Lô-má 第 15 章 - 巴克禮全羅

1

Lán chiah ê ōe ê lâng eng-kai tio̍h tam-tài bōe ê lâng ê lóan-jio̍k, m̄ thang kiû ka-kī ê hoaⁿ-hí.

2

Lán ta̍k lâng tio̍h hō͘ chhù-piⁿ hoaⁿ-hí, hō͘ in tit-tio̍h hó lâi kiàn-lı̍p.

3

In-ūi Ki-tok iā bô kiû ka-kī ê hoaⁿ-hí, chiū-sī chiàu só͘ kì-chài kóng, Lâng lóe-mē lí ê lóe-mē ū kàu tī góa.

4

In-ūi chá só͘ kì-chài ê, lóng sī beh kà-sī lán, chiah lâi kì; hō͘ lán tùi thun-lún, tùi sèng-keng ê an-ùi, lâi tit-tio̍h ǹg-bāng.

5

Gōan siúⁿ-sù thun-lún an-ùi ê Siōng-tè hō͘ lín tāi-ke tâng sim-chì chiàu Ki-tok Iâ-so͘,

6

hō͘ lín chı̍t iūⁿ sim chı̍t iūⁿ chhùi êng-kng Siōng-tè, chiū-sī lán ê Chú Iâ-so͘ Ki-tok ê Pē.

7

Só͘-í tio̍h saⁿ chiap-la̍p, chhin-chhiūⁿ Ki-tok iā ū chiap-la̍p lín, tì-kàu êng-kng kui tī Siōng-tè.

8

In-ūi góa kóng, Ki-tok ūi-tio̍h Siōng-tè ê chin-sı̍t bat chòe hōng kat-lé ê lâng ê chhe-ēng, beh kian-kò͘ só͘ èng-ún lia̍t-chó͘ ê;

9

iā hō͘ gōa-pang lâng ūi-tio̍h lîn-bín kui êng-kng Siōng-tè, chiàu só͘ kì-chài, kóng, In-ūi án-ni góa tī gōa-pang tiong beh chheng-ho͘ lí, Chhiùⁿ koa o-ló lí ê miâ.

10

Koh kóng, Lín gōa-pang lâng, tio̍h kap I ê peh-sìⁿ tâng hoaⁿ-hí.

11

Iū-koh kóng, Lín chèng gōa-pang tio̍h chheng-chàn Chú, Lín bān peh-sìⁿ tio̍h o-ló I.

12

Iū-koh Í-sài-a kóng, Beh ū Iâ-se ê kun-thâu, Kap heng-khí lâi tī-lí gōa-pang ê, Gōa-pang beh óa-khò I lâi ū ǹg-bāng.

13

Gōan siúⁿ-sù ǹg-bāng ê Siōng-tè hō͘ lín tùi sìn lâi chhiong-móa ta̍k iūⁿ ê hoaⁿ-hí pêng-an; hō͘ lín tī Sèng Sîn ê kôan-lêng tit-tio̍h móa-móa ê ǹg-bāng.

14

Góa ê hiaⁿ-tī ah, góa ka-kī iā chhim sìn lín móa-móa siān-liông, chhiong-chiok ta̍k iūⁿ ê tì-sek, iā ōe tāi-ke saⁿ khòan-bián.

15

Chóng-sī góa siá phoe hō͘ lín, ū tām-po̍h khah hó-táⁿ, beh hō͘ lín koh ōe kì-tit; che sī tùi Siōng-tè só͘ hō͘ góa ê un-tián,

16

hō͘ góa tī gōa-pang chòe Ki-tok Iâ-so͘ ê chip-sū, ēng Siōng-tè ê hok-im lâi ho̍k-sāi, beh hō͘ só͘ hiàn ê gōa-pang lâng, tī Sèng Sîn chiâⁿ-sèng ê tit-tio̍h chiap-la̍p.

17

Só͘-í lūn Siōng-tè ê sū, góa tī Ki-tok Iâ-so͘ ū thang khoa-kháu.

18

In-ūi tû Ki-tok ēng góa só͘ kiâⁿ ê í-gōa, góa m̄ káⁿ kóng sím-mı̍h; chí ū kóng I ēng góa ê giân-gú kap kiâⁿ-chòe,

19

tī sîn-jiah kap kî-sū ê kôan-lêng, kap tī Sèng Sîn ê kôan-lêng, hō͘ gōa-pang sūn-ho̍k; án-ni góa tùi Iâ-lō͘-sat-léng se̍h kàu Í-lī-lí-kó͘, piàn thôan Ki-tok ê hok-im.

20

Koh góa lı̍p-chì thôan hok-im bô tī Ki-tok í-keng siū chheng-ho͘ ê só͘-chāi, kiaⁿ-liáu khí tī pa̍t lâng ê tōe-ki téng;

21

chiū-sī chiàu só͘ kì-chài kóng, Bē tit-tio̍h I ê siau-sit ê beh khòaⁿ-kìⁿ, Bē thiaⁿ-kìⁿ ê beh hiáu-ngō͘.

22

In-ūi án-ni góa chōe-chōe pái tú-tio̍h chó͘-tòng, bōe tit thang chiū-kūn lín;

23

nā-sī hiān-kim tī chiah ê tōe-hng bô koh ū só͘-chāi thang khì, í-keng chōe-chōe nî ū him-bō͘ beh chiū-kūn lín;

24

thèng-hāu góa khì Sū-pan-ngá ê sî, (in-ūi góa ǹg-bāng keng-kè ê sî kìⁿ-tio̍h lín, tāi-seng kap lín kau-pôe lio̍h-lio̍h-á móa-ì, āu-lâi tit-tio̍h lín sòng-hêng khì hia);

25

chóng-sī hiān-chāi góa khì Iâ-lō͘-sat-léng kiong-kip sèng-tô͘.

26

In-ūi Má-kî-tùn A-kai-a lâng hoaⁿ-hí saⁿ-kap tôe-iân pang-chān Iâ-lō͘-sat-léng sèng-tô͘ tiong ê sòng-hiong lâng.

27

In chin-chiàⁿ sī hoaⁿ-hí; khiok iā sī khiàm in ê chè. In-ūi gōa-pang lâng kì-jiân saⁿ-kap ū hūn tī in sîn-lêng ê sū, chū-jiân tio̍h ēng jio̍k-thé ê mı̍h ho̍k-sāi in.

28

Thèng-hāu góa chòe ôan chit ê sū, chiong chit ê iân-hāng kau-hù in bêng-pe̍k, góa beh tùi lín hia khì Sū-pan-ngá.

29

Góa iā chai chiū-kūn lín ê sî, beh ū Ki-tok hong-sēng ê chiok-hok sūn-sòa khì.

30

Hiaⁿ-tī ah, góa tùi lán ê Chú Iâ-so͘ Ki-tok, iā tùi Sèng Sîn ê thiàⁿ, khǹg lín kap góa tâng chīn-la̍t, thòe góa kî-kiû Siōng-tè,

31

kiù góa thoat-lī Iû-thài tōe hiah ê m̄ sūn-ho̍k ê lâng, iā hō͘ góa ūi-tio̍h Iâ-lō͘-sat-léng só͘ chòe kiong-kip ê sū tit-tio̍h sèng-tô͘ chiap-la̍p;

32

hō͘ góa tùi Siōng-tè ê chí-ì kàu lín hia ū hoaⁿ-hí, iā kap lín saⁿ-kap tit-tio̍h an-hioh.

33

Gōan siúⁿ-sù pêng-an ê Siōng-tè kap lín chèng lâng tī-teh: À-bēng.