Si-phian 第 116 章 - 巴克禮全羅

1

Góa thiàⁿ Iâ-hô-hoa, In-ūi I thiaⁿ góa ê siaⁿ, góa ê khún-kiû.

2

I í-keng àⁿ hī-khang thiaⁿ góa; Só͘-í góa chı̍t-sì-lâng beh kiû-kiò I.

3

Sí-bô ê soh tîⁿ-tio̍h góa, Im-kan ê thòng-khó͘ khîⁿ-tio̍h góa; Góa tú-tio̍h hōan-lān iu-khó͘.

4

Góa chiū kiû-kiò Iâ-hô-hoa ê miâ, kóng, Iâ-hô-hoa ah, taⁿ kiû Lí kiù góa ê sìⁿ-miā.

5

Iâ-hô-hoa ū un-hūi, ū kong-gī; Góan ê Siōng-tè ū chû-pi.

6

Iâ-hô-hoa pó-hō͘ gōng-tı̍t ê lâng; Góa kàu tī pi-bî ê tōe-ūi, I chiū kiù góa.

7

Góa ê sîn-hûn ah, tio̍h kui tī lí an-hioh ê só͘-chāi, In-ūi Iâ-hô-hoa ēng tōa-un khóan-thāi lí.

8

In-ūi Lí kiù góa ê sìⁿ-miā bián-tit sí-bô; Kiù góa ê ba̍k-chiu bián lâu ba̍k-sái; Kiù góa ê kha bián po̍ah-tó.

9

Góa beh tī Iâ-hô-hoa ê bīn-chêng, Kiâⁿ tī o̍ah-lâng ê tōe.

10

Góa sìn, só͘-í kóng; Góa siū ke̍k-tōa ê khùn-khó͘;

11

Góa bat tio̍h-kip lâi kóng, Lâng lóng sī hu-ké.

12

Iâ-hô-hoa siúⁿ-sù góa it-chhè ê tōa-un, Góa beh ēng sím-mı̍h pò-tap I?

13

Góa beh phâng-khí kiù-un ê poe, Kiû-kiò Iâ-hô-hoa ê miâ.

14

Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê gōan.

15

Iâ-hô-hoa khòaⁿ I sèng ê peh-sìⁿ ê sí, Chòe chin pó-pòe.

16

Iâ-hô-hoa ah, góa sı̍t-chāi sī Lí ê lô͘-po̍k; Góa sī Lí ê lô͘-po̍k, sī Lí lú-pī ê kiáⁿ; Lí í-keng tháu-khui khún-pa̍k góa ê soh.

17

Góa beh ēng kám-siā ê chè hiàn hō͘ Lí; Koh beh kiû-kiò Iâ-hô-hoa ê miâ.

18

Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê gōan.

19

Tī Iâ-hô-hoa chhù ê īⁿ-lāi, Tī lí Iâ-lō͘-sat-léng ê tiong-kan; Lín tio̍h o-ló Iâ-hô-hoa.