
彼得後書 第 1 章 - 台語漢字羅馬本
- 1
- 耶穌基督的奴僕,也是伊的使徒西門彼得,批寄互許個及阮相及得著同一樣寶貝的信,佇咱的上帝及救主耶穌基督的義的。
- 2
- 願恩典、平安,對恁深知上帝及咱的主耶穌,加添多多互恁。
- 3
- 因為上帝的權能已經用一切關係活命及敬虔的事賞賜咱,對佇深知彼個用家己的榮光及好德召咱者。
- 4
- 對諸個已經有寶貝及極大的應允賞賜咱,欲互恁對諸個應允脫離世間對私慾所致的敗壞,得著有份佇上帝的性情。
- 5
- 為著按呢,恁著盡力殷勤;佇恁的信,加添好德;佇好德,加添智識;
- 6
- 佇智識,加添撙節;佇撙節,加添吞lun;佇吞lun,加添敬虔;
- 7
- 佇敬虔,加添疼兄弟;佇疼兄弟,加添疼眾人。
- 8
- 因為恁若有諸個到充滿,就欲互恁佇深知咱的主耶穌基督不致貧憚無結實。
- 9
- 因為無諸個的人,就睛暝,只有看近近,已經boe(勿會)記得伊前的罪有洗清。
- 10
- 兄弟啊,所以著閣卡殷勤,來堅固恁的受召、受揀。因為恁行諸個,就永遠boe(勿會)跋倒;
- 11
- 是對按呢,欲大大賞賜恁入咱的救主──耶穌基督永遠佇teh的國。
- 12
- 所以恁雖然已經知諸個事,閣堅固佇所有的真理,我欲常常互恁記得。
- 13
- 我猶佇此個布棚的時,點醒恁互恁會記得,我拍算是應該;
- 14
- 家己知拆我的布棚的時近啦,照咱的主耶穌基督所指示我的。
- 15
- 我也欲殷勤,互恁佇我過世的了後,不時會記得諸個事。
- 16
- 因為阮平素互恁知咱的主耶穌基督的權能及伊的降臨,呣是用奇巧無影跡話,就是親目看見伊的大威嚴。
- 17
- 因為伊對父上帝得著尊貴榮光,彼時對極大的榮光有此號聲,到佇伊講:「此個是我疼的子,我所歡喜的。」
- 18
- 此個聲對天出,阮及伊佇聖山的時聽見。
- 19
- 閣咱有先知的話會閣卡堅固,恁致意諸個是好,親像燈照佇黑暗,到佇天光,啟明星出現佇恁的心的時。
- 20
- 第一,著先知,見若聖經中先知的話無通趁私奇的意思來開拆;
- 21
- 因為未有先知的話對人的意思出,就是對上帝來的人,互聖神感動來講。
如需更多版本聖經,請到台灣聖經公會聖經網站瀏覽與查詢 |
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您! |