Lô-má 第 8 章 - 巴克禮全羅

1

Só͘-í hiah ê tiàm-tī Ki-tok Iâ-so͘ ê, taⁿ lóng bô tēng chōe.

2

In-ūi o̍ah-miā ê Sîn ê hoat, tī Ki-tok Iâ-so͘ í-keng tháu-pàng góa thoat-lī chōe kap sí ê hoat.

3

In-ūi lu̍t-hoat só͘ bōe-ōe ê, sī tùi jio̍k-thé chiah bô la̍t, Siōng-tè chiū chhe ka-kī ê Kiáⁿ, tī ū chōe ê jio̍k-thé ê hêng-chōng, koh ūi-tio̍h chōe ê iân-kò͘, tī jio̍k-thé tiong lâi gí-tiāⁿ chōe-ok;

4

hō͘ lu̍t-hoat ê gī tī lán ōe tit móa-chiok, chiū-sī bô chiàu jio̍k-thé, sī chiàu sîn lâi kiâⁿ ê.

5

In-ūi chiàu jio̍k-thé ê, ì-hiòng jio̍k-thé ê sū; chiàu sîn ê, ì-hiòng sîn ê sū.

6

In-ūi jio̍k-thé ê ì-hiòng sī sí; sîn ê ì-hiòng sī o̍ah koh pêng-an.

7

In-ūi jio̍k-thé ê ì-hiòng sī tùi-te̍k Siōng-tè, in-ūi i bô hâng-ho̍k Siōng-tè ê lu̍t-hoat, iā bōe-ōe hâng-ho̍k.

8

Koh tiàm-tī jio̍k-thé ê, bōe-ōe hō͘ Siōng-tè hoaⁿ-hí.

9

To̍k-to̍k Siōng-tè ê Sîn nā khiā-khí tī lín, chiū lín bô tiàm-tī jio̍k-thé, sī tiàm-tī sîn; bô ū Ki-tok ê Sîn ê, m̄ sī I ê lâng.

10

Ki-tok nā tiàm-tī lín, chiū lín ê seng-khu in-ūi chōe sí, sîn in-ūi gī o̍ah.

11

To̍k-to̍k hō͘ Iâ-so͘ tùi sí-lâng tiong koh-o̍ah ê, I ê Sîn nā khiā-khí tī lín, chiū hō͘ Ki-tok Iâ-so͘ tùi sí-lâng tiong koh-o̍ah ê, iā beh chiong I ê Sîn, chiū-sī khiā-khí tī lín ê, hō͘ lín ōe sí ê seng-khu koh-o̍ah.

12

Án-ni hiaⁿ-tī ah, lán m̄ sī khiàm jio̍k-thé ê chè, tì-kàu chiàu jio̍k-thé lâi o̍ah.

13

In-ūi lín nā chiàu jio̍k-thé lâi o̍ah, chiū ōe sí; nā ēng sîn phah-sí seng-khu ê só͘ chòe, chiū ōe o̍ah.

14

Hōan-nā hō͘ Siōng-tè ê Sîn só͘ chhōa ê, sī chòe Siōng-tè ê kiáⁿ.

15

In-ūi lín m̄ sī siū-tio̍h lô͘-po̍k ê sîn, tì-kàu koh kiaⁿ-hiâⁿ; chiū-sī siū-tio̍h siat-lı̍p chòe kiáⁿ ê sîn, tùi án-ni lán kiò kóng, Á-pà, Pē ah.

16

Sèng Sîn ka-kī kap lán ê sîn saⁿ-kap kan-chèng lán chòe Siōng-tè ê kiáⁿ.

17

Kì-jiân chòe kiáⁿ chiū chòe hō͘-sû, chiū-sī chòe Siōng-tè ê hō͘-sû, kap Ki-tok tâng chòe hō͘-sû; lán nā kap I tâng siū khó͘, sī beh hō͘ lán kap I tâng êng-kng.

18

In-ūi góa sǹg hiān-sî ê kan-khó͘ bōe kham-tit pí-phēng só͘ beh hián-bêng kàu tī lán ê êng-kng.

19

In-ūi siū-chō ê mı̍h kia̍h thâu ǹg-bāng, teh thèng-hāu Siōng-tè chèng kiáⁿ ê hián-bêng.

20

In-ūi siū-chō ê mı̍h hâng-ho̍k tī khang-hu, m̄ sī i kam-gōan, chiū-sī tùi hit ê hō͘ i hâng-ho̍k ê;

21

sī teh ǹg-bāng liân siū-chō ê mı̍h iā beh tit-tio̍h tháu-pàng, thoat-lī pāi-hōai ê khu-sok, lâi jı̍p tī Siōng-tè ê kiáⁿ-jî êng-kng ê chū-iû.

22

In-ūi lán chai it-chhè siū-chō ê mı̍h kàu chit sî iáu teh saⁿ-kap thó͘-khùi khó͘-thàng.

23

M̄ nā án-ni, chiū lán pún-sin tit-tio̍h Sèng Sîn thâu-chúi ê ké-chí ê, iā sim-lāi ka-kī thó͘-khùi, teh thèng-hāu siat-lı̍p chòe kiáⁿ, chiū-sī lán ê seng-khu ê sio̍k-hôe.

24

In-ūi lán tit kiù sī tùi ǹg-bāng; nā-sī í-keng khòaⁿ-kìⁿ ê ǹg-bāng, m̄ sī ǹg-bāng; in-ūi só͘ khòaⁿ-kìⁿ ê, sím-mı̍h lâng teh ǹg-bāng i?

25

To̍k-to̍k lán nā ǹg-bāng hit ê só͘ bô khòaⁿ-kìⁿ ê, lán chiū thun-lún thèng-hāu.

26

Koh Sèng Sîn iā chhin-chhiūⁿ án-ni hû-chhî lán ê nńg-chiáⁿ; in-ūi lán m̄ chai-iáⁿ tio̍h cháiⁿ-iūⁿ kî-tó chiàu só͘ eng-kai ê; to̍k-to̍k Sèng Sîn ka-kī ēng bōe kóng-chhut ê thó͘-khùi thòe lán kiû.

27

Kàm-chhat lâng ê sim ê iā chai Sèng Sîn ê ì-sù, in-ūi I chiàu Siōng-tè ê ì-sù lâi thòe sèng-tô͘ kiû.

28

Koh lán chai bān hāng sū saⁿ-kap lâi hō͘ thiàⁿ Siōng-tè ê lâng tit-tio̍h lī-ek, chiū-sī chiàu I tiāⁿ-tio̍h ê chí-ì lâi siū tiàu ê.

29

In-ūi I só͘ tāi-seng chai ê, chiū tāi-seng tiāⁿ-tio̍h in kap I ê Kiáⁿ ê siōng tâng khóan, hō͘ I tī chōe-chōe hiaⁿ-tī ê tiong-kan chòe tōa kiáⁿ.

30

Koh só͘ tāi-seng tiāⁿ-tio̍h ê, chiū tiàu in; só͘ tiàu ê, chiū chheng in chòe gī; só͘ chheng-chòe-gī ê, chiū hō͘ in ū êng-kng.

31

Lūn-kàu chiah ê sū lán beh cháiⁿ-iūⁿ kóng? Siōng-tè nā ūi lán, chī-chūi ōe tùi-te̍k lán?

32

I kì-jiân bô sioh ka-kī ê Kiáⁿ, ūi-tio̍h lán chèng lâng hiàn I, kiám bô sòa chiong bān mı̍h pe̍h-pe̍h hō͘ lán mah?

33

Chī-chūi beh kò Siōng-tè só͘ kéng ê peh-sìⁿ ah? Chheng in chòe gī ê sī Siōng-tè;

34

chī-chūi tēng in ê chōe ah? Ki-tok Iâ-so͘ í-keng sí, siōng-chhiáⁿ tùi sí-lâng tiong koh khí-lâi, chē tī Siōng-tè ê tōa pêng, iā thòe lán kî-tó.

35

Chī-chūi beh keh-tn̄g lán tī Ki-tok ê thiàⁿ? He̍k-sī hōan-lān, he̍k-sī khùn-khó͘, he̍k-sī khún-tio̍k, he̍k-sī iau-gō, he̍k-sī thǹg-theh, he̍k-sī gûi-hiám, he̍k-sī lāi-to ah?

36

Chhin-chhiūⁿ só͘ kì-chài, kóng, Góan ūi-tio̍h lí ê iân-kò͘ chiong jı̍t siū sí, Khòaⁿ chòe chhin-chhiūⁿ beh thâi ê iûⁿ.

37

Hóan-tńg tī chiah ê lóng-chóng ê sū, lán tùi thiàⁿ lán ê, tek-sèng kàu ū chhun.

38

In-ūi góa chhim sìn bô lūn sī sí, sī o̍ah, sī thiⁿ-sài, sī chiáng-kôan ê, sī hiān-kim ê, sī chiong-lâi ê, ū kôan-lêng ê,

39

sī kôaiⁿ, sī chhim, á-sī pa̍t ê siū-chō ê mı̍h, lóng bōe-ōe keh-tn̄g lán tī Siōng-tè ê thiàⁿ, chiū-sī tī lán ê Chú Ki-tok Iâ-so͘ só͘ ū ê thiàⁿ.