列王記下 第 1 章 - 台語漢字羅馬本

1
亞哈死了,摩押背叛以色列。
2
亞哈謝對撒瑪利亞的樓頂的欄杆跋落來,致病;就差使者給講:「恁去問以革倫的上帝巴力西卜,我此個病會好抑。」
3
總是耶和華的使者給提斯比人以利亞講:「你起來,上去接撒瑪利亞王的使者,給講:『恁去問以革倫的上帝巴力西卜,是因為以色列中無上帝嗎?』
4
所以耶和華按呢講:『你會閣落去你所上去的眠床,的確會死!』」以利亞就去。
5
使者倒來見王,王問講:「恁為甚麼倒來?」
6
使者應伊講:「有一人抵著阮,給阮講:『去啊,恁倒去見差恁的王,給伊講:耶和華按呢講,你差人去問以革倫的上帝巴力西卜,是因為以色列中無上帝嗎?所以你閣落去你所上去的眠床,的確會死!』」
7
王問講:「上來抵著恁,給恁講諸個話的,伊的形狀啥款?」
8
應講:「伊穿有毛的衫,腰縖皮帶。」王講:「這是提斯比人以利亞。」
9
王就差五十夫長導伊彼五十人去以利亞遐,伊上去伊遐;看啊,以利亞坐佇山頂。五十夫長給伊講:「上帝的奴僕啊,王講,你著落來!」
10
以利亞應五十夫長講:「我若是上帝的奴僕,願火對天落來,燒你及你彼五十人!」就有火對天落來燒伊及伊彼五十人。
11
王閣差一個五十夫長,導伊彼五十人去以利亞遐。伊就給伊講:「上帝的奴僕啊,王講,你緊緊落來!」
12
以利亞應講:「我若是上帝的奴僕,願火對天落來,燒你及你彼五十人!」就有上帝的火對天落來,燒伊及伊彼五十人。
13
王閣差第三隊的五十夫長,導伊彼五十人。彼個第三隊的五十夫長上去,跪佇以利亞的面前,懇求伊講:「上帝的奴僕啊,求你掠我的生命及你此五十個奴僕的生命做寶貝!
14
看啊,已經有火對天落來燒死以前二個五十夫長及伊逐個五十人;今求你看我的生命做寶貝!」。
15
耶和華的使者給以利亞講:「你及伊落去,呣免驚伊!」以利亞就起來,及伊落去見王,
16
給伊講:「耶和華按呢講:『你差人去問以革倫的上帝巴力西卜,是因為以色列中無上帝互你問伊的話嗎?所以你閣落來你所上去的眠床,的確著死!』」
17
王就死,照以利亞所傳耶和華的話。王無子,耶和南續接位,佇猶大王約沙法的子耶和南第二年。
18
亞哈謝其餘的事豈無記佇以色列諸個王的記錄嗎?

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!