Lô-má 第 2 章 - 巴克禮全羅

1

Só͘-í kìⁿ-nā gí-tòan lâng ê lâng ah, lí bô thang the-thok; in-ūi lí só͘ gí-tòan pa̍t lâng ê, tú-tú sī gí-tiāⁿ ka-kī; in-ūi lí teh gí-tòan lâng, ka-kī iā án-ni kiâⁿ.

2

Nā-sī lán chai Siōng-tè sī chiàu chin-lí lâi gí-tòan kiâⁿ án-ni ê lâng.

3

Lí chit hō lâng ah, lâng kiâⁿ án-ni lí gí-tòan i, iā lí ka-kī khì kiâⁿ; lí phah-sǹg ōe tô-siám Siōng-tè ê gí-tòan mah?

4

Á-sī khòaⁿ-khin I ke̍k-tōa ê jîn-chû, khoan-iông, thun-lún, m̄ chai-kioh Siōng-tè ê jîn-chû sī beh chhōa lí hóan-hóe?

5

kèng-jiân chiàu lí ê ngī sim kap m̄ hóan-hóe ê sim, ūi ka-kī chek-chū siū-khì tī siū-khì ê jı̍t, chiū-sī Siōng-tè gī ê sím-phòaⁿ hián-bêng ê jı̍t;

6

I beh chiàu ta̍k lâng ê só͘ kiâⁿ lâi pò-èng i;

7

kìⁿ-nā mî-nōa kiâⁿ hó, kiû êng-kng, chun-kùi kap bōe pāi-hōai ê, chiong éng-o̍ah pò i;

8

kìⁿ-nā kiat-tóng, bô thàn chin-lí lâi thàn put-gī ê, chiū ū òan-hūn kap siū-khì,

9

hōan-lān kap khùn-khó͘, kàu tī lóng-chóng kiâⁿ pháiⁿ ê lâng, tāi-seng Iû-thài, āu-lâi Hi-lī-nî;

10

iā êng-kng, chun-kùi, pêng-an kàu tī lóng-chóng kiâⁿ hó ê lâng, tāi-seng Iû-thài, āu-lâi Hi-lī-nî.

11

In-ūi Siōng-tè bô chiàu gōa-māu chhú lâng.

12

In-ūi kìⁿ-nā bô lu̍t-hoat lâi hōan-chōe ê, iā beh bô lu̍t-hoat lâi tîm-lûn; kìⁿ-nā tī lu̍t-hoat lâi hōan-chōe ê, beh tùi lu̍t-hoat siū sím-phòaⁿ.

13

In-ūi tī Siōng-tè ê bīn-chêng, m̄ sī thiaⁿ lu̍t-hoat ê chòe gī, chiū-sī kiâⁿ lu̍t-hoat ê beh chheng-chòe-gī.

14

In-ūi bô lu̍t-hoat ê gōa-pang lâng, tùi pún sèng lâi kiâⁿ lu̍t-hoat ê sî, in sui-jiân bô lu̍t-hoat, sī ka-kī chòe ka-kī ê lu̍t-hoat;

15

sī hián-bêng lu̍t-hoat ê kong-iōng khek tī in ê sim, in ê liông-sim saⁿ-kap chòe kan-chèng, in ê liām-thâu ū-sî saⁿ chek-pī ū-sî saⁿ khoan-sù;

16

tī Siōng-tè ēng Iâ-so͘ Ki-tok sím-phòaⁿ lâng ún-ba̍t ê sū hit jı̍t, chiàu góa ê hok-im só͘ kóng.

17

Lí nā chheng chòe Iû-thài lâng, óa-khò lu̍t-hoat, lia̍h Siōng-tè lâi chòe khoa-kháu,

18

í-keng tùi lu̍t-hoat lâi ha̍k-sı̍p, chai I ê chí-ì, koh giām-chhut hiah ê chì hó ê,

19

koh chhim sìn ka-kī sī chòe chhiⁿ-mî lâng ê chhōa-lō͘ ê, tiàm-tī o͘-àm ê ê kng,

20

gōng lâng ê sian-siⁿ, gín-ná ê kàu-sı̍p, tī lu̍t-hoat lāi ū tì-sek kap chin-lí ê bô͘-iūⁿ;

21

lí kà-sī pa̍t lâng, iā bô kà-sī ka-kī ah? lí soan-thôan kóng m̄ thang thau-the̍h, iā ka-kī thau-the̍h ah?

22

Lí kóng m̄ thang kiâⁿ-îm, iā ka-kī kan-îm ah? lí iàm-ò͘ⁿ ngó͘-siōng, iā ka-kī chhiúⁿ keng-biō ah?

23

lí lia̍h lu̍t-hoat chòe khoa-kháu, chiū tùi hōan-tio̍h lu̍t-hoat lêng-jio̍k Siōng-tè ah?

24

In-ūi Siōng-tè ê miâ ūi-tio̍h lín siū pòng-to̍k tī gōa-pang tiong, chiàu só͘ kì-chài ê.

25

Lí nā kiâⁿ lu̍t-hoat, kat-lé chiū ū lī-ek; lí nā hōan-tio̍h lu̍t-hoat, chiū lí ê kat-lé pìⁿ chòe bô kat-lé.

26

Só͘-í bô siū kat-lé ê nā siú lu̍t-hoat ê kui-lē, i ê bô kat-lé kiám bô beh sǹg-chòe kat-lé mah?

27

Koh seng-sêng bô kat-lé lâi chīn lu̍t-hoat ê, kiám bô beh gí-tòan lí tùi bûn-jī kap kat-lé lâi hōan hoat mah?

28

In-ūi gōa-phê chòe Iû-thài lâng ê m̄ sī Iû-thài lâng; tī jio̍k-thé gōa-phê ê kat-lé m̄ sī kat-lé.

29

To̍k-to̍k lāi-bīn chòe Iû-thài lâng ê chiah sī Iû-thài lâng, iā sim-lāi ê kat-lé chiah sī kat-lé, chāi-tī sîn, put-chāi tī bûn-jī; i ê tit-tio̍h o-ló m̄ sī tùi lâng, chiū-sī tùi Siōng-tè.