Ngá-ko 第 8 章 - 巴克禮全羅

1

Khó͘ bōe tit-tio̍h lí chòe góa ê hiaⁿ-tī, Bat suh góa lāu-bú ê ni ê; Chiū góa nā tī gōa-bīn tú-tio̍h lí, chiū kap lí chim-chhùi, Iā bô lâng ōe khòaⁿ-khin góa.

2

Góa beh ín-chhōa lí, chhōa lí jı̍p góa lāu-bú ê ke, I beh kà-sī góa; Góa beh hō͘ lí lim tiau-hô ê chiú, kap sia̍h-liû ê chiap.

3

I ê tò-chhiú ōe phô͘ góa ê thâu-khak, I ê chiàⁿ-chhiú beh phō góa.

4

Iâ-lō͘-sat-léng ê chèng cha-bó͘-gín-ná ah, Góa chhiat-chhiat hoan-hù lín, Bo̍h-tit phah-chhíⁿ i, bo̍h-tit kiáu-jiáu góa só͘-thiàⁿ-ê, Thèng-hāu i ka-kī chêng-gōan.

5

Hit-ê khò tī i só͘ lôan-ài-ê, tùi khòng-iá chiūⁿ-lâi-ê, Che sī chī-chūi? Góa tī pîn-kó chhiū-ē kiò-chhíⁿ lí, Lí ê lāu-bú tī-hia keng-kè thòng-khó͘, Tī-hia keng-kè thòng-khó͘ siⁿ lí.

6

Kiû lí chiong góa hē tī lí ê sim, chhin-chhiūⁿ ìn, hē tī lí ê chhiú-kut chhin-chhiūⁿ ìn; In-ūi ài-chêng ū tōa-la̍t chhin-chhiūⁿ sí, Tò͘-khī chân-jím chhin-chhiūⁿ im-hú; Só͘ hoat-chhut ê jia̍t-iām chhin-chhiūⁿ hé-iām; Sī ke̍k béng-lia̍t ê iām-hé.

7

Chōe-chōe chúi bōe-ōe bia̍t ài-chêng, Tōa-chúi iā bōe-ōe im-ba̍t i; Nā ū lâng beh ēng ke-lāi chôan-gia̍p ōaⁿ ài-chêng, Tek-khak hō͘ lâng biáu-sī.

8

Góan ū chı̍t ê sòe-hàn sió-bē, iáu-bē tióng-sêng, Lâng lâi kóng chhin-chiâⁿ ê jı̍t, Góan tio̍h kā góan ê sió-bē cháiⁿ-iūⁿ siat-hoat?

9

I nā sī chhiûⁿ, góan beh tī i ê téng-bīn khí gûn-thah, I nā sī mn̂g, góan beh ēng pek-hiuⁿ-chhâ pán ûi i.

10

Góa sī chhiûⁿ, góa ê lin chhin-chhiūⁿ lâu-koh; Hit-sî góa tī i ê ba̍k-chiu-tiong chhin-chhiūⁿ tit-tio̍h pêng-an ê lâng.

11

Só͘-lô-bûn tī Pa-le̍k-hap-bûn ū chı̍t khu phû-tô-hn̂g; I chiong chit ê phû-tô-hn̂g cho͘-hō͘ kò͘-siú ê lâng; In ta̍k-lâng ūi-tio̍h in ê ké-chí tio̍h la̍p chı̍t-chheng gûn.

12

Góa ê phû-tô-hn̂g, góa ka-kī-ê, sī tī góa ê bīn-chêng; Só͘-lô-bûn ah, hit chı̍t-chheng kui hō͘ lí, Nn̄g-pah kui hō͘ kò͘-siú ké-chí ê lâng.

13

Lí tiàm tī hn̂g-tiong ê, tâng-phōaⁿ lóng ài thiaⁿ lí ê siaⁿ, Kiû lí hō͘ góa iā tit-tio̍h thiaⁿ-kìⁿ.

14

Góa só͘ lôan-ài-ê ah, lí tio̍h kín-kín lâi, Chhin-chhiūⁿ lêng-iông á-sī lo̍k-á tī phang-chháu ê soaⁿ.