歷代志下 第 27 章 - 台語漢字羅馬本

1
約坦坐位的時二十五歲,佇耶路撒冷做王歷過十六年,伊的老母名叫耶路沙,是撒督的查某子。
2
約坦行耶和華所看做好的事,照伊的老父烏西雅一切所行的,獨獨無入耶和華的殿。總是百姓所行猶原腐敗。
3
約坦起耶和華殿的頂門,閣佇俄斐勒城頂起多多,
4
閣佇猶大山地起城,佇樹林內起營寨及望高樓。
5
伊及亞捫人的王交戰卡贏,當彼年亞捫人進貢銀一百他連得,小麥一萬歌珥,大麥一萬歌珥;第二年、第三年亞捫人也是按呢進貢。
6
約坦漸漸強盛,因為伊佇耶和華──伊的上帝的面前謹慎行正直的路。
7
約坦其餘的事及一切的交戰,攏記佇以色列及猶大列王的記錄。
8
伊坐位的時二十五歲,佇耶路撒冷做王歷過十六年。
9
約坦及伊的列祖同睏,埋葬佇大衛城。伊的子亞哈斯接伊做王。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!