Ní-hi-bí 第 13 章 - 巴克禮全羅

1

Hit-jı̍t lâng tha̍k Mô͘-se ê chheh hō͘ peh-sìⁿ thiaⁿ, tú-tio̍h chheh-lāi ū kì kóng, A-bûn lâng kap Mô͘-ap lâng éng-óan bōe-tit-thang jı̍p Siōng-tè ê hōe;

2

in-ūi in bô ēng chia̍h-mı̍h kap chúi, lâi ngiâ-chih Í-sek-lia̍t lâng, hóan-tńg chhiàⁿ Pa-lân lâi chiù-chó͘ in; chóng-sī góan ê Siōng-tè hō͘ hit ê chiù-chó͘ piàn-chòe chiok-hok.

3

In thiaⁿ-kìⁿ lu̍t-hoat liáu-āu, chiū tùi Í-sek-lia̍t tiong pun-khui hiah ê cha̍p-cho̍k ê lâng.

4

Chit ê tāi-chì í-chêng, kóan-lí góan Siōng-tè tiān-lāi ê pâng-keng ê chè-si Í-lī-a-sı̍t kap To-pí-ngá kiat-bêng;

5

chiū ūi-tio̍h i pī-pān chı̍t-keng tōa keng pâng. Chêng tī hit keng siu-khǹg sò͘-chè, jú-hiuⁿ, khì-kū, kap chiàu-lē kiong-kip Lī-bī lâng, chhiùⁿ-koa--ê, kò͘-mn̂g--ê, ngó͘-kok, sin-chiú, kap iû ê cha̍p-hūn-chı̍t, kap kui hō͘ chè-si kú-chè ê mı̍h.

6

Tng hit-sî góa bô tī Iâ-lō͘-sat-léng; in-ūi Pa-pí-lûn ông A-ta̍t-siat-se saⁿ-cha̍p-jī nî, góa oat-khì ông hia; kè kúi-nā jı̍t góa tùi ông kò-kè.

7

Góa kàu Iâ-lō͘-sat-léng chiū chai Í-lī-a-sı̍t ūi To-pí-ngá só͘ kiâⁿ ê pháiⁿ-tāi, tī Siōng-tè tiān ê īⁿ-lāi, ūi i pī-pān chı̍t-keng pâng.

8

Góa chiū chin peh-pak, chiong To-pí-ngá it-chhè ê ka-khì, lóng tùi pâng-lāi hiat chhut-khì;

9

góa chhut bēng-lēng, lâng chiū chheng-khì hiah ê pâng-keng; jiân-āu góa chiong Siōng-tè tiān-lāi ê khì-kū, kap sò͘-chè, jú-hiuⁿ, koh poaⁿ--jı̍p-lâi.

10

Góa iā chai Lī-bī lâng só͘ eng-kai tit-tio̍h ê hūn-gia̍h bô hō͘ in, tì-kàu tam-tng chit ê Lī-bī lâng, kap chhiùⁿ-koa--ê, ta̍k-ê tò-khì in ê chhân-hn̂g.

11

Góa chiū chhut-la̍t chek-pī hiah ê koaⁿ-tiúⁿ, kā in kóng, Siōng-tè ê tiān siáⁿ-sū pàng hong-hòe ah? góa chiū chū-chı̍p Lī-bī lâng, ho̍k-tò in ê gôan-jīm.

12

Tùi án-ni Iû-tāi ê chèng-lâng chiong ngó͘-kok, sin-chiú, kap iû ê cha̍p-hūn-chı̍t, tòa jı̍p khò͘-pâng.

13

Góa siat-lı̍p chè-si Sī-lī-bí-ngá, keng-ha̍k-sū Sat-tok, kap Lī-bī lâng Pí-tāi-ngá chòe khò͘-pâng ê koaⁿ, kóan-lí khò͘-pâng; hù-koaⁿ sī Hap-lân, Hap-lân sī Sat-khek ê kiáⁿ, Sat-khek sī Má-tha-nî ê kiáⁿ; in-ūi khòaⁿ chí(**chit) kúi lâng sī chīn-tiong; in ê chit-hūn sī hun-hoat mı̍h hō͘ in ê hiaⁿ-tī.

14

Góa ê Siōng-tè ah, kiû Lí in-ūi chit ê sū tio̍h kì-liām góa, bo̍h-tit chhat-siau góa ūi-tio̍h Siōng-tè ê tiān, kap kî-tiong hiah ê tián-lé, só͘-kiâⁿ ê hó-sū.

15

Tng hiah ê jı̍t góa tī Iû-tāi khòaⁿ-kìⁿ lâng tī an-hioh-jı̍t ta̍h chiú-khut, poaⁿ tiū-khún, koh hō͘ lû chài; koh ēng chiú, phû-tô, bû-hoa-kó, kap ta̍k-iūⁿ ê tàⁿ, tī an-hioh-jı̍t taⁿ jı̍p Iâ-lō͘-sat-léng; góa chiū tī in bōe chia̍h-mı̍h hit-jı̍t, chek-pī in.

16

Koh ū Chhui-lô lâng tiàm tī hí(**hit) tiong-kan, tòa hî kap ta̍k-iūⁿ ê hè-mı̍h, tī an-hioh-jı̍t bōe hō͘ Iû-tāi lâng, tī Iâ-lō͘-sat-léng.

17

Góa chiū chhut-la̍t chek-pī Iû-tāi hiah ê kùi-cho̍k, kā in kóng, Lín kiâⁿ chit-hō pháiⁿ kan-hōan an-hioh-jı̍t sī siáⁿ-sū ah?

18

Chêng lín ê lia̍t-chó͘ kiám bô án-ni kiâⁿ, lán ê Siōng-tè kiám bô chiong chit-ê it-chhè ê chai-ē lîm-kàu lán kap chit ê siâⁿ mah? Taⁿ lín iáu-kú hōan-tio̍h an-hioh-jı̍t, hō͘ siū-khì lîm-kàu Í-sek-lia̍t it-hoat siong-tiōng.

19

Tī an-hioh-jı̍t chêng Iâ-lō͘-sat-léng siâⁿ-mn̂g hông-hun ê sî, góa chiū bēng-lēng lâng koaiⁿ-mn̂g, koh bēng-lēng an-hioh-jı̍t bē kè-sin m̄-thang khui; góa phài góa kúi-nā ê lô͘-po̍k kóan-lí siâⁿ-mn̂g, bián-tit ū lâng tī an-hioh-jı̍t taⁿ sím-mı̍h tàⁿ jı̍p-lâi.

20

Tùi án-ni seng-lí lâng, kap hòan-bōe ta̍k-hāng hè-mı̍h ê, chı̍t nn̄g pái hioh-mî tī Iâ-lō͘-sat-léng ê siâⁿ-gōa.

21

Góa chiū chek-pī in kóng, Lín siáⁿ-sū hioh-mî tī siâⁿ-mn̂g-kháu ah? nā koh án-ni, góa beh hē chhiú lia̍h lín. Tùi chit-tia̍p í-āu, in tī an-hioh-jı̍t bô koh lâi.

22

Góa bēng-lēng Lī-bī lâng chheng-khì ka-kī, lâi kò͘-siú siâⁿ-mn̂g, hō͘ an-hioh-jı̍t chòe-sèng. Góa ê Siōng-tè ah, kiû Lí in-ūi chit ê sū lâi kì-liām góa, chiàu Lí ê tōa chû-pi lâi thiàⁿ-sioh góa.

23

Tng hiah ê jı̍t góa iā khòaⁿ-kìⁿ Iû-tāi lâng chhōa A-sı̍t-tu̍t, A-bûn, Mô͘-ap ê cha-bó͘-kiáⁿ chòe bó͘.

24

In ê kiáⁿ-jî kóng-ōe, chı̍t-pòaⁿ kóng A-sı̍t-tu̍t ê ōe, bōe hiáu kóng Iû-tāi ê ōe, só͘ kóng-ê chiū-sī chiàu ta̍k-cho̍k ê khiuⁿ.

25

Góa chiū tōa-tōa chek-pī in, mē in, phah in kúi-nā lâng, chhoah in ê thâu-mn̂g, kah in kí Siōng-tè lâi chiù-chōa, kóng, Lín m̄-thang ēng ka-kī ê cha-bó͘-kiáⁿ kè hō͘ in ê kiáⁿ, iā m̄-thang ūi lín ê kiáⁿ, lín pún-sin, chhōa in ê cha-bó͘-kiáⁿ.

26

Í-sek-lia̍t ông Só͘-lô-bûn kiám-m̄-sī tī chit hō sū hōan-chōe mah? tī chōe-chōe kok ê tiong-kan bô chı̍t ê ông chhin-chhiūⁿ i, koh tit-tio̍h i ê Siōng-tè thiàⁿ i, Siōng-tè siat-lı̍p i chòe Í-sek-lia̍t chôan-kok ê ông; chóng-sī gōa-pang ê cha-bó͘-kiáⁿ siōng-chhiáⁿ hō͘ i hōan-chōe.

27

Án-ni góan kiám thèng lín kiâⁿ chit-hō tōa-pháiⁿ, chhōa gōa-pang ê lú-chú, kan-hōan lán ê Siōng-tè mah?

28

Chè-si-thâu Í-lī-a-sı̍t ê sun, Iâ-hô-iâ-tāi ê kiáⁿ, ū chı̍t-ê sī Hô-lûn lâng Chham-pa-la̍h ê kiáⁿ-sài; góa chiū kóaⁿ i lī-khui góa.

29

Góa ê Siōng-tè ah, kiû Lí kì-tit in; in-ūi in phah lâ-sâm chè-si ê chit, pōe chè-si Lī-bī lâng ê iok.

30

Án-ni góa kā in tû-khì it-chhè gōa-pang lâng ê khóan, koh siat-lı̍p chè-si kap Lī-bī lâng ê pan, kok chīn in ê chit;

31

liāu-lí tiāⁿ-tio̍h kî sio-chè ê chhâ, í-kı̍p khí-thâu se̍k ê thó͘-sán. Góa ê Siōng-tè ah, kiû Lí kì-liām góa, siúⁿ-sù góa hok-khì.