使徒行傳 第 6 章 - 台語漢字羅馬本

1

當彼時，學生加添多多，有講希利尼話的猶太人對希伯來人出怨言，因為逐日的供給無顧著in的寡婦。

2

十二個使徒叫眾學生來，對in講：「阮將上帝的道理放下teh來辦理食食，呣合宜。

3

所以兄弟啊，著對恁中間揀有好名聲、受神，及智慧充滿的七人，阮就設立in管理此個事。

4

阮欲專務祈禱、傳道。」

5

眾人歡喜此個話，就揀司提反，伊是有信及聖神滿滿的人，閣揀腓利、伯羅哥羅、尼迦挪、提門、巴米拿，及曾入猶太教的安提阿人尼哥拉，

6

互in徛佇使徒的面前。就祈禱，給in按手。

7

上帝的道理愈興旺；佇耶路撒冷學生的數額加添真多，祭司順服佇福音亦多多。

8

司提反受恩典及才能滿滿，行大的奇事神蹟佇百姓的中間。

9

彼時有會堂叫做利百地拿的、及古利奈的、亞歷山大的、以及對基利家、亞西亞來的幾若人，起來及司提反辯論。

10

司提反用智慧用神來講，會抵當，

11

就用人出來講：「阮曾聽見伊講謗瀆摩西及上帝的話。」

12

閣教唆百姓、及長老、及經學士，忽然到，掠伊，帶到公會，

13

叫假干證來，講：「此人講話攻擊此個聖的所在及律法無息。

14

因為阮曾聽見伊講，此個拿撒勒人耶穌欲毀壞此個所在，也欲改換摩西所傳互咱的規例。」

15

彼霎坐佇公會中的人攏注目看伊，看伊的面，親像天使的面。