撒母耳記上 第 27 章 - 台語漢字羅馬本

1
大衛心內講:「欲有一日我死佇掃羅的手,呣值著走去非利士的地。掃羅對佇我就絕望,無閣佇以色列的境內尋我;按呢我就通脫離伊的手。」
2
大衛就起來,及隨伊的六百人過去到迦特王──瑪俄的子亞吉遐。
3
大衛及伊二個某,就是耶斯列人亞希暖及曾做拿八的某的迦密人亞比該,及隨大衛的人,以及逐人的家眷,攏踮佇迦特亞吉遐。
4
有人給掃羅講:「大衛走去迦特。」掃羅就無閣尋伊。
5
大衛對亞吉講:「我若佇你的面前得著恩典,求你用山場一個城互我,我就有所在通徛起。因為你的奴僕啥事著及你相及徛起佇京城啊?」
6
當彼日亞吉將洗革拉互伊,因為按呢洗革拉屬猶大王,直到今仔日。
7
大衛踮佇非利士人的地共一年閣四月日。
8
大衛及隨伊的人上去,侵取基述人、基色人、亞瑪力人。因為此幾族平素徛起佇彼所在,對書珥去到埃及。
9
大衛拍彼所在,無論男女無一個活,閣搶的羊、牛、驢、駱駝,及衣服,倒轉來見亞吉。
10
亞吉講:「恁今仔日去侵取甚麼地方啊?」大衛講:「拍猶大的南方、耶拉篾人的南方、基尼人的南方。」
11
大衛無留一個男女活,帶到迦特。是拍算講:「驚了將阮的事報人知,講大衛按呢行,閣伊踮佇非利士人的地的時,也常常照此款來行。」
12
亞吉信大衛,心內講:「大衛互伊本族以色列人真厭惡,所以伊欲永遠做我的奴僕。」

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!