Lō͘-tek-kì 第 2 章 - 巴克禮全羅

1

Ná-o-bí ū i ê tiōng-hu ê chhin-lâng, chiū-sī Í-lī-bí-le̍k ê kai-chhin, ū chı̍t-lâng miâ kiò Pho-a-su, sī tōa hó-gia̍h ê lâng.

2

Mô͘-ap ê cha-bó͘-kiáⁿ Lō͘-tek kā Ná-o-bí kóng, Hō͘ góa khì hn̂g-nih, góa nā tit-tio̍h un-tián tī sím-mı̍h lâng ê bīn-chêng, chiū thang tī hit-lâng ê āu-bīn khioh be̍h-seh. I kā i kóng, Góa ê cha-bó͘-kiáⁿ ah, chòe lí khì.

3

I chiū khì; í-keng kàu, chiū tè koah-be̍h ê lâng tī hn̂g-nih khioh be̍h-seh; i chhàu-khám kàu Í-lī-bí-le̍k ê kai-chhin Pho-a-su ê chı̍t khu hn̂g.

4

Pho-a-su tùi Pek-lī-hêng lâi, tùi koah-be̍h ê lâng kóng, Gōan Iâ-hô-hoa kap lín tī-teh. In ìn kóng, Gōan Iâ-hô-hoa sù-hok lí.

5

Pho-a-su mn̄g i só͘ phài koah-be̍h ê thâu-lâng kóng, Hit-ê sī sím-mı̍h lâng ê cha-bó͘-kiáⁿ?

6

Koah-be̍h ê thâu-lâng ìn kóng, Chit-ê sī Mô͘-ap ê cha-bó͘-kiáⁿ, kap Ná-o-bí tùi Mô͘-ap tōe tò-lâi-ê;

7

i kóng, Chhiáⁿ lí chún góa khioh be̍h-seh, tī koah-be̍h-ê ê āu-bīn, tī kui-khún-tiong khioh i; i chiū lâi, tùi chá-khí kàu taⁿ, tiāⁿ-tiāⁿ tòa chia; chí-ū hioh tī chhù-lāi tiap-á-kú.

8

Pho-a-su kā Lō͘-tek kóng, Góa ê cha-bó͘-kiáⁿ ah, lí tio̍h thiaⁿ; bo̍h-tit khì pa̍t khu hn̂g khioh be̍h-seh, iā bo̍h-tit lī-khui chia, tio̍h án-ni kap góa chiah ê lú-pī chòe-tīn;

9

lí tio̍h khòaⁿ in tī toh-lo̍h chı̍t-khu teh siu-koah, chiū tè in khì; góa kiám bô hoan-hù hiah ê siàu-liân lâng m̄-thang bong-tio̍h lí? lí nā chhùi-ta, chiū khì hiah ê khì-kū hia, lim siàu-liân lâng só͘ chhiūⁿ-ê.

10

I chiū phak tī tōe-nih pài i, kā i kóng, Góa sī gōa-kok lâng, cháiⁿ-iūⁿ ōe tit-tio̍h un-tián tī lí ê bīn-chêng, án-ni khòaⁿ-kò͘ góa ah?

11

Pho-a-su ìn kóng, Tùi lí ê tiōng-hu sí liáu-āu, kìⁿ lí khóan-thāi ta-ke ê sū, koh lí lī-khui pē-bú kap lí chhut-sì ê só͘-chāi, lâi kàu lí pêng-sò͘ m̄-bat ê peh-sìⁿ chia, lâng lóng ū kā góa kóng-bêng lah.

12

Gōan Iâ-hô-hoa pò-tap lí ê só͘-chòe; lí lâi hioh tī Iâ-hô-hoa Í-sek-lia̍t Siōng-tè ê sı̍t-ē, gōan lí tit-tio̍h I ê tōa siúⁿ-sù.

13

I kóng, Góa ê chú ah, gōan góa tit-tio̍h un-tián tī lí ê bīn-chêng; góa sui-jiân bōe pí-tit lí ê lú-pī ê chı̍t-ê, lí iáu-kú an-ùi góa, tùi lí ê lú-pī kóng hó ōe.

14

Chia̍h ê sî Pho-a-su kā i kóng, Lí lâi chia chia̍h-piáⁿ, ēng lí hit-tè ùn chhò͘. I chiū chē tī koah-be̍h ê lâng ê piⁿ-thâu; in the̍h hang ê be̍h-sūi hō͘ i; i chia̍h-pá iáu ū chhun. I khí-lâi khì khioh be̍h-seh.

15

Pho-a-su hoan-hù siàu-liân lâng kóng, I chiū nā tī kui-khún ê tiong-kan khioh be̍h-seh iā tio̍h iông-ún i, m̄-thang hō͘ i kiàn-siàu;

16

iā tio̍h tùi kui-khún-ê thiu tām-po̍h, pàng tī tōe-nih hō͘ i khioh, m̄-thang hoah i.

17

Án-ni tī hn̂g-nih khioh be̍h-seh, kàu ê-hng, chiū phah i só͘ khioh ê, iok-lio̍k chı̍t i-hoat ê tōa-be̍h.

18

I tòa i só͘ khioh-ê jı̍p siâⁿ, hō͘ i ê ta-ke khòaⁿ; iā chiong i chia̍h-pá só͘-chhun-ê the̍h-chhut-lâi hō͘ i.

19

Ta-ke mn̄g i kóng, Lí kin-á-jı̍t tī toh-lo̍h khioh be̍h-seh? tī toh-lo̍h chòe-kang ah? Gōan hit ê khòaⁿ-kò͘ lí ê tit-tio̍h hok-khì. I chiū kā ta-ke kóng i tī toh-lo̍h chòe-kang, kóng, Kin-á-jı̍t góa chòe-kang tī-hia, hit-lâng miâ-kiò Pho-a-su.

20

Ná-o-bí kā i ê sim-pū kóng, Gōan i tit-tio̍h Iâ-hô-hoa sù-hok, chiū-sī si-un hō͘ o̍ah-lâng sí-lâng bô soah ê. Ná-o-bí koh kóng, Hit-lâng sī lán ê chhin-lâng, sī lán kai-chhin ê chı̍t-ê thang sio̍k-hôe lán ê sán-gia̍p.

21

Mô͘-ap ê cha-bó͘-kiáⁿ Lō͘-tek kóng, I iā ū kā góa kóng, Lí tio̍h kun-tè góa hiah ê siàu-liân lâng, tı̍t-kàu in kā góa siu-koah bêng-pe̍k.

22

Ná-o-bí kā i ê sim-pū Lō͘-tek kóng, Góa ê cha-bó͘-kiáⁿ ah, lí kap i ê lú-pī chhut-khì, sī hó; bô hō͘ lâng khòaⁿ-kìⁿ lí tī pa̍t-lâng ê hn̂g.

23

Tùi án-ni i kap Pho-a-su ê lú-pī chòe-tīn khioh be̍h-seh, kàu tōa-be̍h sió-be̍h siu bêng-pe̍k; i iû-gôan kap ta-ke saⁿ-kap tòa.