Thē-to 第 2 章 - 巴克禮全羅

1

Hiah ê ha̍p tī toan-chiàⁿ ê kà-sī ê, lí tio̍h kóng i,

2

chiū-sī lāu lâng m̄ thang ài chia̍h chiú, tio̍h toan-chong, siú-kí, koh tī sìn, tī jîn-ài, tī thun-lún, bô m̄ sûn-chôan.

3

Lāu hū-jîn-lâng iā tio̍h án-ni, hêng-tōng kú-chí tio̍h ha̍p tī kèng-khiân, bo̍h-tit húi-pòng, iā bo̍h-tit chòe chiú ê lô͘-châi, tio̍h ēng hó kà-sī lâng;

4

chiah thang kàu-tok siàu-liân ê hū-jîn-lâng thiàⁿ in ê tiōng-hu, thiàⁿ in ê kiáⁿ-jî,

5

siú-kí, cheng-kiat, liāu-lí ke sū, siān-liông, sūn-ho̍k ka-kī ê tiōng-hu, bián-tit Siōng-tè ê tō-lí siū-tio̍h pòng-to̍k.

6

Siàu-liân ê ta-po͘-lâng, lí iā tio̍h án-ni khǹg in siú-kí.

7

Lí hōan sū tio̍h ka-kī chòe hó só͘ kiâⁿ ê bô͘-iūⁿ;

8

tī kà-sī tio̍h toan-chong bô siâ, giân-gú toan-chiàⁿ, bô thang hiâm, hō͘ tùi-te̍k ka-kī kiàn-siàu, bô teh thang kóng lán ê pháiⁿ.

9

Khǹg lô͘-po̍k tio̍h sūn-ho̍k in ê chú-lâng, hōan sū hō͘ in hoaⁿ-hí, bô tú-tak,

10

bô thau-the̍h, ta̍k hāng tio̍h hián-bêng tiong-sìn, hō͘ in hōan sū êng-kng lán ê Kiù-chú Siōng-tè ê kàu.

11

In-ūi Siōng-tè kiù chèng lâng ê un í-keng hián-bêng,

12

kéng-kài lán tio̍h khì-sak put-khiân kap chit sè-kan ê su-io̍k, ēng siú-kí, kong-gī, kèng-khiân lâi kè-jı̍t tī chit sè-tāi;

13

him-bō͘ hit ê tōa hok-khì ê ǹg-bāng, kap lán chì tōa ê Siōng-tè kap Kiù-chú Iâ-so͘ Ki-tok êng-kng ê hián-hiān.

14

I ūi-tio̍h lán hiàn ka-kī, beh sio̍k lán thoat-lī it-chhè ê put-hoat; koh ūi-tio̍h pún-sin sóe-chheng lán chòe I ka-kī ê peh-sìⁿ, chiū-sī jia̍t-sim tī chiah ê hó só͘ kiâⁿ ê.

15

Chiah ê sū lí tio̍h kóng, tio̍h khó͘-khǹg, ēng lóng-chóng ê kôan lâi chek-pī lâng. M̄ thang hō͘ lâng biáu-sī lí.