使徒行傳 第 4 章 - 台語漢字羅馬本

1

in對百姓講話的時，諸個祭司及殿司，以及撒都該人忽然到。

2

因為in教示百姓，閣引起耶穌，來傳對死人中復活的道理，就大呣歡喜，

3

對按呢下手掠in；因為日暗，關in佇監裡來聽候隔日。

4

若是聽道理的人多多信，人額約略到五千。

5

隔日，in的官府、長老、經學士聚集佇耶路撒冷，

6

祭司頭亞那佇teh，閣有該亞法、約翰、亞歷山大，以及凡若屬祭司頭的宗族亦佇teh，

7

互in徛佇中央，問講：「恁用甚麼權能，用甚麼名行此個代誌啊？」

8

彼得彼時互聖神充滿，對in講：

9

「百姓的官府及長老啊，阮諸個今仔日若為著行佇軟弱的人的好事來受審問，看伊按怎樣得救，

10

就恁眾人及通以色列百姓著知，是佇拿撒勒人耶穌基督的名恁所釘佇十字架、上帝互伊對死人中復活的就是佇伊的名，此人好好徛佇恁的面前。

11

伊就是恁師傅所呣揲的石，已經成做厝角的頭。

12

閣佇別個並無拯救；因為佇天下，無賞賜別個名佇人的中間，互咱佇伊來得救。」

13

眾人看見彼得、約翰的好膽，閣知in是無學問的平常人，就奇怪，閣認得in曾隨耶穌；

14

亦看見得著好的人及in相及徛teh，就無話通辯駁。

15

才教in出會所，也相及議論講：

16

「諸個人欲怎樣辦in？in顯然行神蹟，tiam佇耶路撒冷的人攏知，咱諸個boe講無得。

17

總是免得此個事益發報揚佇百姓的中間，咱著哄in，斷斷呣通閣將此個名對人講。」

18

就叫in來，禁止in千萬呣通用耶穌的名來講起，來教示。

19

若是彼得、約翰應講：「聽恁卡過頭聽上帝，佇上帝的面前合宜抑無，恁才擬斷！

20

因為阮所曾看曾聽的，boe得通無講。」

21

許個人因為百姓的緣故，想無步通刑罰in，就閣再哄喝，才放in。是眾人為著in所行的來歸榮光上帝。

22

因為對神蹟得著醫好的人已經四十外歲。

23

in已經得著解放，就去尋in的朋友，將諸個祭司頭及長老所講的話對in講。

24

in聽見，就同心出聲對上帝講：「主宰啊！你是創造天、地、海，及其中萬物的，

25

你曾對聖神，用你的奴僕──阮的祖大衛的嘴，來講：列邦啥事大受氣？諸個百姓啥事計謀空空的代？

26

地上的列王一齊徛teh，諸個官員也相及聚集，來對敵主，及伊的基督。

27

因為希律、本丟彼拉多，及外邦人以及以色列諸個百姓，果然聚集佇此個城，來攻擊你所抹油聖的奴僕耶穌，

28

來行你的手，你的旨意所代先定著一切欲成的事。

29

今，主啊，著鑑察許個人的哄喝，互你諸個奴僕好膽講你的道理，

30

照時伸你的手來醫病，互神蹟奇事對你聖的奴僕耶穌的名來成。」

31

祈禱息，聚集的所在大振動，眾人攏受聖神充滿，好膽講上帝的道理。

32

信的人攏一心一志，無人講伊所有的屬家己，是逐項物做公的。

33

使徒用大權能，干證主耶穌的復活；眾人也得著大恩典。

34

其中無欠缺的人；因為見有田園厝宅的攏賣伊，帶in所賣的銀，

35

下佇使徒的腳下，照逐人所欠用，分互in。

36

有利未族的人，出世佇居比路，名約瑟，使徒叫伊做巴拿巴（翻譯就是teh安慰的人）。

37

伊有園，就賣去，將所賣的銀帶來，下佇使徒的腳下。