Sat-ka-lī-a 第 11 章 - 巴克禮全羅

1

Lī-pa-lùn ah, lí tio̍h khui lí ê mn̂g, hō͘ hé thang sio-bia̍t lí ê pek-hiuⁿ-chhiū.

2

Siông-chhiū ah, lín tio̍h háu, in-ūi pek-hiuⁿ-chhiū í-keng tó, súi ê chhiū í-keng húi-hōai; Pa-san ê siōng-chhiū ah, lín tio̍h háu, in-ūi bō͘-sēng ê chhiū-nâ í-keng soe-pāi.

3

Thiaⁿ ah, ū bo̍k-chiá teh háu, in-ūi in ê êng-iāu húi-hōai lah; thiaⁿ ah, ū ióng ê sai hm̄-hm̄-háu, in-ūi Iok-tàn hô-piⁿ ê chhiū-nâ hong-hòe lah.

4

Iâ-hô-hoa, góa ê Siōng-tè, án-ni kóng:

5

Beh thâi ê iûⁿ-kûn lí tio̍h chhī; bóe in-ê thâi in, ka-kī lia̍h-chòe bô chōe; bōe in-ê kóng, Iâ-hô-hoa sī eng-kai o-ló--ê, in-ūi góa hó-gia̍h lah; in ê bo̍k-chiá iā bô lîn-bín in.

6

Iâ-hô-hoa kóng, Góa bô koh lîn-bín chit só͘-chāi khiā-khí ê peh-sìⁿ; khòaⁿ ah, Góa beh chiong in ta̍k-lâng kau tī in chhù-piⁿ ê chhiú, iā tī i ê ông ê chhiú; in beh phah chit ê tōe-hng; Góa iā bô beh kiù peh-sìⁿ thoat-lī in ê chhiú.

7

Tùi án-ni góa chhī beh thâi ê iûⁿ-kûn, chiū-sī iûⁿ-kûn-tiong tē-it khùn-khó͘--ê. Góa ka-kī chhú nn̄g ki kóaiⁿ-á, chı̍t-ki kiò-chòe Un-hūi, chı̍t-ki kiò-chòe Liân-lo̍k, lâi chhī chit ê iûⁿ-kûn.

8

Chı̍t-ge̍h-jı̍t-lāi, Góa tû--khì saⁿ ê bo̍k-chiá, in-ūi Góa ê sim iàm-chiān in, in ê sim iā khì-hiâm Góa.

9

Góa chiū kóng, Góa bô beh iúⁿ-chhī lín, sí--ê chhut-chāi i sí; bô--khì-ê, chhut-chāi i bô--khì; só͘-chhun--ê, chhut-chāi in saⁿ-thun-chia̍h.

10

Góa kia̍h Góa hit-ki Un-hūi ê kóaiⁿ-á at-chı̍h i, lâi hòe-bô Góa kap bān peh-sìⁿ só͘ lı̍p ê iok;

11

hit-jı̍t chiū hòe-bô i; khùn-khó͘ ê iûⁿ ǹg-bāng Góa--ê, lóng chai che sī Iâ-hô-hoa ê ōe.

12

Góa tùi in kóng, Lín nā lia̍h-chòe hó, chiū hō͘ góa kang-chîⁿ, nā bô, chiū soah; tùi án-ni in phêng gûn saⁿ-cha̍p chòe góa ê kang-chîⁿ.

13

Iâ-hô-hoa kā góa kóng, Tio̍h chiong hit-ê hiat hō͘ sio-hûi-lâng, chiū-sī in só͘ kó͘ góa kôaiⁿ ê kè-chîⁿ; góa chiū the̍h hit ê gûn saⁿ-cha̍p, hiat hō͘ sio-hûi-lâng, tī Iâ-hô-hoa ê tiān.

14

Góa koh at-chı̍h Góa tē-jī-ki ê kóaiⁿ-á, miâ chòe Liân-lo̍k--ê, lâi hòe-bô Iû-tāi kap Í-sek-lia̍t hiaⁿ-tī ê chêng-gī.

15

Iâ-hô-hoa koh kā góa kóng, Lí koh the̍h gōng ê bo̍k-chiá só͘ ēng hiah ê khì-kū.

16

Khòaⁿ ah, Góa beh tī chit só͘-chāi heng-khí chı̍t ê bo̍k-chiá, sit-lo̍h--ê, i bô beh chhap; sì-sòaⁿ--ê, i bô beh chhē; siū-siong--ê, i bô beh i--i; ióng-chòng--ê, i bô beh chhī--i; kan-ta beh chia̍h pûi--ê ê bah, thiah-lı̍h i ê tôe.

17

Bô lō͘-ēng ê bo̍k-chiá, khì-sak iûⁿ-kûn--ê, ū chai-ē ah, to beh lîm-kàu i ê chhiú, kap i ê chiàⁿ-ba̍k; i ê chhiú beh chôan-jiân ko͘-tâ, i ê chiàⁿ-ba̍k beh o͘-o͘ àm-àm.