Bí-ka 第 7 章 - 巴克禮全羅

1

Góa ū chai-ē ah, góa chhin-chhiūⁿ hē-thiⁿ ê ké-chí siu-sêng-liáu ê sî, koh chhin-chhiūⁿ bán phû-tô só͘ chhun ê lân-san lia̍p, bô kui-pha thang chia̍h; góa ê sim him-bō͘ khí-thâu-se̍k ê bû-hoa-kó.

2

Tōe-chiūⁿ khiân-sêng ê lâng sí-bô, tī lâng ê tiong-kan bô chèng-tı̍t--ê; in lóng bâi-ho̍k beh thâi-sí lâng, ēng lô-bāng tng i ê hiaⁿ-tī.

3

In ê chhiú choan-choan chòe pháiⁿ, siú-léng kap sím-phòaⁿ-si thó pò͘-lō͘, tōa koaⁿ-ôan thò͘-chhut i sim-lāi ê su-io̍k, saⁿ-kap chó͘-chit pháiⁿ.

4

In tiong-kan tē-it hó--ê, chhin-chhiūⁿ chı̍t-lê, tē-it chèng-tı̍t--ê chhin-chhiūⁿ lî-pa ê chhì-á; lí ê siú-bāng--ê só͘ kóng ê jı̍t, chiū-sī lí siū hêng-ho̍at ê jı̍t, kūn--lah; in ê bê-lōan kàu lah.

5

Bo̍h-tit óa-khò tâng-phōaⁿ, bo̍h-tit sìn chhin-bı̍t ê pêng-iú; tio̍h iok-sok lí ê chhùi, bo̍h-tit tùi só͘ thiàⁿ ê bó͘ kóng-khí.

6

In-ūi kiáⁿ biáu-sī lāu-pē, cha-bó͘-kiáⁿ ngó͘-ge̍k lāu-bú, sim-pū ngó͘-ge̍k ta-ke; lâng ê tùi-te̍k, chiū-sī i ke-lāi ê lâng.

7

Nā-sī góa, góa beh ǹg-bāng Iâ-hô-hoa, ia̍h beh thèng-hāu kiù góa ê Siōng-tè; góa ê Siōng-tè beh thiaⁿ góa.

8

Góa ê tùi-te̍k ah, bo̍h-tit in-ūi góa lâi hoaⁿ-hí; góa sui-jiân po̍ah-tó, beh koh khí-lâi; góa chē tī o͘-àm, Iâ-hô-hoa chòe góa ê kng.

9

Góa beh jím-siū Iâ-hô-hoa ê siū-khì, in-ūi góa tek-chōe I: thèng-hāu I piān-hō͘ góa ê àn, kā góa phòaⁿ-tòan; I beh chhōa góa chhut-lâi kàu tī kng-bêng, góa iā beh khòaⁿ-kìⁿ I ê kong-gī.

10

Hit-sî góa ê tùi-te̍k, chiū-sī bat tùi góa kóng, Iâ-hô-hoa lí ê Siōng-tè tī toh-lo̍h--ê, i chı̍t-ē khòaⁿ-kìⁿ, chiū tōa-tōa kiàn-siàu, góa beh chhin-ba̍k khòaⁿ-kìⁿ i; i beh siū thún-ta̍h, chhin-chhiūⁿ koe-lō͘ ê thô͘-bê.

11

Khí lí ê siâⁿ-chhiûⁿ ê jı̍t kàu lah, hit-jı̍t lí ê tōe-kài beh khui-khoah.

12

Hit-jı̍t in beh tùi A-su̍t kàu Ai-kı̍p chiah ê siâⁿ, tùi Ai-kı̍p kàu Tōa-hô, tùi chit ê hái kàu hit ê hái, tùi chit ê soaⁿ kàu hit ê soaⁿ, lóng beh kui-óa.

13

Chóng-sī tōe beh in-ūi khiā-khí ê peh-sìⁿ ê iân-kò͘ lâi pha-hng, sī in kiâⁿ-chòe ê kiat-kó.

14

Kiû Lí ēng Lí ê kóaiⁿ-á chhī Lí ê peh-sìⁿ, chiū-sī Lí ê sán-gia̍p ê iûⁿ-kûn, tī Ka-bı̍t soaⁿ ka-kī tiàm tī chhiū-nâ-lāi--ê, chhī in tī Pa-san kap Ki-lia̍t, chhin-chhiūⁿ chá-sî chı̍t-iūⁿ.

15

Góa beh hián-chhut kî-sū hō͘ i khòaⁿ, chhin-chhiūⁿ lí chhut Ai-kı̍p tōe ê sî chı̍t-iūⁿ.

16

Lia̍t-pang khòaⁿ-kìⁿ chiū beh ūi ka-kī ê sè-le̍k kiàn-siàu; in beh ēng chhiú ng chhùi; in ê hī-khang iā beh chhàu-lâng.

17

In beh chī thô͘-hún chhin-chhiūⁿ chôa; chhin-chhiūⁿ tī thô͘-kha teh sô ê mı̍h, ngia̍uh-ngia̍uh-chhoah chhut i ê khang; in beh kiaⁿ-hiâⁿ lâi kui lán ê Siōng-tè Iâ-hô-hoa, koh in-ūi Lí lâi kiaⁿ-hiâⁿ.

18

Siōng-tè ah, chī-cui7 chhin-chhiūⁿ Lí, sī sià-bián chōe-kòa, khoan-sù I só͘ chhun ê peh-sìⁿ ê kè-sit--ê? I bô éng-éng khǹg siū-khì, in-ūi I hoaⁿ-hí lîn-bín.

19

I beh o̍at-tńg lîn-bín lán; I ta̍h lán ê chōe-ok tī kha-ē; Lí beh chiong in it-chhè ê chōe-ok, hiat tī chhim-hái.

20

Lí beh chiàu kó͘-chá só͘ tùi góan ê lia̍t-chó͘ chiù-chōa--ê, si sêng-sı̍t tī Ngá-kok, kiâⁿ chû-ài tī A-pek-la̍h-hán.