Si-phian 第 54 章 - 巴克禮全羅

1

Se-hut lâng lâi tùi Sò-lô kóng, Tāi-pı̍t kiám-m̄-sī bih tī góan hia mah? Hit-sî Tāi-pı̍t chòe chit ê kà-sī ê si; kau hō͘ Ga̍k-koaⁿ; ēng si-hiân ê ga̍k-khì.1) Siōng-tè ah, kiû Lí ēng Lí ê miâ kiù góa; Ēng Lí ê tōa kôan-lêng thòe góa sin-oan.

2

Siōng-tè ah, kiû Lí thiaⁿ góa ê kî-tó; Àⁿ hī-khang thiaⁿ góa ê chhùi só͘ kóng ê ōe.

3

In-ūi gōa-lâng khí-lâi kong-kek góa, Kiông-ok ê lâng siàu-siūⁿ góa ê sìⁿ-miā; In bô kèng-hōng Siōng-tè tī in ê bīn-chêng. [Sè-la̍h

4

Siōng-tè sī pang-chān góa ê, Chú sī hû-chhî góa ê o̍ah-miā ê.

5

I beh chiong góa ê tùi-te̍k só͘ kiâⁿ ê pháiⁿ pò-èng in; Kiû Lí chiàu Lí ê sêng-sı̍t bia̍t-bô in.

6

Góa beh chiong kam-sim ê chè-sū hiàn hō͘ Lí; Iâ-hô-hoa ah, góa beh kám-siā o-ló Lí ê miâ; in-ūi Lí ê miâ sī hó.

7

I kiù góa chhut it-chhè ê hōan-lān; Góa chhin-ba̍k khòaⁿ-kìⁿ góa ê tùi-te̍k tú-tio̍h pò-èng.