì lí chôan-sin hiat-lo̍h tē-ge̍k.

30

Siat-sú lí ê chiàⁿ chhiú tì-kàu lí hōan-chōe, chiū tio̍h chām hiat-ka̍k; lêng-khó͘ pah-thé sòng-sit chı̍t thé, bián-tì lí chôan-sin khì tē-ge̍k.

31

Koh ū ōe kóng, Lâng nā beh lî i ê bó͘, tio̍h ēng lî-chu hō͘ i;

32

nā-sī góa kā lín kóng, kìⁿ-nā m̄ sī ūi-tio̍h kan-îm ê iân-kò͘ lâi lî i ê bó͘, piān sī hō͘ i chòe ū îm-hēng ê; kìⁿ-nā chhōa só͘ lî ê, ia̍h sī kiâⁿ kan-îm.

33

Koh lín bat thiaⁿ-kìⁿ ū tùi kó͘-chá lâng kóng, M̄-thang pōe chiù-chōa, lí só͘ chiù ê chōa, tio̍h hêng hō͘ Chú;

34

nā-sī góa kā lín kóng, It-khài bo̍h-tit chiù-chōa; bo̍h-tit kí thiⁿ, in-ūi thiⁿ sī Siōng-tè ê chō-ūi;

35

bo̍h-tit kí tōe, in-ūi tōe sī I ê kha-ta̍h; bo̍h-tit kí Iâ-lō͘-sat-léng, in-ūi sī tōa Jîn-kun ê siâⁿ.

36

Ia̍h bo̍h-tit kí lí ê thâu-khak lâi chiù-chōa, in-ūi chı̍t ki thâu-mn̂g, lí bōe hō͘ i chòe o͘ chòe pe̍h.

37

Nā-sī lín ê ōe tio̍h kóng, Sī, chiū Sī; M̄ sī, chiū M̄ sī; chiah-ê í-gōa sī tùi hit ê pháiⁿ-ê chhut.

38

Lín bat thiaⁿ-kìⁿ ū ōe kóng, Ba̍k-chiu pê ba̍k-chiu, chhùi-khí pê chhùi-khí;

39

nā-sī góa kā lín kóng, Bo̍h-tit kap pháiⁿ tí-te̍k; nā ū lâng siàn lí chiàⁿ-pêng ê chhùi-phóe, tò-pêng-ê ia̍h o̍at hō͘ i.

40

Ū lâng ài kò lí, the̍h lí ê lāi-saⁿ, gōa-saⁿ ia̍h pàng hō͘ i.

41

Ū lâng bián-kióng lí kiâⁿ chı̍t lí, chiū kap i kiâⁿ nn̄g lí.

42

Tùi lí kiû ê, hō͘ i; beh kā lí chioh ê, bo̍h-tit o̍at-cháu.

43

Lín bat thiaⁿ-kìⁿ ū ōe kóng, Tio̍h thiàⁿ lí ê chhù-piⁿ, òan-hūn lí ê tùi-te̍k;

44

nā-sī góa kā lín kóng, Tùi-te̍k lín ê, tio̍h thiàⁿ in; khún-tio̍k lín ê, tio̍h thòe in kî-tó;

45

hō͘ lín chiâⁿ-chòe lín tī thiⁿ-nı̍h ê Pē ê kiáⁿ; in-ūi I hō͘ I ê jı̍t khí lâi chiò pháiⁿ lâng kap hó lâng, ia̍h ēng hō͘ ak gī kap put-gī ê lâng.

46

In-ūi lín nā thiàⁿ thiàⁿ lín ê, ū sím-mı̍h pò-siúⁿ? hiah ê thiu-hiòng ê kiám bô án-ni kiâⁿ mah?

47

Lín kan-ta chhéng-an lín ê hiaⁿ-tī, ū sím-mı̍h khah-iâⁿ lâng? gōa-pang lâng kiám bô án-ni kiâⁿ mah?

48

Só͘-í lín tio̍h sûn-chôan, chhin-chhiūⁿ lín ê Thiⁿ Pē ê sûn-chôan.