Sat-ka-lī-a 第 2 章 - 巴克禮全羅

1

Góa koh kia̍h-ba̍k koan-khòaⁿ, khòaⁿ ah, ū chı̍t-lâng chhiú the̍h chîn-soh;

2

góa kóng, Lí beh khì toh-lo̍h? I kā góa kóng, Beh khì niû Iâ-lō͘-sat-léng, khòaⁿ i ū jōa-khoah, ū jōa-tn̂g.

3

Khòaⁿ ah, kap góa kóng-ōe ê sù-chiá chhut-khì, koh ū chı̍t-ūi sù-chiá chhut-lâi ngiâ-chih i,

4

tùi i kóng, Lí cháu--khì kā hit ê siàu-liân lâng kóng, kóng, Iâ-lō͘-sat-léng beh ū lâng khiā-khí, chhin-chhiūⁿ bô siâⁿ-chhiûⁿ ê hiuⁿ-lí, in-ūi hit tiong-kan lâng kap cheng-siⁿ chin-chōe.

5

Iâ-hô-hoa kóng, Góa beh chòe i sì-ûi ê hé-siâⁿ, Góa ia̍h beh chòe in tiong-kan ê êng-kng.

6

Iâ-hô-hoa kóng, Eh! Eh! lín tio̍h tùi pak-hng ê tōe tô-cháu, in-ūi Góa í-keng sì-sòaⁿ lín, chhin-chhiūⁿ tī thiⁿ--nih sì-bīn ê hong; che sī Iâ-hô-hoa kóng--ê.

7

Eh! Sek-an ah, kap Pa-pí-lûn ê peh-sìⁿ khiā-khí--ê ah, lí tio̍h tô-thoat.

8

Bān-kun ê Iâ-hô-hoa kóng, Tī êng-kng ê liáu-āu, chhe góa kàu hiah-ê chhiúⁿ-lia̍h lín ê lia̍t-kok; hōan-tio̍h lín--ê sī hōan-tio̍h I ba̍k-chiu-tiong ê tông-chú.

9

Khòaⁿ ah, Góa beh tī in ê téng-bīn bú Góa ê chhiú, in chiū beh hō͘ in ê lô͘-po̍k chhiúⁿ-kiap, lín chiū chai bān-kun ê Iâ-hô-hoa chhe góa lah.

10

Sek-an ê peh-sìⁿ ah, tio̍h chhiùⁿ-koa hoaⁿ-hí; khòaⁿ ah, in-ūi Góa beh lâi, beh tiàm tī lín tiong-kan; che sī Iâ-hô-hoa kóng--ê.

11

Hit-jı̍t beh ū chōe-chōe kok kui-óa Iâ-hô-hoa, chòe Góa ê peh-sìⁿ; koh Góa beh tiàm-tī lí ê tiong-kan, lí chiū chai bān-kun ê Iâ-hô-hoa chhe góa kàu lí hia.

12

Iâ-hô-hoa beh tit-tio̍h Iû-tāi chòe I ê gia̍p tī sèng-tōe; ia̍h beh koh kéng-sóan Iâ-lō͘-sat-léng.

13

Kìⁿ-nā ū hiat-khì--ê, tī Iâ-hô-hoa ê bīn-chêng lóng tio̍h chēng-chēng; in-ūi I tùi sèng ê só͘-chāi khí--lâi.