
阿摩司書 第 7 章 - 台語漢字羅馬本
- 1
- 主耶和華互我看見一項:看啊,給王割草了後,草閣發生;抵仔閣發的時,伊互草蜢出。
- 2
- 草蜢食完彼個境內青翠的物,我就講:「主耶和華啊,求你赦免;雅各豈可徛會住啊?因為伊是微細。」
- 3
- 耶和華為此個事退悔,耶和華閣講:「此個事無欲成。」
- 4
- 主耶和華閣互我看見一項:看啊,主耶和華叫火來責罰,火一盡燒深淵,亦欲吞食地。
- 5
- 我就講:「主耶和華啊,求你停止;雅各豈可徛會住啊?因為伊是微細。」
- 6
- 耶和華為此個事退悔,主耶和華閣講:「此個事也無欲成。」
- 7
- 伊閣互我看見一項:看啊,有一鑆牆是照繩線起的,主徛佇彼頂面手提繩線。
- 8
- 耶和華對我講:「阿摩司啊,你看見甚麼?」我講:「看見繩線。」主講:「看啊,我欲牽繩線佇我的百姓以色列中,我無欲閣寬恕。
- 9
- 以撒的山頭壇欲拋荒,以色列的聖所欲荒廢。我欲起來,用刀攻擊耶羅波安的家。」
- 10
- 當時伯特利的祭司亞瑪謝差人到以色列王耶羅波安遐,講:「阿摩司佇以色列族中計謀攻擊你;此個地方堪得伊講諸個話;
- 11
- 因為阿摩司按呢講:『耶羅波安欲互刀死,以色列百姓決斷欲受掠離開本所在。』」
- 12
- 亞瑪謝閣對阿摩司講:「你此個先見啊,去啊,著走去猶大地,佇遐趁食,佇遐做先知,
- 13
- 總是呣通閣佇伯特利講先知話;因為佇遮有王的聖所,有王家的宮殿。」
- 14
- 阿摩司就對亞瑪謝講:「我本呣是先知,亦呣是先知的子。我是飼精牲的人,閣是治理桑材樹者。
- 15
- 我顧羊群的時,耶和華揀召我,耶和華對我講:『去啊,對我的百姓以色列宣傳。』
- 16
- 今你著聽耶和華的話。你講:『呣通宣傳來攻擊以色列,呣通講話來攻擊以撒的家。』
- 17
- 所以耶和華按呢講:『你的某欲佇城內做娼妓,你的子查某子欲死佇刀下;你的地人欲用索量來分伊,你本身欲死佇污穢的所在。以色列百姓決斷欲受掠離開本所在。』」
如需更多版本聖經,請到台灣聖經公會聖經網站瀏覽與查詢 |
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您! |