Khé-sī-lio̍k 第 19 章 - 巴克禮全羅

1

Chiah ê tāi-chì liáu-āu, góa thiaⁿ-kìⁿ tī thiⁿ-nı̍h ū chhin-chhiūⁿ kui tōa tīn lâng ê tōa siaⁿ kóng, A-lī-lū-iâ; chín-kiù, êng-kng, kôan-lêng lóng sī lán ê Siōng-tè ê;

2

sī I ê sím-phòaⁿ chin-sı̍t koh kong-gī; in-ūi I bat sím-phòaⁿ hit ê tōa îm-hū, chiū-sī ēng i ê îm-lōan pāi-hōai tōe-chiūⁿ ê; koh tùi i thó lâu I ê lô͘-po̍k ê huih ê chōe, lâi sin in ê oan.

3

In koh-chài kóng, A-lī-lū-iâ. Sio i ê ian chhèng chiūⁿ kôaiⁿ, kàu tāi-tāi bô chīn.

4

Hit jī-cha̍p-sì ê tiúⁿ-ló kap sì ê o̍ah mı̍h phak-lo̍h kèng-pài chē tī chō-ūi ê Siōng-tè kóng, À-bēng, A-lī-lū-iâ.

5

Ū siaⁿ tùi chō-ūi chhut-lâi kóng, Hōan-nā lín chòe lán ê Siōng-tè ê lô͘-po̍k, lâi kèng-ùi I ê, bô lūn tōa sòe lóng tio̍h o-ló I.

6

Góa thiaⁿ-kìⁿ ū chhin-chhiūⁿ kui tōa tīn lâng ê siaⁿ, chhin-chhiūⁿ chōe-chōe tiâu chúi ê siaⁿ, chhin-chhiūⁿ lûi tōa tân ê siaⁿ, kóng, A-lī-lū-iâ; in-ūi Chú, lán ê Siōng-tè chôan-lêng ê, chòe ông lah.

7

Lán tio̍h hoaⁿ-hoaⁿ hí-hí, chiong êng-kng kui hō͘ I; in-ūi Iûⁿ-ko hun-in ê kî í-keng kàu, I ê sin-niû í-keng ka-kī pī-pān hó lah.

8

Chiū ū hō͘ i chhēng kng-bêng chheng-khì ê iù-koah pò͘; in-ūi iù-koah pò͘ sī sèng-tô͘ só͘ kiâⁿ ê gī.

9

Koh kā góa kóng, Lí tio̍h siá i, Kìⁿ-nā siū tiàu lâi hù Iûⁿ-ko ê hun-iân ê, ū hok-khì. Koh kā góa kóng, chiah-ê sī Siōng-tè chin-sı̍t ê ōe.

10

Góa chiū phak tī i ê kha-chêng beh pài i. I kā góa kóng, Chhian-bān m̄ thang; góa kap lí í-kı̍p lí ê hiaⁿ-tī ū Iâ-so͘ ê kan-chèng ê, pîⁿ-pîⁿ sī chòe lô͘-po̍k; lí tio̍h pài Siōng-tè; in-ūi Iâ-so͘ ê kan-chèng chiū-sī sian-ti ê sîn.

11

Góa koh khòaⁿ-kìⁿ thiⁿ khui, chiū khòaⁿ-kìⁿ ū chı̍t chiah pe̍h bé, khiâ i ê chheng chòe Tiong-sìn Chin-sı̍t; I ê sím-phòaⁿ kap kau-chiàn bô m̄ kong-gī.

12

I ê ba̍k-chiu sī hé-iām; thâu-khak téng tì chōe-chōe ông-bō; koh ū miâ siá-teh, tû-khì I pún-sin í-gōa bô lâng ōe bat.

13

I chhēng hiù huih ê saⁿ; I ê miâ chheng chòe Siōng-tè ê Tō.

14

Tī thiⁿ-nı̍h ê kun-peng khiâ pe̍h bé lâi tè I, lóng chhēng iù-koah, pe̍h koh chheng-khì.

15

Koh ū lāi kiàm tùi I ê chhùi chhut, thang ēng i lâi phah lia̍t-pang; I iā beh ēng thih-kóaiⁿ tī-lí in; I iā beh ta̍h chôan-lêng ê Siōng-tè tōa siū-khì ê chiú-khut.

16

Tī I ê saⁿ kap kha-thúi ū siá chı̍t ê miâ kóng, Bān ông ê Ông, bān chú ê Chú.

17

Góa koh khòaⁿ-kìⁿ chı̍t ê thiⁿ-sài khiā tī jı̍t-thâu ê tiong-ng, tōa siaⁿ âu-kiò, kā thiⁿ-tiong lóng-chóng ê pe-chiáu kóng,

18

Lâi chū-chı̍p hù Siōng-tè ê tōa iân-sia̍h, thang lâi chia̍h chiah ê ông ê bah, chhian-chóng ê bah, ióng-sū ê bah, bé kap khiâ bé ê lâng ê bah, hōan-nā chū-iû ê, chòe lô͘-po̍k ê, sī-sòe sī-tōa ê bah.

19

Góa koh khòaⁿ-kìⁿ siù kap tōe-chiūⁿ chiah ê ông kap in ê kun-peng lóng chū-chı̍p, beh kap khiâ bé ê í-kı̍p I ê kun-peng kau-chiàn.

20

Siù chiū siū lia̍h, hit ê ké ê sian-ti iā kap i tâng siū lia̍h, chiū-sī chêng bat tī siù ê bīn-chêng kiâⁿ sîn-jiah, lâi bê-he̍k hiah ê siū-tio̍h siù ê kì-hō, í-kı̍p pài siù ê siōng ê, chit nn̄g ê o̍ah-o̍ah hiat tī jiû-n̂g teh sio ê hé-ô͘.

21

Kî-û-ê hō͘ hit ê khiâ-bé ê chhùi-lāi só͘ chhut ê kiàm thâi-sí in. Chèng chiáu lóng chia̍h in ê bah kàu pá.