Hui-li̍p-pí 第 2 章 - 巴克禮全羅

1

Só͘-í nā tī Ki-tok ū sím-mı̍h khòan-bián, á-sī sím-mı̍h jîn-ài ê an-ùi, á-sī ū Sèng Sîn ê sím-mı̍h kau-thong, á-sī ū sím-mı̍h chû-pi lîn-bín,

2

lín tio̍h hō͘ góa ê hoaⁿ-hí chhiong-móa, chiū-sī tâng sim-chì, tâng jîn-ài, sim-sîn hô-ha̍p, sim-chì choan-it;

3

hōan sū bo̍h-tit ūi-tio̍h kiat-tóng, á-sī ūi-tio̍h khang-khang ê êng-kng, lâi chòe; to̍k-to̍k tāi-ke ēng khiam-sùn ê sim khòaⁿ pa̍t lâng khah-iâⁿ tī pún-sin.

4

Lín ta̍k lâng bo̍h-tit kò͘ ka-kī ê sū, iā tio̍h kò͘ pa̍t lâng ê sū.

5

Lín tio̍h ū Ki-tok Iâ-so͘ ê sim chòe sim;

6

I pún ū Siōng-tè ê hêng-chōng, bô lia̍h kap Siōng-tè pîⁿ téng chòe só͘ tio̍h chip-siú ê,

7

hóan-tńg piàⁿ-khang ka-kī, chhú lô͘-po̍k ê hêng-chōng, chiâⁿ-chòe lâng ê iūⁿ-siùⁿ;

8

í-keng ū chhin-chhiūⁿ lâng ê khóan-sit, chiū khut ka-kī, sūn-ho̍k kàu tī sí, sīm-chì sí tī sı̍p-jī-kè.

9

Só͘-í Siōng-tè ko-seng I ke̍k kôaiⁿ, siúⁿ-sù I hit ê miâ, pôaⁿ-kè tī bān miâ ê téng-bīn ê;

10

hō͘ kìⁿ-nā tī thiⁿ, tī tōe, kap tī tōe-ē ê, tī Iâ-so͘ ê miâ, bô chı̍t ê kha-thâu-u m̄ kūi-pài,

11

bô chı̍t ê chhùi m̄ chheng-ho͘ Iâ-so͘ Ki-tok chòe Chú, lâi kui êng-kng Pē Siōng-tè.

12

Só͘-í, góa só͘ thiàⁿ ê hiaⁿ-tī ah, chhin-chhiūⁿ lín bat siông-siông sūn-thàn, m̄ nā tī góa kap lín tī-teh ê sî, chiū hiān-kim góa bô kap lín tī-teh, it-hoat tio̍h ēng kiaⁿ-hiâⁿ ngia̍uh-ngia̍uh-chhoah, lâi chòe-chiâⁿ lín ka-kī ê tit kiù;

13

in-ūi lín ū hit ê ì-gōan, ū hit ê só͘ kiâⁿ, lóng sī tùi Siōng-tè ūi-tio̍h I ê hó-ì lâi kiâⁿ tī lín sim-lāi.

14

Lín hōan sū bo̍h-tit nga̍uh-nga̍u-liām, bo̍h-tit cheng-piān;

15

chiah hō͘ lín bô thang hiâm, chin-sı̍t bô ké, chòe Siōng-tè ê kiáⁿ-jî, bô hâ-chhû tī siâ-phiah hêng-ge̍k ê sè-kài; lín tī in tiong-kan chhut-hiān, chhin-chhiūⁿ chiò-kng tī sè-kan ê, hián-bêng o̍ah-miā ê tō-lí;

16

hō͘ góa kàu tī Ki-tok ê jı̍t ū thang khoa-kháu, in-ūi góa m̄ sī khang-khang pháu-cháu, iā m̄ sī khang-khang tio̍h-bôa.

17

Chiū nā ēng lín ê sìn chòe chè-mı̍h lâi ho̍k-sāi, góa chòe kòan-tiān tī hit téng-bīn, góa sī hoaⁿ-hí, iā kap lín chèng lâng saⁿ-kap hoaⁿ-hí;

18

lín iā tio̍h án-ni hoaⁿ-hí, sòa kap góa saⁿ-kap hoaⁿ-hí.

19

Nā-sī góa tiàm-tī Chú Iâ-so͘ ǹg-bāng kín-kín chhe Thê-mô͘-thài khì chiū-kūn lín, hō͘ góa chai lín ê sū, lâi an góa ê sim.

20

In-ūi góa bô pa̍t ê tâng-sim ê lâng, chin-chiàⁿ khòa-lū lín ê tāi-chì ê.

21

In-ūi chèng lâng lóng sī tô͘-bô͘ ka-kī ê sū, m̄ sī tô͘-bô͘ Iâ-so͘ Ki-tok ê sū.

22

Nā-sī Thê-mô͘-thài ê keng-giām lín chai, chiū-sī kap góa saⁿ-kap tio̍h-bôa lâi heng-khí hok-im, chhin-chhiūⁿ kiáⁿ tùi lāu-pē án-ni.

23

Só͘-í góa khòaⁿ góa ê tāi-chì cháiⁿ-iūⁿ, ǹg-bāng liâm-piⁿ chhe i khì.

24

Chóng-sī góa tiàm-tī Chú chhim sìn pún-sin iā beh kín-kín kàu.

25

Nā-sī góa siūⁿ iàu-kín tio̍h chhe Í-pa-hut-thê chiū-kūn lín, i chiū-sī góa ê hiaⁿ-tī, tâng chòe kang ê, tâng tng-peng ê, iā sī lín ê sù-chiá, kiong-kip góa só͘ khiàm-ēng ê;

26

in-ūi i lôan-bō͘ lín chèng lâng, lâi chhám-chhoeh, sī lín bat thiaⁿ-kìⁿ i phòa-pīⁿ;

27

i kó-jiân ū phòa-pīⁿ kàu hiám-hiám sí; nā-sī Siōng-tè lîn-bín i, m̄ nā lîn-bín i, iā lîn-bín góa, bián-tit góa tī iu-būn tiong ke-thiⁿ iu-būn.

28

Só͘-í góa koh khah tì-ì chhe i, hō͘ lín koh khòaⁿ-kìⁿ i, lâi hoaⁿ-hí, góa chiū khah bô iu-būn.

29

Só͘-í lín tiàm-tī Chú tio̍h hoaⁿ-hoaⁿ hí-hí chiap-la̍p i, iā tio̍h chun-tiōng chhin-chhiūⁿ chit hō ê lâng.

30

In-ūi i ūi-tio̍h chòe Ki-tok ê kang hiám-hiám sí, ka-kī piàⁿ-miā, beh pó͘ lín ho̍k-sāi góa só͘ bô kàu ê.