撒母耳記上 第 16 章 - 台語漢字羅馬本

1

耶和華給撒母耳講：「我已經棄拺掃羅無互伊做以色列王，你為著伊憂悶欲到偌久啊？你著用角貯油滿滿，去啊，我欲差你去伯利恆人耶西遐；因為我佇伊的子的中間，備辦一個王。」

2

撒母耳講：「我怎樣通去？掃羅若聽見，伊欲我。」耶和華講：「你通帶一隻牛仔及你去，就講：『我來是欲祭獻耶和華。』

3

你著請耶西來赴此個祭祀，我欲指示你所應該行的事。我所指示你的人，你著替我給伊抹油。」

4

撒母耳就照耶和華的話去行。到伯利恆，城裡許個長老攏愕愕惙出來迎接伊講：「你來是為著平安嗎？」

5

伊講：「為著平安，我是欲祭獻耶和華。恁著清氣家己，來及我赴祭祀。」撒母耳就互耶西及伊許個子清氣，叫來赴祭祀。

6

已經來，撒母耳看見以利押，意思講，耶和華所欲抹油者果然佇伊的面前。

7

總是耶和華給撒母耳講：「莫得看伊的容貌及伊身軀的大漢，此人是我所拒絕。因為耶和華看無親像人看：人看外貌；耶和華是看心內。」

8

耶西叫亞比拿達互伊對撒母耳的面前經過，撒母耳講：「耶和華也無揀此人。」

9

耶西閣叫沙瑪經過，伊講：「耶和華也無揀此個。」

10

耶西互伊許個子七個攏對撒母耳的面前經過，撒母耳給耶西講：「耶和華也無揀諸個。」

11

撒母耳給耶西講：「你的子攏佇遮嗎？」伊應講：「猶有一個煞尾的，今飼羊。」撒母耳給耶西講：「你差人導伊來；因為伊猶未來，咱無欲坐桌，」

12

就差人導伊入來。伊是赤色，目睭清秀，生做好看。耶和華講：「此人就是，你起來給伊抹油。」

13

撒母耳就用角內的油，佇伊許個兄的中間抹伊。對彼日起，耶和華的神大大臨到大衛，撒母耳起身倒去拉瑪。

14

耶和華的神離開掃羅，有歹神對耶和華遐來攪擾伊。

15

掃羅的人臣對伊講：「看啊，今有一個歹神對上帝遐來攪擾你。

16

阮的主著命令跟隨你面前的人臣，尋一個彈琴的來，對上帝遐來的歹神臨到你的時，互伊用手彈琴，你就好。」

17

掃羅給伊的人臣講：「恁給我尋一個彈琴的，導來我遮。」

18

少年人中有一個講：「我曾看見伯利恆人耶西一個子彈琴，是大勇士閣是戰士，講話有智慧，面貌好看，耶和華也及伊佇。」

19

掃羅差使者去見耶西講：「差你的子大衛就是彼個飼羊的來我遮。」

20

耶西就用驢載餅及一皮袋的酒，及一隻山羊仔，交伊的子大衛，送互掃羅。

21

大衛到掃羅遐，跟隨佇伊的面前。掃羅真疼伊，大衛就做掃羅抬軍器的人。

22

掃羅差人去見耶西，講：「求你容允大衛跟隨佇我面前，因為伊得著恩典佇我的目睭前。」

23

對上帝遐來的歹神臨到掃羅的時，大衛就提琴，用手來彈，掃羅就寬心得著好，歹神離開伊。