Chim-giân 第 14 章 - 巴克禮全羅

1

Tì-hūi ê hū-jîn-lâng ta̍k-ê kiàn-lı̍p i ê ke; Gōng ê hū-jîn-lâng chhin-chhiú húi i.

2

Chiàu chèng-tı̍t lâi kiâⁿ ê lâng kèng-ùi Iâ-hô-hoa; To̍k-to̍k kiâⁿ tāi-chì hêng-ge̍k-ê sī biáu-sī I.

3

Gōng-lâng ê chhùi-lāi ū kiau-ngō͘ ê kóaiⁿ; To̍k-to̍k tì-hūi ê lâng ê chhùi-tûn beh pó-sioh pún-sin.

4

Ke nā bô gû, gû-tiâu chiū khang-khang; Thó͘-sán chōe-chōe sī tùi-tī gû ê la̍t.

5

Chin-sı̍t ê kan-chèng bô kóng pe̍h-chha̍t; Ké ê kan-chèng kóng pe̍h-chha̍t ōe.

6

Bú-bān ê lâng chhē tì-hūi, iā chhē-bô-tio̍h; Chhong-bêng ê lâng khòai-khòai tit-tio̍h chai-bat.

7

Kiâⁿ kàu gōng-lâng ê bīn-chêng, Chiū ōe khòaⁿ-kìⁿ i ê chhùi-tûn bô tì-sek.

8

Thong-ta̍t ê lâng ê tì-hūi chāi-tī bêng-pe̍k i ê lō͘; Gōng-lâng ê gōng chiū-sī khúi-chà.

9

Gōng-lâng lia̍h hōan-chōe chòe kún-chhiò; Chèng-tı̍t ê lâng ê tiong-kan ū hô-pêng.

10

Sim ōe chai ka-kī ê kan-khó͘; Gōa-lâng bô hūn i ê hoaⁿ-hí.

11

Pháiⁿ-lâng ê chhù beh tó-hōai; Chèng-tı̍t ê lâng ê pò͘-pîⁿ beh heng-ōng.

12

Ū chı̍t tiâu lō͘, lâng khòaⁿ-chòe chèng-tı̍t; Kàu-bé chiâⁿ-chòe sí-bô ê lō͘.

13

Lâng teh chhiò ê sî, sim iā ū iu-būn; Khòai-lo̍k ê kiat-kio̍k pìⁿ-chòe pi-siong.

14

Sim pōe-ge̍k ê lâng beh tùi i ê só͘-kiâⁿ lâi móa-chiok; Hó-lâng iā beh tùi i pún-sin lâi móa-chiok.

15

Gōng-tı̍t ê lâng bô chı̍t-kù-ōe m̄-sìn; Thong-ta̍t ê lâng ta̍k-pō͘ kín-sīn.

16

Tì-hūi ê lâng kiaⁿ-hiâⁿ, koh lī-khui pháiⁿ-tāi; Gōng ê lâng hòng-sù, ka-kī óa-khò.

17

Khòai siū-khì--ê, kiâⁿ tāi-chì gû-gōng; Kè-bô͘ pháiⁿ--ê, beh tú-tio̍h òan-hūn.

18

Gōng-tı̍t ê lâng sêng-chiap gû-gōng chòe-gia̍p; Thong-ta̍t ê lâng tit-tio̍h chai-bat chòe bián-liû.

19

Pháiⁿ-lâng phak tī hó-lâng ê bīn-chêng; Chōe-jîn phak tī gī-lâng ê mn̂g-kháu.

20

Sòng-hiong lâng liân chhù-piⁿ iā òan-hūn i; Hó-gia̍h lâng pêng-iú chin-chōe.

21

Khòaⁿ-khin chhù-piⁿ ê, chit-hō lâng ū chōe; Lîn-bín sòng-hiong ê, hit-hō lâng ū hok-khì.

22

Kè-bô͘ pháiⁿ ê, kiám bô jı̍p bê-lō͘ mah? Kè-bô͘ hó ê, beh tit-tio̍h lîn-bín kap sêng-sı̍t.

23

Pah-poaⁿ ê tio̍h-bôa lóng ū lī-ek; Chhùi-tûn kóng chōe-chōe ōe chiū tì-kàu sòng-hiong.

24

Tì-hūi ê lâng ê chîⁿ-châi chòe in ê bián-liû; Gōng-lâng ê gōng kàu-bé sī gōng.

25

Chin-sı̍t ê kan-chèng kiù lâng ê sìⁿ-miā; Kóng pe̍h-chha̍t ê, sī khúi-chà.

26

Kèng-ùi Iâ-hô-hoa ū kian-kò͘ ê óa-khò; I ê kiáⁿ-jî ū tô-siám ê só͘-chāi.

27

Kèng-ùi Iâ-hô-hoa chiū-sī o̍ah-miā ê chúi-chôaⁿ, Ōe hō͘ lâng lī-khui sí-bô ê lô-bāng.

28

Kok-ông ê êng-kng chāi-tī peh-sìⁿ ê chōe; Jîn-kun soe-pāi chāi-tī peh-sìⁿ ê chió.

29

Bô khòai-khòai siū-khì-ê, tōa-tōa ū chhang-miâ; Sò-sèng-ê tōa hián-chhut gû-gōng.

30

Sim-lāi an-chēng sī jio̍k-thé ê o̍ah-miā; Òan-tò͘ sī kut-lāi ê hiú-nōa.

31

Khek-po̍k sòng-hiong-ê, sī siat-to̍k chhòng-chō i ê Chú; Lîn-bín khiàm-kheh-ê, sī chun-kèng Chú.

32

Pháiⁿ-lâng tī i só͘ kiâⁿ ê pháiⁿ beh tú-tio̍h chhia-tó; Gī-lâng kàu sí ū ǹg-bāng.

33

Tì-hūi an-jiân tiàm tī chhang-miâ ê lâng ê sim; Gōng-lâng ê pak-lāi beh lō͘-hiān.

34

Kong-gī hō͘ pang-kok seng-kôaiⁿ; Kìⁿ-ū chōe-ok ê peh-sìⁿ siū lêng-jio̍k.

35

Ēng tì-hūi kiâⁿ tāi-chì ê chhe-ēng tit-tio̍h ông ê un-hūi; To̍k-to̍k sià-pāi-ê, ōe tú-tio̍h i siū-khì.