Si-phian 第 101 章 - 巴克禮全羅

1

Tāi-pı̍t ê si.1) Góa beh chhiùⁿ chû-ài kap kong-pêng ê koa; Iâ-hô-hoa ah, góa beh ǹg Lí chhiùⁿ o-ló ê koa.

2

Góa beh ēng tì-hūi kiâⁿ tī ôan-chôan ê lō͘; Lí beh siáⁿ-sî kàu góa chia? Góa beh ēng ôan-chôan ê sim kiâⁿ tī góa ê ke-lāi.

3

Siâ-phiah ê sū, góa lóng m̄ pâi tī góa ê ba̍k-chêng; Pōe-tō ê lâng só͘ chòe ê sū, góa chin òan-hūn; M̄ hō͘ i liâm-tio̍h góa.

4

Oan-khiau ê sim tek-khak hō͘ i lī-khui góa; It-chhè ê pháiⁿ góa m̄-bat i.

5

Àm-tiong húi-pòng i ê chhù-piⁿ--ê, góa beh bia̍t i; Ba̍k-chiu-kho͘ tōa ê, sim kiau-ngō͘ ê lâng, góa bô iông-ún i.

6

Góa ê ba̍k-chiu beh khòaⁿ kok-lāi sêng-sı̍t ê lâng, hō͘ in kap góa saⁿ-kap tòa; Kiâⁿ tī ôan-chôan ê lō͘--ê, i beh ho̍k-sāi góa.

7

Kiâⁿ khúi-chà ê lâng bōe-tit-thang tòa góa ê ke-lāi; Kóng pe̍h-chha̍t-ōe ê lâng bōe-tit-thang khiā-tiâu tī góa ê ba̍k-chiu-chêng.

8

Ta̍k chá-khí góa beh bia̍t-bô kok-lāi ê pháiⁿ-lâng; Thang chiong it-chhè chòe-pháiⁿ ê lâng, tùi Iâ-hô-hoa ê siâⁿ tû--khì.