Bîn-sò͘ Kì-lio̍k 第 9 章 - 巴克禮全羅

1

Chhut Ai-kı̍p jī-nî chiaⁿ-ge̍h, Iâ-hô-hoa tī Se-nái khòng-iá, bēng-lēng Mô͘-se kóng,

2

Í-sek-lia̍t lâng eng-kai tī tiāⁿ-tio̍h ê jı̍t-kî siú pôaⁿ-kè-choeh;

3

tī pún-ge̍h cha̍p-sì jı̍t hông-hun ê sî, lín tio̍h tī só͘ tiāⁿ-tio̍h ê jı̍t siú i, chiàu i it-chhè ê lu̍t-lē, it-chhè ê hoat-tō͘ lâi siú i.

4

Tùi án-ni Mô͘-se hoan-hù Í-sek-lia̍t lâng siú pôaⁿ-kè-choeh.

5

Chiaⁿ-ge̍h cha̍p-sì jı̍t hông-hun ê sî, in chiū tī Se-nái ê khòng-iá, siú pôaⁿ-kè-choeh; kìⁿ-nā Iâ-hô-hoa só͘ bēng-lēng Mô͘-se ê, Í-sek-lia̍t lâng lóng chiàu án-ni kiâⁿ.

6

Ū kúi-nā lâng hō͘ lâng ê sin-si bak lâ-sâm, bōe-ōe tī hit-jı̍t siú pôaⁿ-kè-choeh; tng hit-jı̍t in kàu Mô͘-se A-lûn ê bīn-chêng.

7

Hiah ê lâng kā in kóng, Góan in-ūi hō͘ lâng ê sin-si bak lâ-sâm, siáⁿ-sū chó͘-tòng góan bōe thang tī Í-sek-lia̍t tiong, tī só͘ tiāⁿ-tio̍h ê jı̍t-kî hiàn lé-mı̍h hō͘ Iâ-hô-hoa ah?

8

Mô͘-se kā in kóng, Lín khiā-teh thèng-hāu, góa beh thiaⁿ Iâ-hô-hoa cháiⁿ-iūⁿ hoan-hù lín.

9

Iâ-hô-hoa hoan-hù Mô͘-se kóng,

10

Lí tio̍h hoan-hù Í-sek-lia̍t lâng kóng, He̍k-sī lín á-sī lín ê hō͘-è ê tiong-kan, nā ū lâng hō͘ sin-si bak lâ-sâm, á-sī hn̄g-hn̄g tī lō͘-nı̍h, iû-gôan tio̍h siú Iâ-hô-hoa ê pôaⁿ-kè-choeh.

11

In tio̍h tī jī-ge̍h cha̍p-sì jı̍t hông-hun ê sî lâi siú i, chham bô-kàⁿ piáⁿ kap khó͘-chhài lâi chia̍h.

12

M̄-thang lâu chı̍t-tiám-á kàu keh chá-khí, iûⁿ-á ê kut chı̍t-ki iā m̄-thang phah-chı̍h; in tio̍h chiàu pôaⁿ-kè-choeh chiah ê lu̍t-lē lâi siú i.

13

Chóng-sī lâng nā chheng-khì iā m̄-sī tī lō͘-tiong, nā ka-kī the-sî m̄ siú pôaⁿ-kè-choeh, tio̍h tùi i ê peh-sìⁿ-tiong chián-tû hit ê lâng, in-ūi i tī só͘ tiāⁿ-tio̍h ê jı̍t bô hiàn lé-mı̍h hō͘ Iâ-hô-hoa, hit-lâng tio̍h tam-tng i ê chōe.

14

Nā ū gōa-lâng kià-kha tī lín tiong-kan, ài siú Iâ-hô-hoa ê pôaⁿ-kè-choeh, i tio̍h chiàu pôaⁿ-kè-choeh ê lu̍t-lē hoat-tō͘ lâi kiâⁿ; chhut-gōa lâng kap pún-tōe lâng tio̍h tâng chı̍t ê lu̍t-lē lâi kiâⁿ.

15

Khí hōe-bō͘ hit-jı̍t, ū hûn jia i ê hōe-bō͘, chiū-sī chèng-kù ê pò͘-pîⁿ; tùi ê-hng kàu chá-khí, ū chhin-chhiūⁿ hé ê khóan-sit khàm tī hōe-bō͘.

16

Siông-siông sī án-ni; hûn jia i, mî-sî chhin-chhiūⁿ hé ê khóan-sit.

17

Hûn tùi pò͘-pîⁿ siu chiūⁿ-khì, Í-sek-lia̍t lâng chiū khí-sin; hûn thêng ê só͘-chāi, Í-sek-lia̍t lâng chiū chat-iâⁿ tī-hia.

18

Í-sek-lia̍t lâng chiàu Iâ-hô-hoa ê bēng-lēng khí-sin, iā chiàu Iâ-hô-hoa ê bēng-lēng an-iâⁿ; hûn thêng tī hōe-bō͘-téng ê sî, in iû-gôan an-iâⁿ tī-hia.

19

Hûn tī hōe-bō͘-téng thêng chōe-chōe jı̍t, Í-sek-lia̍t lâng chiū siú Iâ-hô-hoa só͘ kau-tài ê, bô khí-sin.

20

Ū-sî hûn tī hōe-bō͘-téng kúi-nā jı̍t, in chiàu Iâ-hô-hoa ê bēng-lēng iû-gôan an-iâⁿ tī-hia, iā chiàu Iâ-hô-hoa ê bēng-lēng khí-sin.

21

Ū-sî hûn jia-teh tùi ê-hng kàu chá-khí, chá-khí sî hûn siu chiūⁿ-khì, in chiū khí-sin; bô-lūn jı̍t-sî mî-sî hûn siu chiūⁿ-khì, in chiū khí-sin.

22

Hûn thêng tī hōe-bō͘, bô-lūn sī nn̄g-jı̍t, sī chı̍t-ge̍h-jı̍t, sī chı̍t-nî, Í-sek-lia̍t lâng iû-gôan an-iâⁿ tī-hia, bô khí-sin; chóng-sī hûn siu chiūⁿ-khì, in chiū khí-sin.

23

In thàn Iâ-hô-hoa ê bēng-lēng an-iâⁿ, iā thàn Iâ-hô-hoa ê bēng-lēng khí-sin; in siú Iâ-hô-hoa só͘ kau-tài ê, lóng chiàu Iâ-hô-hoa thok Mô͘-se só͘ bēng-lēng ê.