Si-phian 第 26 章 - 巴克禮全羅

1

Tāi-pı̍t ê si.1) Iâ-hô-hoa ah, kiû Lí kā góa phòaⁿ-tòan; in-ūi góa ū chiàu góa ê sûn-chôan lâi kiâⁿ; Góa óa-khò Iâ-hô-hoa bô iô-choah.

2

Iâ-hô-hoa ah, kiû Lí kàm-chhat góa, chhì-giām góa; Thòan-liān góa ê sim-tn̂g.

3

In-ūi Lí ê chû-ài siông-siông tī góa ê ba̍k-chiu-chêng; Góa ia̍h ū chiàu Lí ê chin-lí kiâⁿ.

4

Góa bē-bat kap hong-hàm ê lâng saⁿ-kap chē; Ia̍h bô kap ké-chòe ê lâng chòe-tīn.

5

Góa òan-hūn pháiⁿ-lâng ê hōe; Bô beh kap ok-to̍k ê lâng tâng chē.

6

Iâ-hô-hoa ah, góa beh sóe chhiú piáu-bêng góa ê bô chōe, Chiah lâi se̍h Lí ê chè-tôaⁿ;

7

Thang hō͘ lâng thiaⁿ-kìⁿ kám-siā ê siaⁿ, Koh thang kóng-khí Lí it-chhè kî-biāu ê só͘-chòe.

8

Iâ-hô-hoa ah, góa thiàⁿ-sioh Lí só͘ tòa ê chhù; Í-kı̍p Lí êng-kng só͘ tī-teh ê só͘-chāi.

9

M̄-thang chiong góa ê lêng-hûn kap chōe-jîn chòe chı̍t-ē siu-sı̍p--khì; M̄-thang chiong góa ê o̍ah-miā kap thâi-lâng--ê chòe chı̍t-ē siu-sı̍p--khì.

10

In ê chhiú-tiong ū kan-ok; In ê chiàⁿ-chhiú móa-móa pò͘-lō͘.

11

Lūn-kàu góa, góa beh chiàu góa ê sûn-chôan lâi kiâⁿ; Kiû Lí kiù-sio̍k góa, lîn-bín góa.

12

Góa ê kha khiā tī pîⁿ-tháⁿ ê só͘-chāi, Tī chèng-hōe-tiong, góa beh o-ló Iâ-hô-hoa.