Si-phian 第 28 章 - 巴克禮全羅

1

Tāi-pı̍t ê si.1) Iâ-hô-hoa ah, góa beh kiû-kiò Lí; Góa ê chio̍h-pôaⁿ ah, m̄-thang bô beh thiaⁿ góa. Nā Lí tùi góa chēng-chēng, Góa chiū chhin-chhiūⁿ jı̍p bōng ê lâng chı̍t-iūⁿ.

2

Góa kiû-kiò Lí, ǹg Lí ê chì-sèng-só͘ kia̍h chhiú ê sî, kiû Lí thiaⁿ góa khún-kiû ê siaⁿ.

3

M̄-thang chiong góa kap pháiⁿ-lâng, í-kı̍p chok-gia̍t ê lâng, chòe chı̍t-ē tû--khì. In kap chhù-piⁿ kóng hô-pêng ê ōe, chóng-sī in ê sim kan-hiám.

4

Gōan Lí chiàu in só͘ chòe--ê, iā chiàu in só͘ kiâⁿ ê pháiⁿ-tāi, khóan-thāi in; Gōan Lí chiàu in ê chhiú só͘ chòe--ê, khóan-thāi in; Chiong in só͘ eng-kai tú-tio̍h-ê pò-èng in.

5

In kì-jiân bô liû-sim tī Iâ-hô-hoa só͘ kiâⁿ--ê, Í-kı̍p I ê chhiú só͘ chòe--ê; I chiū beh húi-hōai in, bô beh kiàn-lı̍p in.

6

Iâ-hô-hoa sī eng-kai o-ló--ê, In-ūi I thiaⁿ góa khún-kiû ê siaⁿ.

7

Iâ-hô-hoa sī góa ê khùi-la̍t, ia̍h sī góa ê tîn-pâi. Góa ê sim óa-khò I, góa chiū tit-tio̍h pang-chān. Só͘-í góa ê sim tōa hoaⁿ-hí; Góa beh ēng góa ê si-koa o-ló I.

8

Iâ-hô-hoa sī I ê peh-sìⁿ ê khùi-la̍t; Iā sī I siū boah-iû--ê tit-kiù ê ōe-só͘.

9

Kiû Lí chín-kiù Lí ê peh-sìⁿ, sù-hok Lí ê sán-gia̍p, Iúⁿ-chhī in, hû-chhî in, kàu tī éng-óan.