使徒行傳 第 5 章 - 台語漢字羅馬本

1

若是有一人，名亞拿尼亞，及伊的某撒非喇賣伊的產業，將所賣的銀，暗靜留幾若份，伊的某亦知，

2

其餘的帶來下佇使徒的腳下。

3

彼得講：「亞拿尼亞！啥事撒但充滿你的心，來騙聖神，將賣園的銀暗靜留幾若份？

4

園猶未賣，豈呣是你的？賣了，彼個銀豈呣是你主意？你心內啥事想出此個代誌啊？你呣是騙人，就是騙上帝。」

5

亞拿尼亞聽見諸個話，就慄落去，斷氣；聽見的人攏大驚。

6

諸個少年人起來，收拾伊的身屍，扛出去埋葬。

7

約略過三點鐘久，伊的某亦入來，猶未知此個事。

8

彼得應伊講：「你給我講，恁賣園的價錢是即多嗎？」講：「著，是即多。」

9

若是彼得對伊講：「恁啥事同心來試主的神啊？你看，埋葬你的丈夫的，的腳已經到門口，亦欲扛你出去。」

10

婦仁人即時慄佇伊的腳前，斷氣。許個少年人入來，看伊已經死，就扛伊出去，埋葬佇伊丈夫的身邊。

11

全教會及見若聽見諸個代誌的攏大驚。

12

對使徒的手有行多多神蹟及奇事佇百姓的中間；眾人攏同心聚集佇所羅門的兩廊。

13

其餘的人無一個敢近倚，若是百姓尊重。

14

信來歸主的人益發加添，男女攏真多。

15

甚至有扛病人到佇街路，下佇舖仔，向望彼得經過的時，有的會互伊的影蔭著。

16

猶有多多人對耶路撒冷四圍的城來，導病人及互邪神所苦楚的，攏得著醫好。

17

獨獨祭司頭以及攏總同伊的人，就是撒都該黨，徛起來，滿心怨妒，

18

下手掠使徒，關佇公的監。

19

若是主的天使暝時開監門，導出，

20

講：「恁著去徛佇殿裡，用此個活命的話攏對百姓講。」

21

聽見諸個話，天昲光就入殿來教示。祭司頭及同伊的人到，招集公會及以色列百姓的老大，差人去監裡帶來。

22

衙役到地，尋無佇監裡，就倒來報講：

23

「阮看見監關到真堅固，顧守的人徛佇逐個門口；到開的時，尋無人佇內面。」

24

殿司及諸個祭司頭聽見諸個話，就為著大躊躇，呣知此個事欲怎樣。

25

有一人來報講：「恁所關佇監裡的人，現在徛佇殿裡教示百姓。」

26

殿司及衙役就去導來，呣敢用強，因為驚百姓，驚了互用石頭擲。

27

導來了，就互徛佇公會的面前；祭司頭問，講：

28

「阮曾嚴嚴禁恁，莫得用此個名教示人，恁就將恁的教示遍傳佇耶路撒冷，欲用此人的血歸佇阮！」

29

彼得及其餘的使徒應講：「順趁上帝卡過頭佇順趁人，是合宜。

30

恁所吊佇柴裡來害死的耶穌，咱列祖的上帝已經互伊復活。

31

此個耶穌，上帝用家己的正手舉起伊，做人君，做救主，欲將反悔及赦罪賞賜以色列百姓。

32

閣阮為著諸個事做干證，上帝所賞賜互順趁伊的人的聖神也做干證。」

33

In聽了盡在受氣，愛害死in。

34

獨獨有一個法利賽人，名迦瑪列，是眾百姓所敬重的教法師，起來徛佇公會中，吩咐互許個人暫時出去，

35

就對大家講：「以色列人啊，恁著家己謹慎，欲怎樣辦諸個人。

36

因為前有丟大出頭，家己誇口做大，倚伊的人約略四百，伊受thai，隨伊的人四散，無囉去。

37

此人以後，造家甲的時，閣有加利利的猶大出頭，引誘百姓趁伊；伊也滅無，隨伊的人攏四散。

38

今我給恁講，莫得插諸個人，放據在in！因為此個計謀、此個所做，若出佇人，的確欲敗壞；

39

若出佇上帝，恁就boe敗壞in，閣驚了恁也是及上帝交戰。」

40

In就趁伊，召使徒來，拍in，命令in莫得用耶穌的名來講，就放in。

41

使徒離開公會前，攏歡喜，是因為in得著看做會堪得為著此個名受凌辱。

42

就佇殿裡、佇人家教示人，傳耶穌做基督，逐日無息。