列王紀上 第 13 章 - 台語漢字羅馬本

1

彼時，有一個上帝的奴僕趁耶和華的話對猶大來到伯特利。耶羅波安抵仔徛佇壇邊欲燒香；

2

伊趁耶和華的話攻擊彼個壇，叫講：「壇啊，壇啊！耶和華按呢講：看啊，欲有一個子出世佇大衛的家，名叫約西亞，伊欲將山頭壇的祭司，就是佇你的頂面燒香的，獻佇你的頂面，也欲將人的骨頭燒佇你的頂面。」

3

像彼日，伊也出一個兆頭，講：「看啊，此個壇欲破裂，壇頂的火灰欲傾落去，此個就是耶和華所講的兆頭。」

4

王聽見上帝的奴僕攻擊伯特利的壇所叫的話，耶羅波安就對壇頂伸手，講：「著掠伊！」伊所伸欲掠伊的手就枯焦，會勼倒轉；

5

壇就破裂，壇頂的火灰也傾落來，照上帝的奴僕趁耶和華的話所出的兆頭。

6

王應上帝的奴僕講：「請你求耶和華──你上帝的恩，替我祈禱，互我的手復原。」對按呢上帝的奴僕祈禱耶和華，王的手就復原，照起頭的款。

7

王給上帝的奴僕講：「請你及我倒去阮兜食點心，我也欲用物送你。」

8

上帝的奴僕給王講：「你就若用你王宮的一半互我，我也呣及你去，也呣佇此所在食餅飲水；

9

因為耶和華的話按呢吩咐我講，你呣通食餅，呣通飲水，也呣通對你的原路倒來。」

10

伊就對別條路去，無對來伯特利彼條倒去。

11

有一個老先知踮佇伯特利，伊的子到，用上帝的奴僕當日佇伯特利所行的給伊講，及對王所講一切的話攏給老父講。

12

老父對講：「伊對叨落一條落去？」因為伊的子曾看見對猶大來上帝的奴僕所去的路。

13

伊就吩咐伊的子講：「恁給我備辦驢。」備辦驢好，伊就騎伊，

14

去路上帝的奴僕，抵著伊坐佇橡樹腳，就問伊講：「你是對猶大來上帝的奴僕抑呣是？」伊講：「我就是。」

15

伊就給伊講：「請你及我倒去阮兜食餅。」

16

伊就講：「我會及你倒去，會入你的家，也會佇此所在及你食餅飲水；

17

因為耶和華的話按呢給我講：『你佇遐呣通食餅呣通飲水，也呣通對你去的路倒來。』」

18

伊就給伊講：「我也是先知，及你一樣。有天使用耶和華的話給我講：『你導伊及你倒去你的厝，互伊食餅飲水。』」這攏是騙伊。

19

伊就及伊倒去，佇伊的家食餅飲水。

20

二人坐桌的時，耶和華的話臨到彼個導伊倒來的先知，

21

伊就叫彼個對猶大來上帝的奴僕講：「耶和華按呢講：因為你違背耶和華的話，無守耶和華──你上帝所命令你的命令，

22

就倒來，食餅飲水佇伊所吩咐你講佇遐呣通食餅呣通飲水的所在，所以你的身屍通入你列祖的墓。」

23

食餅飲水了後，伊就給伊所帶倒來的先知備辦驢。

24

伊去了，佇路裡有一隻獅抵著，就咬死伊，身屍放佇路裡，驢徛佇伊的身邊，獅也徛佇伊的身屍的身邊。

25

有人對遐經過，看見身屍放佇路裡，獅也徛佇身屍的邊頭，就來老先知所踮的城講起此個事。

26

彼個導伊對路倒來的先知聽見，就講：「這是彼個上帝的奴僕，違逆耶和華的話者，所以耶和華將伊交互獅；獅擘拆伊，咬死伊，是照耶和華對伊講的話。」

27

伊就吩咐伊的子講：「恁給我備辦驢。」就備辦。

28

伊去，看見伊的身屍放佇路裡，驢及獅徛佇身屍的邊仔，獅無食身屍，也無擘拆驢。

29

先知就取上帝的奴僕的身屍下佇驢的頂面，載倒來，到老先知的城，欲啼哭來埋葬伊；

30

就將伊的身屍來葬佇家己的墓，人就啼哭伊，講：「唉啊！我的兄啊！」

31

埋葬了後，伊就給伊的子講：「我死了後，恁著埋葬我佇上帝的奴僕所埋葬的墓內，互我的骨頭倚伊的骨頭，

32

因為伊用耶和華的話叫來攻擊伯特利的壇，攻擊撒瑪利亞諸個城所有的山頭廟，伊的話的確應驗。」

33

此個代誌了後，耶羅波安猶原無離開伊的歹路，閣對眾百姓中設立山頭的祭司；見愛的，就分別伊，互伊做山頭的祭司。

34

此個代誌成做耶羅波安的家的罪，致到欲對地上剪除伊滅伊。