使徒行傳 第 24 章 - 台語漢字羅馬本

1

五日後，祭司頭亞拿尼亞及幾若個長老，及此個辯護士帖土羅落來，對總督告保羅。

2

保羅受召，帖土羅就告伊講：

3

「腓力斯大人，阮對你得著太平，閣對你的先見，此國的弊病得著改正；逐時逐所在阮承受伊來感謝無息。

4

今呣敢延你甚久，求你寬容聽阮幾句話。

5

因為有查出此人，親像瘟疫，佇天下生起擾亂，做拿撒勒黨的頭目，

6

連聖殿伊亦欲拍垃墋；阮就掠伊。

7

｛不料千夫長呂西亞前來，甚是強橫，從我們手中把他奪去，吩咐告他的人到你這裡來。〔台語羅馬譯本無此節！〕｝

8

你家己審問伊，就阮所告伊逐項的因端會確實知。」

9

猶太人同聲告伊講：「代誌實在是按呢。」

10

總督點頭教保羅講。伊就應講：「我知你做此邦國的審判司多多年，所以歡喜分訴家己的代誌。

11

你會知，我上耶路撒冷敬拜到今不過十二日。

12

未曾抵著我佇殿內及人辯論，抑是擾動眾人，就佇會堂亦無，城內亦無。

13

閣現在所告我的事攏會對你顯出證據。

14

獨獨一項，我對你認，就是所叫做結黨的路，我照按呢來服事列祖的上帝，閣信攏總合佇律法的以及記載佇先知的冊的，

15

閣對上帝有向望，就是無論義人及不義的人，欲攏復活，這亦是家己所欣慕的。

16

我佇此個家己練習，就是對上帝對人，常常存無虧負的良心。

17

今過幾若年，我倒來是欲賑濟本國及獻禮物。

18

獻的時，抵著我佇殿裡已經清氣，並無結歸群，也無喊嘩，只有幾個猶太人對亞西亞來的。

19

若有通責罪我，就應該來佇你的面前告我。

20

抑是佇遮的人，若看見我徛佇公會的面前，有甚麼不義，亦著家己講。

21

設使有，亦不過此一句若定，就是我徛佇中間叫講：『為著死人復活的事，我今仔日佇恁的面前受審判。』」

22

腓力斯本詳細知關涉此個路的事，就延延講：「千總呂西亞落來的時，我就欲審斷恁的代誌。」

23

對按呢命令百總顧守保羅，亦放寬伊，伊的人若來供給伊攏莫得阻擋。

24

過幾若日，腓力斯及伊的某，土西拉，是猶太人，相及來，就召保羅，愛聽伊論信基督耶穌的道理。

25

保羅議論公義、貞節，及將來的審判。腓力斯不止驚，應講：「今請退去，有利便的時才召你。」

26

伊亦向望保羅欲銀互伊，所以沓沓召伊來，及伊談論。

27

過二年，波求非斯都接腓力斯的任；腓力斯愛取猶太人歡喜，就留保羅猶原縛。