Si-phian 第 132 章 - 巴克禮全羅

1

Chiūⁿ kiā-á ê si.1) Iâ-hô-hoa ah, Tāi-pı̍t só͘ siū it-chhè ê khó͘-lān, Kiû Lí kì-liām i;

2

I cháiⁿ-iūⁿ tùi Iâ-hô-hoa chiù-chōa, tùi Ngá-kok ê tōa Kôan-lêng--ê hē-gōan;

3

Kóng, Góa tek-khak bô jı̍p góa ê ke ê pò͘-pîⁿ, Iā bô chiūⁿ góa ê bîn-chhn̂g;

4

Góa bô iông-ún góa ê ba̍k-chiu khùn--khì, Iā bô iông-ún góa ê ba̍k-chiu-phê ha̍p-óa;

5

Thèng-hāu góa ūi-tio̍h Iâ-hô-hoa chhē-tio̍h só͘-chāi, Ūi Ngá-kok ê tōa Kôan-lêng--ê chhē-tio̍h khiā-khí ê só͘-chāi.

6

Khòaⁿ ah, góan thiaⁿ-kìⁿ iok-kūi tī Í-hoat-tha; Góan tī chhiū-nâ ê chhân tú-tio̍h i.

7

Góan beh jı̍p I khiā-khí ê só͘-chāi; Góan beh pài tī I ê kha-ta̍h-í chêng.

8

Iâ-hô-hoa ah, kiû Lí khí-lâi; Lí kap Lí ê khùi-la̍t ê iok-kūi saⁿ-kap jı̍p Lí hioh-khùn ê só͘-chāi.

9

Gōan Lí ê chè-si chhēng kong-gī chòe saⁿ; Gōan Lí sèng ê peh-sìⁿ chhut hoaⁿ-hí ê siaⁿ.

10

Kiû Lí in-ūi Lí ê lô͘-po̍k Tāi-pı̍t ê iân-kò͘, Bo̍h-tit khì-sak Lí ê siū-boah-iû--ê.

11

Iâ-hô-hoa ēng sêng-sı̍t tùi Tāi-pı̍t chiù-chōa, Tek-khak bô hóan-hok, Kóng, Góa beh hō͘ lí só͘-siⁿ-ê chē tī lí ê pó-chō.

12

Lí ê kiáⁿ nā siú Góa ê iok, Kap Góa só͘ beh kà-sī in ê hoat-tō͘, In ê kiáⁿ-sun beh éng-óan chē tī lí ê pó-chō.

13

In-ūi Iâ-hô-hoa ū kéng Sek-an, Ài ēng i chòe pún-sin khiā-khí ê só͘-chāi;

14

Kóng, Che sī Góa éng-óan hioh-khùn ê só͘-chāi; Góa beh tiàm tī-chia, In-ūi sī Góa só͘ ì-ài ê.

15

Góa beh hō͘ i ê bí-niû hong-sēng, Góa beh ēng chia̍h-mı̍h hō͘ i ê sòng-hiong-lâng kàu-gia̍h.

16

Góa beh hō͘ i ê chè-si chhēng kiù-un chòe saⁿ; I sèng ê peh-sìⁿ beh chhut tōa hoaⁿ-hí ê siaⁿ.

17

Góa beh hō͘ Tāi-pı̍t ê kak tī-hia hoat-siⁿ; Góa ūi-tio̍h Góa ê siū-boah-iû--ê pī-pān kng-teng.

18

Góa beh hō͘ i ê tùi-te̍k chhēng kiàn-siàu chòe saⁿ; Chóng-sī i ê bián-liû beh tī i ê thâu-khak-téng hoat-chhut kng.