Bîn-sò͘ Kì-lio̍k 第 20 章 - 巴克禮全羅

1

Chiaⁿ-ge̍h-kan, Í-sek-lia̍t lâng chôan-hōe lâi kàu Sîm ê khòng-iá, peh-sìⁿ chiū tiàm tī Ka-te-su. Bí-lī-àm sí tī-hia, chiū bâi-chòng tī-hia.

2

Hōe-chiòng bô chúi thang lim; in chiū chū-chı̍p kong-kek Mô͘-se A-lûn.

3

Peh-sìⁿ chiū kap Mô͘-se kè-kàu kóng, Chêng góan ê hiaⁿ-tī sí tī Iâ-hô-hoa ê bīn-chêng, góan m̄-ta̍t-tio̍h hit-sî sòa sí.

4

Lín siáⁿ-sū chhōa Iâ-hô-hoa ê hōe-chiòng kàu chit ê khòng-iá, hō͘ góan kap góan ê cheng-siⁿ sí tī-chia ah?

5

Lín siáⁿ-sū hō͘ góan chhut Ai-kı̍p, chhōa góan kàu chit ê pháiⁿ só͘-chāi ah? Bô só͘-chāi thang iā-chéng, iā bô bû-hoa-kó, bô phû-tô, bô sia̍h-liû, koh bô chúi thang lim.

6

Mô͘-se A-lûn lī-khui hōe-chiòng kàu hōe-bō͘ mn̂g-kháu, phak tī tōe-nı̍h; Iâ-hô-hoa ê êng-kng tùi in hián-hiān.

7

Iâ-hô-hoa hoan-hù Mô͘-se kóng,

8

Lí tio̍h kia̍h kóaiⁿ-á, lí kap lí ê hiaⁿ A-lûn chio-chı̍p hōe-chiòng; tī in ê ba̍k-chiu-chêng lín bēng-lēng chio̍h-pôaⁿ chhut-chúi, lí ūi-tio̍h peh-sìⁿ hō͘ chúi tùi chio̍h-pôaⁿ chhut, hō͘ hōe-chiòng kap in ê cheng-siⁿ lim.

9

Mô͘-se thàn bēng-lēng, tī Iâ-hô-hoa ê bīn-chêng kia̍h kóaiⁿ-á.

10

Mô͘-se A-lûn chio-chı̍p hōe-chiòng kàu chio̍h-pôaⁿ-chêng, Mô͘-se tùi in kóng, Lín chiah ê pōe-ge̍k ê lâng tio̍h thiaⁿ ah, góan tio̍h hō͘ chúi tùi chit ê chio̍h-pôaⁿ lâu-chhut-lâi hō͘ lín mah?

11

Mô͘-se kia̍h-khí chhiú, ēng kóaiⁿ-á phah chio̍h-pôaⁿ nn̄g-ē, chiū ū chōe-chōe chúi lâu-chhut, hōe-chiòng kap in ê cheng-siⁿ lóng lim.

12

Iâ-hô-hoa chiū tùi Mô͘-se A-lûn kóng, In-ūi lín m̄ sìn Góa, bô tī Í-sek-lia̍t lâng ê ba̍k-chiu-chêng chun-kèng Góa chòe-sèng, só͘-í lín bōe-tit-thang chhōa chiah ê hōe-chiòng jı̍p Góa só͘ sù-hō͘ in ê tōe.

13

Chiah ê chúi miâ kiò Bí-lī-pa ê chúi; sī in-ūi Í-sek-lia̍t lâng kap Iâ-hô-hoa kè-kàu; Iâ-hô-hoa chiū tùi in hián-bêng ka-kī chòe-sèng.

14

Mô͘-se tùi Ka-te-su chhe sù-chiá khì kìⁿ Í-tong ông, kóng, Lí ê hiaⁿ-tī Í-sek-lia̍t án-ni kóng, Lí chai góan só͘ tú-tio̍h it-chhè ê kan-khó͘.

15

Góan ê lia̍t-chó͘ lo̍h-khì Ai-kı̍p, góan tòa tī Ai-kı̍p kú-kú; Ai-kı̍p lâng pháiⁿ khóan-thāi góan kap góan ê lia̍t-chó͘.

16

Góan ai-kiû Iâ-hô-hoa ê sî, I thiaⁿ góan ê siaⁿ, chhe-khián sù-chiá chhōa góan chhut Ai-kı̍p; taⁿ góan tī lí ke̍k piⁿ-thâu ê siâⁿ Ka-te-su.

17

Kiû lí iông-ún góan keng-kè lí ê tōe, góan bô beh tùi chhân-hn̂g kap phû-tô-hn̂g keng-kè, iā bô lim chiah ê chíⁿ ê chúi; to̍k-to̍k kiâⁿ tōa-lō͘, bô phian-chó phian-iū, tı̍t-tı̍t keng-kè lí ê tōe-kài.

18

Í-tong ông kóng, Lí m̄-thang tùi góa chia keng-kè, bián-tit góa kia̍h to chhut-lâi tí-te̍k lí.

19

Í-sek-lia̍t lâng kā i kóng, Góan beh tùi tōa-lō͘ kiâⁿ-khì; siat-sú góan kap cheng-siⁿ lim lí ê chúi, góan beh hêng lí kè-chîⁿ; chún góa pō͘-kiâⁿ kè-khì, bô chhap pa̍t-hāng.

20

I kóng, Lí m̄-thang keng-kè. Í-tong ông chiū chhōa chōe-chōe lâng chhut-lâi, ēng kong-ngī ê chhiú tí-te̍k i.

21

Án-ni Í-tong m̄ chún Í-sek-lia̍t lâng tùi i ê tōe-kài keng-kè; Í-sek-lia̍t chiū o̍at-tńg lī-khui i.

22

In tùi Ka-te-su khí-sin, Í-sek-lia̍t ê chôan-hōe kàu Hô-jíⁿ soaⁿ.

23

Iâ-hô-hoa tī óa-kūn Í-tong piⁿ-kài ê Hô-jíⁿ soaⁿ, hoan-hù Mô͘-se A-lûn kóng,

24

A-lûn beh tò-chó͘, in-ūi i bōe-tit-thang jı̍p Góa siúⁿ-sù Í-sek-lia̍t lâng ê tōe, in-ūi tī Bí-lī-pa ê chúi lín ûi-ke̍h Góa ê bēng-lēng.

25

Lí tòa A-lûn kap i ê kiáⁿ Í-lī-a-sat chiūⁿ Hô-jíⁿ soaⁿ,

26

thǹg A-lûn ê saⁿ, kā i ê kiáⁿ Í-lī-a-sat chhēng; A-lûn beh sí tī-hia, tò-khì.

27

Mô͘-se chiàu Iâ-hô-hoa só͘ bēng-lēng-ê kiâⁿ; in saⁿ-lâng tng hōe-chiòng ê ba̍k-chiu-chêng chiūⁿ Hô-jíⁿ soaⁿ.

28

Mô͘-se thǹg A-lûn ê saⁿ, kā i ê kiáⁿ Í-lī-a-sat chhēng; A-lûn tī-hia sí tī soaⁿ-téng; Mô͘-se kap Í-lī-a-sat lo̍h-soaⁿ.

29

Hōe-chiòng khòaⁿ-kìⁿ A-lûn í-keng sí, chiū ūi A-lûn thî-khàu saⁿ-cha̍p jı̍t; Í-sek-lia̍t chôan-ke iā lóng án-ni.