Bîn-sò͘ Kì-lio̍k 第 6 章 - 巴克禮全羅

1

Iâ-hô-hoa hoan-hù Mô͘-se kóng,

2

Lí tio̍h hoan-hù Í-sek-lia̍t lâng kā in kóng, Bô-lūn lâm-lú hē te̍k-pia̍t ê gōan, chiū-sī Ná-sè-jíⁿ lâng ê gōan, ka-kī hun-piat kui hō͘ Iâ-hô-hoa,

3

i chiū tio̍h lī-khui chiú kap kāu-chiú, iā m̄-thang lim sím-mı̍h chiú ê chhò͘, kap kāu-chiú ê chhò͘, m̄-thang lim sím-mı̍h phû-tô ê chiap, iā m̄-thang chia̍h chhiⁿ ê phû-tô, kap ta ê phû-tô.

4

Tī it-chhè ka-kī hun-piat ê jı̍t, kìⁿ-nā phû-tô-chhiū só͘ chhut ê, tùi hu̍t kàu phê, lóng m̄-thang chia̍h.

5

Tī i hē-gōan ka-kī hun-piat hiah ê jı̍t, m̄-thang hō͘ thì-thâu-to kàu i ê thâu-khak; kàu i ka-kī hun-piat kui hō͘ Iâ-hô-hoa ê jı̍t móa, i tio̍h chòe-sèng, chhut-chāi i ê thâu-mn̂g hoat-tn̂g.

6

Tī i ka-kī hun-piat kui Iâ-hô-hoa hiah ê jı̍t, m̄-thang óa-kūn sin-si.

7

I ê lāu-pē, á-sī lāu-bú, á-sī hiaⁿ-tī, á-sī chí-bē, sí ê sî, i m̄-thang ūi-tio̍h in hō͘ ka-kī bô chheng-khì; in-ūi i ka-kī hun-piat kui Siōng-tè ê pîn-kù sī tī i ê thâu-khak.

8

Tī i ka-kī hun-piat hiah ê jı̍t, i sī kui tī Iâ-hô-hoa chòe-sèng.

9

Nā tī i ê sin-piⁿ hut-jiân ū lâng sí, tì-kàu bak-tio̍h i ka-kī hun-piat ê thâu-khak, chiū i tio̍h tī ka-kī chheng-khì ê jı̍t thì-thâu, chiū-sī tī tē-chhit jı̍t thì i.

10

Tē-poeh jı̍t i tio̍h ēng nn̄g chiah ka-chui, á-sī nn̄g chiah chíⁿ-á-kiáⁿ, tòa kàu hōe-bō͘ mn̂g-kháu, kau-tài chè-si.

11

Chè-si tio̍h hiàn chı̍t-chiah chòe sio̍k-chōe-chè, chı̍t-chiah chòe sio-chè, kā i sio̍k-chōe; in-ūi i tùi sin-si lâi ū chōe; koh tio̍h tī hit-jı̍t hō͘ i ê thâu-khak chòe-sèng.

12

I tio̍h koh ēng i hun-piat ê jı̍t, hun-piat lâi kui Iâ-hô-hoa, koh tio̍h khan chı̍t chiah bē-móa-nî ê iûⁿ-káng-á, chòe pó͘-kè-sit ê chè; chóng-sī í-chêng ê jı̍t bô sǹg-siàu, in-ūi i ê ka-kī hun-piat í-keng siū bak lâ-sâm.

13

Ná-sè-jíⁿ lâng ka-kī hun-piat ê jı̍t í-keng móa, hit ê lē chiū-sī án-ni; lâng tio̍h chhōa i kàu hōe-bō͘ ê mn̂g-kháu.

14

I tio̍h chiong i ê lé-mı̍h hiàn hō͘ Iâ-hô-hoa, chiū-sī chı̍t-chiah bô hâ-chhû bē-móa-nî ê mî-iûⁿ-káng-á, chòe sio-chè, chı̍t-chiah bô hâ-chhû bē-móa-nî ê mî-iûⁿ-bú-á, chòe sio̍k-chōe chè, kap chı̍t-chiah bô hâ-chhû ê mî-iûⁿ-káng, chòe siā-un ê chè;

15

koh chı̍t-kheng ê bô-kàⁿ piáⁿ, chiū-sī tiau-hô iû iù-mī-hún chòe ê piáⁿ, kap boah-iû bô-kàⁿ ê po̍h-piáⁿ, í-kı̍p i ê sò͘-chè, kap kòan-tiān ê chè.

16

Chè-si tio̍h the̍h chiah-ê kàu Iâ-hô-hoa ê bīn-chêng, lâi hiàn hit-lâng ê sio̍k-chōe chè, kap sio-chè.

17

I iā tio̍h chiong hit chiah iûⁿ-káng, kap hit kheng bô-kàⁿ piáⁿ, hiàn hō͘ Iâ-hô-hoa chòe siā-un ê chè; chè-si iā tio̍h sòa hiàn i ê sò͘-chè kap kòan-tiān.

18

Ná-sè-jíⁿ lâng tio̍h tī hōe-bō͘ mn̂g-kháu thì ka-kī hun-piat ê thâu, chiong ka-kī hun-piat ê thâu-mn̂g, hē tī siā-un-chè ē-bīn ê hé-téng.

19

Ná-sè-jíⁿ lâng thì i ka-kī hun-piat ê thâu-mn̂g liáu-āu, chè-si chiū tio̍h chhú í-keng chú ê iûⁿ-káng chı̍t ki chêng-thúi, koh tùi kheng-á-lāi the̍h chı̍t ê bô-kàⁿ piáⁿ, kap chı̍t ê bô-kàⁿ ê po̍h-piáⁿ, lóng hē tī i ê chhiú.

20

Chè-si tio̍h the̍h chiah-ê chòe iô-chè, iô tī Iâ-hô-hoa ê bīn-chêng; che kap só͘ iô ê heng, só͘ kú ê thúi, lóng chòe sèng-mı̍h, kui hō͘ chè-si; jiân-āu Ná-sè-jíⁿ lâng thang lim-chiú.

21

Hē-gōan ê Ná-sè-jíⁿ lâng ūi-tio̍h i hun-piat ka-kī só͘ hiàn ê lé-mı̍h, kap i í-gōa só͘ ōe tit-tio̍h-ê, hiàn hō͘ Iâ-hô-hoa, chiū-sī chit ê lē; i án-ni hē-gōan chiū tio̍h chiàu hun-piat ka-kī ê lē lâi kiâⁿ.

22

Iâ-hô-hoa hoan-hù Mô͘-se kóng,

23

Lí tio̍h hoan-hù A-lûn kap i ê kiáⁿ kóng, Lín tio̍h án-ni kā Í-sek-lia̍t lâng chiok-hok, tùi in kóng:　　

24

Gōan Iâ-hô-hoa sù-hok lí, pó-hō͘ lí;　　

25

Gōan Iâ-hô-hoa hō͘ I ê bīn ê kng chiò lí, si-un hō͘ lí;　　

26

Gōan Iâ-hô-hoa hoaⁿ-hí ê bīn khòaⁿ lí, siúⁿ-sù lí pêng-an.

27

Án-ni in beh ēng Góa ê miâ hē tī Í-sek-lia̍t lâng ê téng-bīn; Góa iā beh sù-hok in.