Si-phian 第 33 章 - 巴克禮全羅

1

Lín gī-lâng ah, tio̍h in-ūi Iâ-hô-hoa lâi hoaⁿ-hí; Chèng-tı̍t ê lâng ê o-ló sī ha̍p-gî.

2

Lín tio̍h tôaⁿ-khîm kám-siā Iâ-hô-hoa; Ēng cha̍p-tiâu hiân ê sek o-ló I.

3

Tio̍h tùi I chhiùⁿ sin ê koa, Tôaⁿ kàu chin hó, siaⁿ-im hiáng-liāng.

4

In-ūi Iâ-hô-hoa ê giân-gú chèng-tı̍t; Hōan I só͘ chòe--ê, it-chīn sī sêng-sı̍t.

5

I hoaⁿ-hí gī-lí kap kong-pêng; Iâ-hô-hoa ê chû-ài móa-móa tī tōe-chiūⁿ.

6

Chiah ê thiⁿ tùi Iâ-hô-hoa ê ōe lâi chō, Thiⁿ--nih ê bān-lūi tùi I ê chhùi ê khì lâi chiâⁿ.

7

I chū-chı̍p hái-chúi chhin-chhiūⁿ kui-tui, Siu-khǹg chhim-ian tī khò͘-pâng.

8

Chôan-tōe tio̍h kèng-ùi Iâ-hô-hoa; Hōan-nā khiā-khí tī sè-chiūⁿ--ê, lóng tio̍h kiaⁿ I.

9

In-ūi I kóng-chhut chiū ū; I bēng-lēng chiū khiā-chāi.

10

Iâ-hô-hoa hō͘ lia̍t-pang ê kè-e̍k kui tī khang-khang; Hō͘ chèng peh-sìⁿ só͘ siūⁿ--ê, bô kong-hāu.

11

Iâ-hô-hoa ê kè-e̍k éng-óan khiā-chāi, I ê sim só͘ siūⁿ--ê kàu bān sè-tāi.

12

Jīn Iâ-hô-hoa chòe i ê Siōng-tè--ê, hit kok ū hok-khì; I kéng-sóan chòe I ê sán-gia̍p--ê, hit ê peh-sìⁿ ū hok-khì.

13

Iâ-hô-hoa tùi thiⁿ teh khòaⁿ; I kàm-chhat lóng-chóng ê sè-kan lâng.

14

I tùi I khiā-khí ê só͘-chāi ǹg gōa-bīn, Khòaⁿ tōe-chiūⁿ it-chhè khiā-khí ê peh-sìⁿ.

15

I sī chō-chiâⁿ in chèng-lâng ê sim--ê, Liû-sim tī in it-chhè ê só͘-chòe--ê.

16

Kun-ông bōe-ōe in-ūi peng chōe tit-tio̍h kiù; Béng-lâng bōe-ōe in-ūi khùi-la̍t tōa tit-tio̍h kiù-chhut.

17

Óa-khò bé tit-tio̍h kiù, sī bô chhái-kang; Bōe-ōe ēng i ê tōa la̍t lâi kiù lâng.

18

Iâ-hô-hoa ê ba̍k-chiu khòaⁿ kèng-ùi I ê lâng, Khòaⁿ ǹg-bāng I ê chû-ài ê lâng;

19

Beh kiù in ê sìⁿ-miā thoat-lī sí-bô, Pó-chûn in ê o̍ah-miā tī ki-hng ê sî.

20

Góan ê sim-sîn pêng-sò͘ thèng-hāu Iâ-hô-hoa; I sī chòe góan ê pang-chān, chòe góan ê tîn-pâi.

21

Góan ê sim beh óa-khò I lâi hoaⁿ-hí, In-ūi góan pêng-sò͘ óa-khò I ê sèng-miâ.

22

Iâ-hô-hoa ah, gōan Lí ê chû-ài lîm-kàu góan, Chiàu góan só͘ ǹg-bāng Lí ê.