使徒行傳 第 2 章 - 台語漢字羅馬本

1
五旬節的期已經到,攏聚集佇一所在。
2
忽然,對天有聲,親像大風吹,充滿所坐歸間的厝,
3
就有分開的舌出現互看見,親像火的舌,歇佇逐人的頂面。
4
攏受聖神充滿,才開嘴講別樣的腔口,是照聖神所賞賜講的。
5
彼時,有虔誠的猶太人對天下逐國來的,住佇耶路撒冷。
6
此個聲一下起,眾人聚集紛紛亂亂,因為逐人聽見照伊家己的土腔來講,就攏卬愕;
7
奇怪講:「你看,諸個講的豈無一概是加利利人嗎?
8
怎樣咱聽講照咱逐人所出世的土腔啊?
9
咱諸個帕提亞人、米太人、以攔人,及佇米所波大米、猶太,及加帕多家、本都、及亞西亞、
10
弗呂家,及旁非利亞、埃及,近倚古利奈的呂彼亞,諸個地方的人,以及對羅馬來的出外人,有的是猶太人,有的是入猶太教的人,
11
革哩底人、亞拉伯人,攏聽用咱的腔口,來講上帝的大事。」
12
就攏卬愕躊躇,相及講:「這甚麼意思?」
13
亦有別人恥笑講:「是飲新酒醉。」
14
總是彼得及十一個使徒徛,大聲給講:「猶太人及攏總徛起佇耶路撒冷的百姓啊,恁著知此個,亦著致意聽我的話。
15
諸個人呣是酒醉;親像恁所拍算,因為此霎抵才頂晡九點鐘。
16
這就是託先知約珥所講的,講:
17
上帝講:佇路尾的時日,我欲用我的神降落佇凡有肉體的。恁的後生恁的查某子欲做先知講話;恁的少年人欲看見異象;恁的老人欲得著眠夢。
18
佇許個日,我也欲用我的神降落佇我的奴僕女婢,亦欲做先知來講。
19
頂面佇天裡,我欲顯出奇事;下面佇地裡,我欲顯出神蹟;就是血,及火,及煙霧。
20
日欲變做暗,月欲變做血;佇主大閣榮顯的日未到的代先。
21
閣凡若求叫主的名的,會得著救。
22
「以色列人啊,著聽我的話:拿撒勒人耶穌,上帝曾用伊佇恁中間行各樣的權能、奇事,及神蹟,來對恁證明伊,這就是恁所知的。
23
伊照上帝定著的旨意及代先知的已經受解送,恁諸個借不法的人的手,釘十字架害死伊。
24
總是上帝解放許個死的苦痛,互伊復活,是伊會互死所把縛。
25
因為大衛有指伊講:我看主常常佇我的面前;伊佇我的正旁,互我免搖動。
26
所以,我的心歡喜,我的舌快樂;閣我的肉體也欲佇向望中。
27
因為你無欲將我的靈魂放下佇陰間,也無欲互你的聖者抵著朽爛。
28
你曾用活命的路指示我,欲互我佇你的面前滿心快樂。
29
「兄弟啊!先祖大衛的事,我通好膽對恁講:伊已經死,閣埋葬,伊的墓到今仔日猶佇咱中間。
30
伊既然是先知,閣知上帝曾及伊咒誓,欲佇伊後裔中設立一人坐伊的座位,
31
伊代先看出按呢,就論基督的復活講:伊無放下佇陰間;亦伊的肉體無抵著朽爛。
32
此個耶穌,上帝已經互伊復活,阮諸個攏做伊的干證。
33
伊既然互上帝的正手舉伊高高,閣對父受所應允的聖神,就將此個降落,就是恁所看見所聽見的。
34
因為大衛未曾上天,獨獨家己講:主給我的主講:你坐我的大旁,
35
聽候我互你的對敵做你的腳踏椅。
36
「按呢,以色列全家著確實知,此個耶穌,上帝已經設立伊做主,做基督,就是恁所釘佇十字架的。」
37
眾人聽了,心內刺鑿,對彼得及其餘的使徒講:「兄弟啊,阮著怎樣做?」
38
彼得給講:「恁著反悔,逐人佇耶穌基督的名受洗禮,到互恁的罪赦免,閣欲受聖神的賞賜;
39
因為所應允的歸佇恁及恁的子孫,以及攏總遠遠的人,就是見若主──咱的上帝所欲召的。」
40
閣另外用多多話干證,來苦勸講:「恁著救家己脫離此個邪的世代。」
41
對按呢接納的話的人攏受洗禮。彼日,約略加添三千人,
42
常常專務使徒的教示,相及交陪,擘餅,祈禱。
43
眾人攏驚惶;使徒閣行多多奇事神蹟。
44
信的人攏聚集佇一所在,所有的物公家用,
45
閣賣物產、家業,照逐人所欠用分互。
46
日日同心專務佇殿內,也佇人家擘餅,用歡喜、誠實的心來食,
47
謳咾上帝,亦得著眾百姓歡喜。主將得救的人日日加添互。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!